ସକାଳ ୭ଟା ୩୦ରୁ ୯ଟା ୩୦ ପର୍ଯ୍ୟନ୍ତ ଖୋଲା ରହିବ ଅଙ୍ଗନୱାଡ଼ି କେନ୍ଦ୍ର

ଭୁବନେଶ୍ୱର: ଆସନ୍ତା ୨୮ ତାରିଖରୁ ଖୋଲିବ ଅଙ୍ଗନୱାଡ଼ି କେନ୍ଦ୍ର । ଏନେଇ ମହିଳା ଓ ଶିଶୁବିକାଶ ବିଭାଗ ପକ୍ଷରୁ ବିଜ୍ଞପ୍ତି ପ୍ରକାଶ ପାଇଛି । ବିଭାଗୀୟ ସଚିବ ସମସ୍ତ ଜିଲ୍ଲାପାଳଙ୍କୁ ଏନେଇ ଚିଠି ଲେଖିଛନ୍ତି । ଅଙ୍ଗନୱାଡ଼ି ଖୋଲିବା ନେଇ ସ୍ୱତନ୍ତ୍ର ମାର୍ଗଦର୍ଶିକା ଜାରି କରାଯାଇଛି । କରୋନା ପାଇଁ ଗତ ବର୍ଷ ଏପ୍ରିଲ ୧୯ ତାରିଖରୁ ଅଙ୍ଗନୱାଡି କେନ୍ଦ୍ରକୁ ରାଜ୍ୟ ସରକାର ବନ୍ଦ କରିଥିଲେ । ଏହି ସମୟରେ ପିଲାମାନଙ୍କୁ ରନ୍ଧା ଖାଦ୍ୟ ବଦଳରେ ଶୁଖିଲା ରାସନ ଏବଂ ଅଣ୍ଡା ଘରେ ଦିଆ ଯାଉଥିଲା ।

ସକାଳ ସାଢେ ୭ଟାରୁ ସାଢେ ୯ଟା ପର୍ଯ୍ୟନ୍ତ ଅଙ୍ଗନୱାଡ଼ି କେନ୍ଦ୍ର ଖୋଲା ରହିବ । ଶିଶୁମାନଙ୍କ ମଧ୍ୟରେ ସାମାଜିକ ଦୂରତା ରକ୍ଷା କରିବା ବାଧ୍ୟତାମୂଳକ କରାଯାଇଛି । ଯେଉଁଠି କେନ୍ଦ୍ର ବନ୍ଦ ରହିବ ସେଠାରେ ପିଲାମାନଙ୍କୁ ଘରେ ରାସନ ପ୍ରଦାନ କରାଯିବ । ପିଲାଙ୍କ ପାଠପଢ଼ା ପାଇଁ ଘରେ ଘରେ ଅରୁନିମା ଏବଂ କୁନି କ୍ୟାଲେଣ୍ଡର ପ୍ରଦାନ କରାଯିବ । ପ୍ରତିଦିନ ପିଲାଙ୍କ ସ୍ୱାସ୍ଥ୍ୟ ପରୀକ୍ଷା, ପୁଷ୍ଟିକର ଖାଦ୍ୟ ଏବଂ ସ୍ୱାସ୍ଥ୍ୟ ଶିକ୍ଷା ଜାରି ରହିବ । ଅଙ୍ଗନୱାଡି କେନ୍ଦ୍ରକୁ ପରିଷ୍କାର ଏବଂ ସାନିଟାଇଜ୍ କରାଯିବ ।