ଭୁବନେଶ୍ୱର : ଆଷାଢରେ ବୈଶାଖ ତାତି । ପ୍ରାକ୍ ମୌସୁମୀ ବର୍ଷା ବଦଳରେ ରାଜ୍ଯରେ ବହୁଛି ଝାଞ୍ଜିପବନ । ସ୍ବାଭାବିକ ସମୟର ୪ ଦିନ ଆଗରୁ ଓଡ଼ିଶାରେ ଦକ୍ଷିଣ ପଶ୍ଚିମ ମୌସୁମୀ ବାୟୁ ପହଞ୍ଚିଥିଲେ ମଧ୍ଯ ଆଗକୁ ବଢ଼ିବା ବଦଳରେ ଏହା ପୁରା ଗାଏବ ହୋଇଯାଇଛି। ବଙ୍ଗୋପସାଗରରେ ନା ଲଘୁଚାପ ହେଲା ନା ପ୍ରାକ୍ ମୌସୁମୀ ବର୍ଷା ହୋଇଛି।
ପ୍ରବଳ ଗରମ ଓ ଗୁଳୁଗୁଳିରେ ସିଝୁଛନ୍ତି ରାଜ୍ଯବାସୀ । ବିଶେଷଜ୍ଞ ଆକଳନ ଅନୁସାରେ, ୨୪ ତାରିଖ ମଧ୍ୟରେ ଓଡ଼ିଶାରେ ବଡ଼ ବର୍ଷା ନାହିଁ । ତେବେ କେତେକ ସ୍ଥାନରେ କାଳବୈଶାଖୀ ବର୍ଷା ହୋଇପାରେ । ଆଜି ମୟୂରଭଞ୍ଜ, କେନ୍ଦୁଝର, ଗଞ୍ଜାମ, ଗଜପତି, କନ୍ଧମାଳ, କଳାହାଣ୍ଡି, ରାୟଗଡା, ନବରଙ୍ଗପୁର, କୋରାପୁଟ ଏବଂ ମାଲକାନଗିରି ଜିଲ୍ଲାରେ ଘଡଘଡି ବିଜୁଳି ସହ ବର୍ଷା ହୋଇପାରେ। ୧୮ ତାରିଖରେ ବର୍ଷାର ପରିମାଣ ଏବଂ ବିସ୍ତୃତି ବଢିବ।
କାଳବୈଶାଖୀ ବର୍ଷା ପାଇଁ ୨୫ଟି ଜିଲ୍ଲାକୁ ଜାରି କରାଯାଇଛି ସତର୍କତା । କାଳବୈଶାଖୀ ସତ୍ତ୍ବେ କିଛି ସ୍ଥାନରେ ଗରମ ଗୁଳୁଗୁଳି ଲାଗି ରହିବ।ଆସନ୍ତା ୪ ରୁ ୫ ଦିନ ମଧ୍ୟରେ ଦୁର୍ବଳ ହୋଇଥିବା ମୌସୁମୀ ନିମ୍ନଚାପରେଖା ସକ୍ରିୟ ହେବା ସହ ମୌସୁମୀ ଆଗକୁ ବଢିବ ବୋଲି ଆକଳନ କରାଯାଇଛି।
