ଜୋରଦାର ହେବ ବିଦେଶ ଫେରନ୍ତାଙ୍କ ଟେଷ୍ଟିଂ, ଟ୍ରେସିଂ ଓ ଟ୍ରାକିଂ
ଭୁବନେଶ୍ୱର: ଓମିକ୍ରନ୍ ପ୍ରତିହତ ପାଇଁ ପ୍ରସ୍ତୁତ ରାଜ୍ୟ ସରକାର । ଏଣିକି ସମସ୍ତ ବିଦେଶ ଫେରନ୍ତାଙ୍କ ଟେଷ୍ଟିଂ, ଟ୍ରେସିଂ ଓ ଟ୍ରାକିଂକୁ ଜୋରଦାର କରାଯିବ । କୋଭିଡ୍ ନିୟମ କଡ଼ାକଡ଼ି ପାଳନ ନେଇ କଡ଼ା ନିର୍ଦ୍ଦେଶ ଦିଆଯାଇଛି । ଏ ନେଇ ଆଜି କେନ୍ଦ୍ର ସ୍ୱାସ୍ଥ୍ୟ ସଚିବ ସବୁ ରାଜ୍ୟର ସ୍ୱାସ୍ଥ୍ୟ ଅଧିକାରୀଙ୍କ ସହ ଆଲୋଚନା କରିଛନ୍ତି । ଓମିକ୍ରନରେ ଛୋଟ ପିଲାମାନେ ଅଧିକ ପ୍ରଭାବିତ ହେବାର ଆଶଙ୍କା ଥିବାରୁ ରାଜ୍ୟ ସରକାର ଚିକିତ୍ସା ପାଇଁ ସବୁ ପ୍ରକାର ପ୍ରସ୍ତୁତି ଚୂଡ଼ାନ୍ତ କରିଛନ୍ତି ।
ସେପଟେ ସ୍ୱାସ୍ଥ୍ୟ ବିଶେଷଜ୍ଞ କହିଛନ୍ତି, ଓମିକ୍ରନ୍ କ୍ଷୀପ୍ର ଗତିରେ ସଂକ୍ରମଣ କରୁଛି । କିନ୍ତୁ ଏହା ସେତେଟା ପ୍ରାଣଘାତି ହୋଇନଥିବାରୁ ଗୋଷ୍ଠୀଗତ ରୋଗ ପ୍ରତିରୋଧକ ଶକ୍ତି ବୃଦ୍ଧି କରିବାରେ ସହାୟକ ହେବ । ଏହାସହିତ ଟିକାକରଣକୁ ତ୍ୱରାନ୍ୱିତ କରିବାକୁ ନିର୍ଦ୍ଦେଶ ଦିଆଯାଇଛି । ଯେଉଁମାନେ ପ୍ରଥମ ଡୋଜ୍ ଟିକା ନେଇସାରିଛନ୍ତି ସେମାନେ କିପରି ଦ୍ବିତୀୟ ଡୋଜ ଟିକା ନେବେ ସେଥିପାଇଁ ସ୍ୱାସ୍ଥ୍ୟ ଅଧିକାରୀମାନଙ୍କୁ ନିର୍ଦ୍ଦେଶ ଦିଆଯାଇଛି ।
ଏବେ ସୁଦ୍ଧା ବିଦେଶରୁ ୧୧୩୪ ଜଣ ଏୟାର ସୁବିଧା ପୋର୍ଟାଲ ଜରିଆରେ ପଞ୍ଜିକରଣ କରିଛନ୍ତି । ସେମାନଙ୍କ ମଧ୍ୟରୁ ୪ ଜଣ ପଜିଟିଭ ଚିହ୍ନଟ ହୋଇଛନ୍ତି । ୨ ଜଣ ଯାଜପୁର ଓ ଅନ୍ୟ ୨ ଜଣ ସୁନ୍ଦରଗଡ଼ ଜିଲ୍ଲାର । ଦକ୍ଷିଣ ଆଫ୍ରିକାରେ ୫ରୁ ୯ ବର୍ଷର ପିଲା ଓମିକ୍ରନ୍ ଦ୍ୱାରା ବେଶୀ ସଂକ୍ରମିତ ହୋଇଛନ୍ତି । ସେଠାରେ କଟକଣା ଷ୍ଟେଜ୍ ୱାନରେ ରହିଛି । କିନ୍ତୁ ସେତେଟା ଗୁରୁତର ଅବସ୍ଥା ନ ଥିବାରୁ ଡାକ୍ତରଖାନା ରୋଗୀ ଭର୍ତ୍ତି ହେଉନାହାନ୍ତି ।
