ପୁରୀ: ଅସ୍ତରଙ୍ଗରେ ବିପଦରେ ଅଲିଭ ରିଡଲେ କଇଁଛ। ବେଆଇନ ଟ୍ରଲର ଚଳାଚଳ ଯୋଗୁଁ ଅଲିଭ ରିଡଲେ କଇଁଛଙ୍କ ମୃତ୍ଯୁ ହୋଇଛି। ପୁରୀ ଅସ୍ତରଙ୍ଗ ଦେବୀ ନାସି ଠାରୁ କେଳୁଣୀ ମୁହାଣ ମଧ୍ୟରେ ସାମୁଦ୍ରିକ କଇଁଛଙ୍କ ଭିଡ଼ ଲାଗିଥିବାରୁ ଅନେକ କଇଁଛଙ୍କର ମୃତ୍ଯୁ ବର୍ତ୍ତମାନ ଚିନ୍ତାରେ ପକାଇଛି।
କଇଁଛଙ୍କ ସୁରକ୍ଷା ପାଇଁ ନଭେମ୍ବର ୧ରୁ ମେ ୩୧ପର୍ଯ୍ୟନ୍ତ ଦେବୀ ନାସିରୁ କେଳୁଣୀ ମୁହାଣ ପର୍ଯ୍ୟନ୍ତ ମାଛ ଧରାକୁ ନିଷେଧ କରାଯାଇଛି। ବନ ବିଭାଗ, କୋଷ୍ଟଗାର୍ଡ, ମତ୍ସ୍ଯ ବିଭାଗ ଓ ସାମୁଦ୍ରିକ ଥାନା ପକ୍ଷରୁ ମିଳିତ ପଦକ୍ଷେପ ନିଆଯାଉଛି। ଏଥିପାଇଁ ସରକାର କୋଟି କୋଟି ଟଙ୍କା ଖର୍ଚ୍ଚ କରୁଛନ୍ତି। କିନ୍ତୁ ଦେବୀ ନାସିଠାରୁ କେଳୁଣୀ ମୁହାଣ ପର୍ଯ୍ୟନ୍ତ ଚିତ୍ର ସମ୍ପୂର୍ଣ୍ଣ ଭିନ୍ନ। ଏଠାରେ ବେଆଇନ ଭାବେ ବେଧଡକ ଟ୍ରଲର ଚାଲି ମାଛ ମରାଯାଉଛି। ଯାହାଫଳରେ ଅଲିଭ ରିଡଲେ କଇଁଛଙ୍କ ମୃତ୍ୟୁ ହୋଇଛି ।
