ଇଲେକ୍ଟ୍ରିକ ଯାନକୁ ପ୍ରୋତ୍ସାହନ ଦେବାରେ ଓଡ଼ିଶା ହେବ ମଡେଲ ରାଜ୍ୟ
ଭୁବନେଶ୍ବର: ଇଲେକ୍ଟ୍ରିକ ଯାନକୁ ପ୍ରୋତ୍ସାହନ ଦେବାରେ ଓଡ଼ିଶା ହେବ ମଡେଲ ରାଜ୍ୟ । ଏନେଇ ‘ଓଡ଼ିଶା ଇଲେକ୍ଟ୍ରିକ୍ ଯାନ’ ଡ୍ରାଫ୍ଟ ପ୍ରସ୍ତୁତ କରିଛନ୍ତି ରାଜ୍ୟ ସରକାର । ଆସନ୍ତା ୫ ବର୍ଷ ପାଇଁ ଯୋଜନା ହୋଇଥିବା ବେଳେ ଇଲେକ୍ଟ୍ରିକ ଯାନକୁ ପ୍ରୋତ୍ସାହନ ଦେଇ ପ୍ରଦୂଷଣ କମାଇବା ସହ ଇନ୍ଧନ ବ୍ୟବହାର ହ୍ରାସ କରିବାକୁ ଲକ୍ଷ୍ୟ ରଖିଛନ୍ତି ସରକାର । ରାଜ୍ୟରେ ବର୍ତ୍ତମାନ ୮୨ ପ୍ରତିଶତ ମୋଟର ସାଇକେଲ ବ୍ୟବହାର ହେଉଛି ।
ତେବେ ଆଗାମୀ ଦିନରେ ଲୋକଙ୍କୁ ଇନ୍ଧନମୁକ୍ତ ଗମନାଗମନ ପନ୍ଥା ଆପଣାଇବାକୁ ବ୍ୟାପକ ସଚେତନ କରାଯିବ । ପରିବହନ ବିଭାଗ ପକ୍ଷରୁ ଗଠିତ ଟାସ୍କ ଫୋର୍ସ ଓ ଷ୍ଟିଅରିଂ କମିଟି ଏହାର ତଦାରଖ କରିବେ । ମୁଖ୍ୟ ଶାସନ ସଚିବଙ୍କ ଅଧ୍ୟକ୍ଷତାରେ କମିଟି ଗଠିତ ହେବାକୁ ଥିବା ବେଳେ ବିଭିନ୍ନ ବିଭାଗର ସଚିବ ଏହାର ସଦସ୍ୟ ରହିବେ ।
ସେହିପରି ଗ୍ରାହକଙ୍କୁ ଇଲେକ୍ଟ୍ରିକ୍ ଯାନ ପ୍ରତି ଆକୃଷ୍ଟ କରିବାକୁ ଆକର୍ଷଣୀୟ ସ୍କିମ୍ ଓ ଋଣର ବ୍ୟବସ୍ଥା କରାଯିବ । ଇଲେକ୍ଟ୍ରିକ ଯାନ କ୍ଷେତ୍ରରେ ନିଯୁକ୍ତି ସୃଷ୍ଟି ପାଇଁ ତାଲିମ ଦେବାକୁ ମଧ୍ୟ କରାଯିବ ବ୍ୟବସ୍ଥା । ସେହିପରି ବ୍ୟାପକ ମାତ୍ରାରେ ଚାର୍ଜିଂ ସେଣ୍ଟର ଖୋଲିବା ପାଇଁ ଘରୋଇ ଉଦ୍ୟୋଗୀଙ୍କୁ ପ୍ରୋତ୍ସାହନ କରାଯିବାକୁ ଲକ୍ଷ୍ୟ ରଖାଯାଇଛି । ଗତ କିଛି ଦଶନ୍ଧି ମଧ୍ୟରେ ଜଳବାୟୁ ପରିବର୍ତ୍ତନ ଏକ ବିଶ୍ୱସ୍ତରୀୟ ଚିନ୍ତାର ବିଷୟ ପାଲଟିଛି । ତେବେ ଏହାର ପ୍ରତିକାର ସ୍ବରୂପ ଇଲେକ୍ଟ୍ରକ ଯାନକୁ ପ୍ରୋତ୍ସାହନ ଦେବାକୁ ଯୋଜନା କରିଛନ୍ତି ରାଜ୍ୟ ସରକାର ।
