ସଫଳତା ଆଣିଲା ‘ମିଲେଟ ମିଶନ’ ଓ ‘ମୋ ଉପକରୀ ବଗିଚା’, ଓଡ଼ିଶାକୁ ନୀତି ଆୟୋଗର ପ୍ରଶଂସା

ଭୁବନେଶ୍ୱର: ପୁଣି ଓଡ଼ିଶାକୁ ପ୍ରଶଂସା । ରାଜ୍ୟ ସରକାରଙ୍କ ଯୋଜନାକୁ ନୀତି ଆୟୋଗଙ୍କ ସାର୍ଟିଫିକେଟ୍‌ । ସଫଳତା ଆଣିଲା ‘ମିଲେଟ ମିଶନ’ ଓ ‘ମୋ ଉପକରୀ ବଗିଚା’ । ପଛରେ ପଡ଼ିଲେ ଅନ୍ୟରାଜ୍ୟ । ପୁଷ୍ଟି ସାଧନ କ୍ଷେତ୍ରରେ ରାଜ୍ୟ ପାଇଁ ସଫଳତା ଆାଣିଛି ରାଜ୍ୟର ଦୁଇ ଯୋଜନା- ମିଲେଟ ମିଶନ ଓ ମୋ ଉପକରୀ ବଗିଚା ।

ଦୁଇ ଯୋଜନାକୁ ପ୍ରଶଂସା କରିଛନ୍ତି ନୀତି ଆାୟୋଗ । ଗର୍ଭବତୀ, ପ୍ରସୂତି, କିଶୋରୀ ଓ ଶିଶୁଙ୍କ ଖାଦ୍ୟ ସାରଣୀରେ ବିବିଧତା ଆଣିବା ସହ ପୁଷ୍ଟି ସାଧନ କ୍ଷେତ୍ରରେ ସଫଳ ରୂପାୟପନ ଯୋଗୁଁ ଏହି ସଫଳତା ମିଳିଛି । ୨୦୧୭ ମସିହାରେ ରାଜ୍ୟ ସରକାର ମିଲେଟ ମିଶନ ଆରମ୍ଭ କରିଥିଲେ । ଶିଶୁ ବିକାଶ ଯୋଜନା, ସ୍କୁଲରେ ମଧ୍ୟାହ୍ନ ଭୋଜନ ଓ ସାଧାରଣ ବଣ୍ଟନ ବ୍ୟବସ୍ଥାରେ ମାଣ୍ଡିଆକୁ ସାମିଲ କରିବା ପାଇଁ ବହୁମୁଖୀ ଯୋଜନା ପ୍ରସ୍ତୁତ କରାଯାଇଥିଲା ।

ପାଇଲଟ ପ୍ରୋଜେକ୍ଟ ଭାବେ କେନ୍ଦୁଝର ଜିଲ୍ଲାର ୩୩୫ଟି ଅନଙ୍ଗବାଡ଼ି କେନ୍ଦ୍ରରେ ଶିଶୁଙ୍କ ଖାଦ୍ୟରେ ସାମିଲ ହୋଇଥିଲା ମାଣ୍ଡିଆ । ସୁନ୍ଦରଗଡ଼ରେ ମଧ୍ୟ ଏହି ଯୋଜନାର ସଫଳ ରୂପାୟନ କରାଯାଇଛି । ଯାହାକୁ ନୀତି ଆୟୋଗ ପ୍ରଶଂସା କରିଛନ୍ତି । ନୀତି ଆୟୋଗଙ୍କ ପ୍ରଶଂସା ରାଜ୍ୟ ସରକାରଙ୍କୁ ଉତ୍ସାହିତ କରିଛି ବୋଲି ମହିଳା ଓ ଶିଶୁ ବିକାଶ ମନ୍ତ୍ରୀ କହିଛନ୍ତି ।

ରାଜ୍ୟରେ ୨୦୧୯ରୁ ମୋ ଉପକାରୀ ବଗିଚା ଯୋଜନା କାର୍ଯ୍ୟକାରୀ ହେଉଛି । ବିଶେଷକରି ଅନଙ୍ଗବାଡ଼ି କେନ୍ଦ୍ରରେ ଏହି ଯୋଜନା ମାଧ୍ୟମରେ ୧୭ ହଜାର ବଗିବା ସୃଷ୍ଟି କରାଯାଇଛି । ତେବେ ଏହି ଦୁଇ ଯୋଜନାକୁ ନୀତି ଆାୟୋଗ ପ୍ରଶଂସା କରିବା ପରେ ଏହାକୁ ବିରୋଧୀ ସହଜରେ ହଜମ କରିପାରୁନାହାନ୍ତି । ରାଜ୍ୟର ଗ୍ରାମାଞ୍ଚଳରେ ପୁଷ୍ଟିହୀନତା ଦୂର ପାଇଁ ଉଦ୍ଧିଷ୍ଟ ଏହି ଦୁଇ ଯୋଜନା ଓଡ଼ିଶାକୁ ସାରା ଦେଶରେ ସ୍ୱତନ୍ତ୍ର ପରିଚୟ ଦେଇଛି ।