ମାଛ ଉତ୍ପାଦନରେ ଓଡ଼ିଶା ଦେଶରେ ୫ ନମ୍ବର, ୫ ବର୍ଷରେ ୭୮ ପ୍ରତିଶତ ବୃଦ୍ଧି

ଭୁବନେଶ୍ୱର: ଓଡ଼ିଶା ଦେଶର ପଞ୍ଚମ ମାଛ ଉତ୍ପାଦନକାରୀ ରାଜ୍ୟ । ୨୦୧୯/୨୦ ଅର୍ଥିକ ବର୍ଷରେ, ମାଛ ଉତ୍ପାଦନ ୮.୧୬ ଲକ୍ଷ ମେଟ୍ରିକ୍‌ ଟନରେ ପହଞ୍ଚିଛି । ରାଜ୍ୟରେ ମାଛ ଉତ୍ପାଦନ କ୍ଷେତ୍ରରେ ଅଭିବୃଦ୍ଧି ଗତ ୫ ବର୍ଷ ମଧ୍ୟରେ ୧୪ ପ୍ରତିଶତ ବୃଦ୍ଧି ପାଇଛି । ସେହିପରି ସାମୁଦ୍ରିକ ମତ୍ସ୍ୟ ରପ୍ତାନୀ ଗତ ୫ ବର୍ଷରେ ୭୮ ପ୍ରତିଶତ ବୃଦ୍ଧି ହୋଇଛି ।

୨୦୧୪-୧୫ ଆର୍ଥିକ ବର୍ଷରେ ରପ୍ତାନୀ ୧୮୩୭ କୋଟି ଟଙ୍କା ଥିବା ବେଳେ ଗତ ଅର୍ଥିକ ବର୍ଷରେ ୩୨୪୩ କୋଟି ଟଙ୍କା ହୋଇଛି । ତେଣୁ କେନ୍ଦ୍ର ସରକାରଙ୍କ ପକ୍ଷରୁ ବିଶ୍ୱ ମତ୍ସ୍ୟ ଦିବସରେ ଓଡିଶାକୁ ସମ୍ମାନିତ କରାଯାଇଛି । ସାମୁଦ୍ରିକ ମତ୍ସ୍ୟ ଚାଷ ଲାଗି ଓଡିଶାକୁ ଶ୍ରେଷ୍ଠ ସାମୁଦ୍ରିକ ରାଜ୍ୟ ଓ ମଧୁର ମାଛ ଚାଷ ଲାଗି କଳାହାଣ୍ଡି ଜିଲ୍ଲାକୁ ଦେଶର ଆଭ୍ୟନ୍ତରୀଣ ଶ୍ରେଷ୍ଠ ମତ୍ସ୍ୟ ଜିଲ୍ଲା ଭାବେ ସମ୍ମାନିତ କରାଯାଇଛି ।

ଗତ ୨୦ ବର୍ଷ ଭିତରେ ମଧୁର ମାଛ ଉତ୍ପାଦନ ହାର ହେକ୍ଟର ପିଛା ୧.୮୫ ମେଟ୍ରିକ୍‌ ଟନରୁ ୩.୯୪ ମେଟ୍ରିକ୍‌ ଟନ୍‌କୁ ବୃଦ୍ଧି ପାଇଛି । ଏହାକୁ ୫ ମେଟ୍ରିକ ଟନ୍‌ରେ ପହଞ୍ଚାଇବା ଲାଗି ରାଜ୍ୟ ମତ୍ସ୍ୟ ଓ ପ୍ରାଣୀ ସମ୍ପଦ ବିଭାଗ ଯୋଜନା କରୁଛି । ସେହିପରି ଖାରି ପାଣି ଚିଙ୍ଗୁଡ଼ି ଉତ୍ପାଦନ ଗତ ୨୦ ବର୍ଷରେ ୧୫ ଗୁଣା ବୃଦ୍ଧି ପାଇଛି । ସାମୁଦ୍ରିକ ମତ୍ସ୍ୟଦ୍ରବ୍ୟ ରପ୍ତାନୀ ଏହି ସମୟରେ ୧୦ ଗୁଣା ବୃଦ୍ଧି ପାଇଛି ।