ଦରବୃଦ୍ଧି ବିରୋଧରେ ରାଜ୍ୟବ୍ୟାପୀ ପ୍ରତିବାଦ କରିବ ବିଜେଡି

ଭୁବନେଶ୍ୱର: ଦରବୃଦ୍ଧି ପ୍ରସଙ୍ଗରେ ବିଜେପିକୁ ବିଜେଡିର ସମାଲୋଚନା। ଦରବୃଦ୍ଧି ଯୋଗୁ ହାଣ୍ଡିଶାଳରେ ପଡ଼ିଲାଣି ଚଡ଼କ। ଖାଇବା ସାମଗ୍ରୀଠୁ ଆରମ୍ଭ କରି ପନିପରିବା ଦର ଆକାଶଛୁଆଁ ହୋଇଛି। କମିବାର ନାଁ ନେଉନି ପେଟ୍ରୋଲ ଡିଜେଲ ଦର। ଅର୍ଥନୀତି ପରିଚାଳନାରେ ସରକାର ଫେଲ। ମୁଦ୍ରାସ୍ଫୀତି ରେକର୍ଡ ସ୍ତରରେ ପହଞ୍ଚିଲାଣି। ୬.୭୮ ପ୍ରତିଶତ ସହ ଓଡ଼ିଶା ତୃତୀୟ ସ୍ଥାନରେ ରହିଛି। ଦରବୃଦ୍ଧି ଯୋଗୁ ମହିଳା ସର୍ବାଧିକ କ୍ଷତି ସହୁଛନ୍ତି। ଆନ୍ତର୍ଜାତୀୟ ବଜାରରେ ପେଟ୍ରୋଲ ଡିଜେଲ ଦର କମିଛି। ହେଲେ ଏଠି ସରକାର ଦର କମାଉ ନାହାନ୍ତି ବୋଲି କହିଛି ବିଜେଡି। ସୁଭଦ୍ରା ନାଁରେ ଡବଲ ପାଇପ ଲଗାଇ ଶୋଷଣ କରାଯାଉଛି।

ପ୍ରେସମିଟ୍ କରି ବିଜେପି ସରକାର ଉପରେ ବର୍ଷିଛି ବିଜେଡି। ଦରବୃଦ୍ଧି ବିରୋଧରେ ଆସନ୍ତାକାଲି ଆନ୍ଦୋଳନ କରିବ ବିଜେଡି। ଆଗାମୀ ଦିନରେ ଜିଲ୍ଲା ଓ ପଞ୍ଚାୟତ ସ୍ତରରେ ଆନ୍ଦୋଳନ କରାଯିବ। ବିଜେପି ଯେଉଁ ନିର୍ବାଚନୀ ପ୍ରତିଶୃତି ଦେଇଥିଲା ସେଥିରେ ସେମାନେ ଫେଲ ମାରିଛନ୍ତି ବୋଲି କହିଛି ବିଜେଡି। ଓଡ଼ିଶାର ସ୍ୱାର୍ଥ ରକ୍ଷା ଓ ସମ୍ମାନ ରକ୍ଷା ପାଇଁ ନବୀନ ପଟ୍ଟନାୟକ କାମ କରିଛନ୍ତି। ନବୀନ ପଟ୍ଟନାୟକଙ୍କୁ ଯେଉଁ ଦାୟିତ୍ୱ ରାଜ୍ୟବାସୀ ଦେଇଛନ୍ତି, ସେଥିପାଇଁ କାମ ଚାଲିଛି। ହେଲେ ବିଜେପି ସରକାର ଲୋକଙ୍କ ଭୂଆଁ ବୁଲାଇବା ସହ ପକେଟ ଖାଲି କରୁଛି ବୋଲି କହିଛି ବିଜେଡି।