ଜୁନ୍ ୩୦ ସୁଦ୍ଧା ସମ୍ପତ୍ତି ତାଲିକା ଦେବେ ସରକାରୀ କର୍ମଚାରୀ, ନହେଲେ ନିଆଯିବ ବିଭାଗୀୟ କାର୍ଯ୍ୟାନୁଷ୍ଠାନ
1 min read
ଭୁବନେଶ୍ୱର: ସରକାରୀ କମର୍ଚାରୀଙ୍କ ସମ୍ପତ୍ତି ତାଲିକା ପାଇଁ ଶେଷ ଡେଡଲାଇନ ଦେଲା ସାଧାରଣ ପ୍ରଶାସନ ବିଭାଗ । ୨୦୨୧ ଜାନୁଆରୀରୁ ଡିସେମ୍ବର ମଧ୍ୟରେ ନିଜର ସମ୍ପତ୍ତି ବିବରଣୀ ଜୁନ୍ ୩୦ ସୁଦ୍ଧା ଦେବାକୁ ସବୁ ବିଭାଗକୁ ଚିଠି ଲେଖା ଯାଇଛି । ଏହି ଅବଧି ମଧ୍ୟରେ ସମ୍ପତ୍ତି ତାଲିକା ନଦେଲେ ଏହା ବିଶୃଙ୍ଖଳା ବୋଲି ପରିଗଣିତ ହେବା ସହ ବିଭାଗୀୟ କାର୍ଯ୍ୟାନୁଷ୍ଠାନ ନିଆଯିବ । ସରକାରଙ୍କ ସ୍ୱଚ୍ଛ ବ୍ୟବସ୍ଥାକୁ ସଚିବାଳୟ ସେବା ସଂଘ ସ୍ୱାଗତ କରିଥିବା ବେଳେ ସମ୍ପତ୍ତି ତାଲିକା ସାର୍ବଜନୀନ କରିବାର ସୁବ୍ୟବସ୍ଥା ଦାବି କରିଛନ୍ତି ।
ସ୍ୱଚ୍ଛତାକୁ ରାଜ୍ୟ ସରକାରଙ୍କ ପ୍ରାଥମିକତା । ସମ୍ପତ୍ତି ତାଲିକା ଦାଖଲ କରିବେ ସରକାରୀ କର୍ମଚାରୀ । ପୁଣି ଥରେ ଡେଡଲାଇନ୍ ଦେଲା ସାଧାରଣ ପ୍ରଶାସନ ବିଭାଗ । ପୂର୍ବରୁ ୩୧ ଜାନୁଆରୀ ୨୦୨୨ ଥିଲା ଡ଼େଡ଼ଲାଇନ୍ । ହେଲେ ଏହି ସମୟ ମଧ୍ୟରେ ସମ୍ପତ୍ତି ତାଲିକା ଦାଖଲ ନ ହେବାରୁ ପୁଣି ଥରେ ଏପ୍ରିଲ ୩୦ ପର୍ଯ୍ୟନ୍ତ ସମୟ ଦିଆଗଲା । ତଥାପି ଆଖିଦୃଶିଆ ସଫଳତା ମିଳିଲା ନାହିଁ । ଏବେ ପୁଣି ଥରେ ଡେଡଲାଇନ୍ ଦେଇଛି ସାଧାରଣ ପ୍ରଶାସନ ବିଭାଗ । ଜୁନ୍ ୩୦ ସୁଦ୍ଧା ଗ୍ରୁପ-ଏରୁ ଗ୍ରୁପ-ଡି କର୍ମଚାରୀମାନେ ସମ୍ପତ୍ତି ତାଲିକା ଦାଖଲ କରିବେ ।
ସରକାରୀ କମର୍ଚାରୀଙ୍କ ସମ୍ପତ୍ତି ତାଲିକା ସାର୍ବଜନୀନ କରିବାକୁ ଫେବ୍ରୁଆରୀ ୨୦୨୧ରେ ଓଡ଼ିଶା ଗଭର୍ଣ୍ଣମେଣ୍ଟ ସର୍ଭେଣ୍ଟସ’କଣ୍ଡକ୍ଟ ରୁଲରେ ସଂଶୋଧନ ହୋଇଥିଲା । ନିୟମ ଅନୁସାରେ ୨୦୨୧ ଜାନୁଆରୀରୁ ଡିସେମ୍ବର ମଧ୍ୟରେ ପ୍ରତ୍ୟେକ ସରକାରୀ କମର୍ଚାରୀ ସମ୍ପତ୍ତି ତାଲିକା ଏଚଆରଏମଏସ୍ ପୋର୍ଟାଲରେ ଅପଲୋଡ଼ କରିବେ । ସ୍ୱଚ୍ଛତା ପାଇଁ ସରକାରଙ୍କ ଏପରି ପଦକ୍ଷେପକୁ ଏହାକୁ ସଚିବାଳୟ କର୍ମଚାରୀ ସଂଘ ସ୍ୱାଗତ କରିଛି ।
ସରକାରୀ ବ୍ୟବସ୍ଥାରେ ପ୍ରଯୁକ୍ତି ବିଦ୍ୟାର ସଠିକ୍ ଉପଯୋଗ ହେଉଥିବାରୁ ରାଜ୍ୟର ପ୍ରତ୍ୟେକ ସରକାରୀ କମର୍ଚାରୀ ଏଚଆରଏମଏସ୍(HRMS) ପୋର୍ଟାଲ ମାଧ୍ୟମରେ ସବୁ କିଛି ଜାଣି ପାରୁଛନ୍ତି । ହେଲେ ଅନେକ କମର୍ଚାରୀ ଏବେ ବି ଏହାର ବ୍ୟବହାର କରିପାରୁନାହାନ୍ତି । ଏଣୁ ସଚେତନତା ଉପରେ ମଧ୍ୟ ଗୁରୁତ୍ୱ ଦିଆଯାଉଛି । ଜୁନ୍ ୩୦ ଡେଡଲାଇନ୍ ବାବଦରେ ଅଧିକ ପ୍ରଚାର କରିବାକୁ ଚିଠିରେ ଉଲ୍ଲେଖ କରିଛି ସାଧାରଣ ପ୍ରଶାସନ ବିଭାଗ । ରାଜ୍ୟ ସରକାରଙ୍କ 5T ଚାର୍ଟର ମାଧ୍ୟମରେ ସ୍ୱଚ୍ଛତା ବଜାୟ ରଖିବାକୁ ଉଦ୍ୟମ ହେଉଛି । ନିର୍ଦ୍ଦିଷ୍ଟ ସମୟରେ କର୍ମଚାରୀ ନିଜର ସମ୍ପତ୍ତି ତାଲିକା ଦେଲେ ସରକାରଙ୍କ ଭାବମୂର୍ତ୍ତି ଆହୁରି ଉପରକୁ ଉଠିବ ବୋଲି ବିଶେଷଜ୍ଞ କହିଛନ୍ତି ।
ସରକାରଙ୍କ ସବୁ ବିଭାଗୀୟ ମୁଖ୍ୟଙ୍କ ସହ ସବୁ ଜିଲ୍ଲାର ଜିଲ୍ଲାପାଳଙ୍କୁ ମଧ୍ୟ ଚିଠି ଜରିଆରେ ସମସ୍ତ ସରକାରୀ କମର୍ଚାରୀଙ୍କ ସ୍ଥାବର ଓ ଅସ୍ଥାବର ସମ୍ପତ୍ତିର ବିବରଣୀ ଦେବାକୁ ନିର୍ଦ୍ଦେଶ ଦିଆଯାଇଛି ।
