ନନ୍ଦିଘୋଷ ବ୍ୟୁରୋ : ବାଂଲାଦେଶୀ, ପାକିସ୍ଥାନୀ ପରେ ଏବେ ଆଫଗାନି ଚିନ୍ତା । କୁଆଡେ ଆସୁଛନ୍ତି, କେଉଁଠି ରହୁଛନ୍ତି, ମିଳୁନି ପତ୍ତା । ଓଡ଼ିଶା ପାଲଟିଛି ଅନୁପ୍ରବେଶକାରୀଙ୍କ ପାଇଁ ସେଫ ପ୍ଲେସ।ଭୁବନେଶ୍ବର ବିମାନବନ୍ଦରରୁ ୟାହା ଖାନ୍ ଗିରଫ ହେବା ପରେ, ଭୟ ବଢିଛି । ଯେଉଁ ଘରେ ୟାହା ଖାନ୍ ରହୁଥିଲା ସେହି ଘର ଭିତରେ ଏବେ ବି ରହୁଛନ୍ତି ଆହୁରି ତିନି ଆଫଗାନି । ସେମାନେ ବର୍ଷବର୍ଷ ଧରି ଏଠାରେ ରହି ଆସୁଛନ୍ତି। କେବେଠାରୁ ଏବଂ କେଉଁ ଉଦ୍ଦେଶ୍ୟରେ ଏମାନେ ଓଡ଼ିଶାରେ ଡେରା ପକାଇଛନ୍ତି ? ତାର ଉତ୍ତର କାହା ପାଖରେ ନାହିଁ। ଘର ଆଫଗାନିସ୍ତାନ ହୋଇଥିଲେ ବି ସେମାନେ ବେଧଡ଼କ କଟକରେ ରହି ନିଜର ଜାଲି ପାସପୋର୍ଟ ଓ ଆଧାରକାର୍ଡ ତିଆରି କରିଛନ୍ତି। ବିଦେଶ ଯାତ୍ରା କରିନଥିଲେ, ୟାହା ଖାନ ଧରା ପଡ଼ିନଥାନ୍ତା । ଏଭଳି ଖବର ମିଳିବା ପରେ ଗୁଇନ୍ଦା ବିଭାଗ ଓ କେନ୍ଦ୍ରୀୟ ସଂସ୍ଥା ପକ୍ଷରୁ ଚାଲିଛି ଛାନଭିନ ।
ଚୋର ଗଲା ପରେ, ବୁଦ୍ଧି ପସିଲା ଭଳି କମିସନରେଟ ପୋଲିସର ଅବସ୍ଥା । ଆଫଗାନିସ୍ତାନୀ ଯୁବକ ବନ୍ଧା ହେବା ପରେ, ବିଭିନ୍ନ ସ୍ଥାନକୁ ଯାଇ ପ୍ରମାଣପତ୍ର ଯାଞ୍ଚ କରୁଛି ପୁଲିସ। କିଛି ଲୋକଙ୍କୁ ଥାନାକୁ ଡାକି ବିଳମ୍ବିତ ରାତିଯାଏଁ ଜେରା କରାଯାଉଛି । ଦୀର୍ଘଦିନ ଧରି ଆଡ୍ଡା ଜମାଇଥିବା ବିଦେଶୀମାନଙ୍କ ପ୍ରକୃତ ଉଦ୍ଦେଶ୍ୟ କ’ଣ ? କାହିଁକି ଓଡ଼ିଶାକୁ ଏମାନେ ସେଫ୍ଜୋନ୍ ହିସାବରେ ନେଉଛନ୍ତି ? ଗୁଇନ୍ଦା ବିଭାଗ ଏବାବଦରେ କେମିତି ଜାଣି ପାରୁନି ? ଆଇବି ଟିମ୍ ଏ ଦିଗରେ ଅନ୍ୟ ସହଯୋଗୀଙ୍କୁ ପଚରା ଉଚରା କରିଛି । କିନ୍ତୁ ସ୍ଥାନୀୟ ପୁଲିସ କିମ୍ବା ପ୍ରଶାସନ କେମିତି ଜାଣି ପାରିଲେନି ବୋଲି ପ୍ରଶ୍ନ ଉଠାଇଛନ୍ତି ପୂର୍ବତନ ପୁଲିସ ଅଧିକାରୀ।
ସବୁଠାରୁ ଶକ୍ତିଶାଳି ପୁଲିସ କୁହାଯାଉଥିବା କମିସନରେଟ ପୁଲିସ ଅଧିନରେ ଯଦି ମାଳ ମାଳ ଆଫଗାନିସ୍ଥାନୀ, ବାଂଲାଦେଶୀ ମାନେ ଆଡ୍ଡା ଜମାଇଛନ୍ତି, ତାହାହେଲେ ଅନ୍ୟ ଉପାନ୍ତ ଅଞ୍ଚଳ ମାନଙ୍କର ଅବସ୍ଥା କଣ ଥିବ? ତାହା ସାଧାରଣରେ ପ୍ରଶ୍ନବାଚୀ ସୃଷ୍ଟି କରିଚି ।
ବାଂଲାଦେଶୀ, ପାକିସ୍ଥାନୀ ପରେ ଏବେ ଆଫଗାନି ଚିନ୍ତା
