କୋରିଆନ୍ ପପ୍ ସଙ୍ଗୀତରେ ଓଡ଼ିଆ ଝିଅ, ମ୍ୟୁଜିକ ଭିଡ଼ିଓରେ ଓଡ଼ିଶା ସଂସ୍କୃତିର ଝଲକ…
1 min read
ଭୁବନେଶ୍ୱର: କେ-ପପ୍ ଅର୍ଥାତ୍ କୋରିଆନ୍ ପପ୍ ସଙ୍ଗୀତକୁ ନେଇ ଏବେ ସାରା ବିଶ୍ୱରେ ଯୁବ ପିଢ଼ିଙ୍କ ମଧ୍ୟରେ ଖୁବ୍ କ୍ରେଜ୍ ରହିଛି । ଦେଶର ପ୍ରଥମ ଓଡ଼ିଆ ଝିଅ ଭାବେ ସାଉଥ୍ କୋରିଆର କେ-ପପ୍ ଇଣ୍ଡଷ୍ଟ୍ରିରେ ପାଦ ଥାପିଥିଲେ ଓଡ଼ିଶାର ଶ୍ରେୟା। କେ-ପପ୍ ଗ୍ରୁପ ‘ବ୍ଲାକ ସ୍ୱାନ’ରେ ନିଜ ସ୍ଥାନ ବନାଇଥିଲେ ।
କେ-ପପ ଗ୍ରୁପକୁ ଏଯାବତ୍ ଭାରତରୁ ଦୁଇ ଜଣ ଝିଅଙ୍କୁ ଏଣ୍ଟ୍ରି ମିଳିଛି । ସେଥି ମଧ୍ୟରେ ବ୍ଲାକ ସ୍ୱାନ୍ ଗ୍ରୁପରେ ରହିଛନ୍ତି ଓଡିଶା ରାଉରକେଲାର ଜନ୍ମିତ ଶ୍ରେୟା ଲେଙ୍କା । ଅନ୍ୟ ଜଣେ ହେଉଛନ୍ତି କେରଳର ୨୦ ବର୍ଷିୟା ଆରିୟା, ସେ ଏବେ ସିନ୍ ଗ୍ରୁପରେ ଅଛନ୍ତି ।
ନୂଆ ଗ୍ରୁପ୍ ମେମ୍ବର ଓ ନୂଆ କ୍ରିଏଟିଭିଟି ସହ ବ୍ଲାକସ୍ୱାନ୍ ରିଲିଜ କରିଛି ଲାଟେଷ୍ଟ ମ୍ୟୁଜିକ ଆଲବମ୍ ‘କରମା’ । ଏହି ମ୍ୟୁଜିକ ଭିଡ଼ିଓରେ ସ୍ଥାନ ପାଇଛି ଓଡ଼ିଶାର ପର୍ଯ୍ୟଟନସ୍ଥଳୀ।ଏହି ମ୍ୟୁଜିକ ଭିଡ଼ିଓଟିରେ ରାଜଧାନୀ ଭୁବନେଶ୍ୱରର ଓଲ୍ଡ ଟାଉନରେ ଥିବା ଅନେକ ମନ୍ଦିର, ଓଡ଼ିଶାର ସଂସ୍କୃତି ଓ ଧଉଳି ଶାନ୍ତିସ୍ତୁପର ସୌନ୍ଦର୍ଯ୍ୟମୟ ଝଲକ ରହିଛି। ଖାଲି ଏତିକି ନୁହେଁ ଏହି ଭିଡ଼ିଓରେ ଗ୍ରୁପର ସଦସ୍ୟ ମାନେ ପିନ୍ଧିଥିବା ପୋଷାକରେ ଭାରତୀୟ ସଂସ୍କୃତିର ଝଲକ ଦେଖିବାକୁ ମିଳିଥିଲା।
ପୂର୍ବରୁ ୨୦୨୩ରେ କଟକରେ ଆୟୋଜିତ ହକି ବିଶ୍ଵକପ ଉଦଘାଟନୀ ଉତ୍ସବରେ ଶ୍ରେୟା ଲେଙ୍କାଙ୍କ ସହ ତାଙ୍କ ଗ୍ରୁପ କେ-ପପ୍ ସଙ୍ଗୀତ ପରିବେଷଣ କରିଥିଲେ ।
ଗତ ୨୦୨୦ ନଭେମ୍ବରରେ ବ୍ଲାକ ସ୍ୱାନ ଗ୍ରୁପ୍ ଛାଡିଥିଲେ ଜଣେ ସଦସ୍ୟ। ଏହାପରେ ଗ୍ରୁପ୍ ପ୍ରମୋଟର ଡିଆର୍ ମ୍ୟୁଜିକ୍ ମେ’ରେ ଉକ୍ତ ପଦ ପାଇଁ ବିଶ୍ୱସ୍ତରୀୟ ଅଡିଶନ୍ ଘୋଷଣା କରିଥିଲା। ଏଥିରେ ଦେଶ ବିଦେଶରୁ ୯୦୦୦ ପ୍ରତିଯୋଗୀ ଅଂଶଗ୍ରହଣ କରିଥିଲେ। ଶେଷରେ ୧୮ ବର୍ଷୀୟା ଓଡ଼ିଆ ଝିଅ ଶ୍ରେୟା ଓ ୧୯ ବର୍ଷୀୟା ବ୍ରାଜିଲ ଝିଅ ଗାବ୍ରିଏଲାଙ୍କୁ ଚୟନ କରାଯାଇଥିଲା। ୟୁଟ୍ୟୁବ୍ ମାଧ୍ୟମରେ ଏହି ଅଡିଶନ ହୋଇଥିଲା। ତେବେ ଉକ୍ତ ମ୍ୟୁଜିକ୍ ଗ୍ରୁପ୍ ଏହି ୨ଜଣଙ୍କ ନାମକୁ ସୋସିଆଲ ମିଡିଆ ପୋଷ୍ଟ ମାଧ୍ୟମରେ ଘୋଷଣା କରିଥିଲା।
ବ୍ଲାକ୍ସ୍ୱାନ୍ ଗ୍ରୁପ୍ ୨୦୧୧ ମସିହାରେ ଆରମ୍ଭ ହୋଇଥିଲା । ଏହି ଗ୍ରୁପ୍ ୨୦୨୦ ରେ ଫୁଲ୍ ଆଲବମ୍ Goodbye Raniaରୁ ଡେବ୍ୟୁ କରିଥିଲା । ଏହାସହ ୨୦୨୧ରେ ପ୍ରଥମ ସିଙ୍ଗଲ୍ ଆଲ୍ବମ୍, Close to Me ପାଇଁ ଖୁବ୍ ଚର୍ଚ୍ଚାରେ ଥିଲା । ଏହି କେ-ପପ୍ ଗର୍ଲ ବ୍ୟାଣ୍ଡରେ ଏବେ ୪ ଜଣ ସଦସ୍ୟ ରହିଛନ୍ତି । ସେଥିରେ ଫାଟୁ, ନାଭି, ଗାବି ଓ ଶ୍ରେୟା ରହିଛନ୍ତି ।
