ବାଂଲାଦେଶୀ ମତ୍ସ୍ୟଜୀବୀଙ୍କ ଜୀବନ ବଞ୍ଚାଇଲେ ଓଡ଼ିଶା ମତ୍ସ୍ୟଜୀବୀ

ବାସୁଦେବପୁର: ବାତ୍ୟା ସି-ତ୍ରଙ୍ଗ ମାଡ଼ରେ ମଝି ସମୁଦ୍ରରେ ବୁଡିଗଲା ବାଙ୍ଗଲାଦେଶୀ ବୋଟ । ଅଳ୍ପକେ ବର୍ତ୍ତିଲେ ୧୦ ମତ୍ସ୍ୟଜୀବୀ । ଦେବଦୂତ ସାଜି ସମସ୍ତଙ୍କୁ ଗଭୀର ସମୁଦ୍ରରୁ ଉଦ୍ଧାର କଲେ ଓଡ଼ିଆ ମତ୍ସଜୀବୀ ।

ବାତ୍ୟା ସି- ତ୍ରଙ୍ଗର ମାଡରେ ଓଡ଼ିଶା ଭିତରକୁ ପସିଆସିଥିଲା ବାଙ୍ଗଲାଦେଶୀ ବୋଟ । ପରେ ବୋଟଟି ମଝି ସମୁଦ୍ରରେ ବୁଡିଯାଇଥିଲା । ବୋଟରେ ଥିବା ୧୦ ମତ୍ସ୍ୟଜୀବୀ ପାଣି ଭିତରେ କଦଳୀ ଗଛ ଏବଂ ବାଉଁଛ ଖଣ୍ଡର ସାହାରା ନେଇ ଜୀବନ ବଞ୍ଚାଇବାକୁ ସଂଘର୍ଷ କରୁଥିଲେ । ଏହି ସମୟରେ ଭଦ୍ରକ ବାସୁଦେବପୁର ବ୍ଲକର ମାଆ ଗଙ୍ଗା ନାମକ ବୋଟର ମତ୍ସଜୀବୀମାନେ ସମୁଦ୍ରରେ ବାଙ୍ଗଲାଦେଶୀ ମତ୍ସ୍ୟଜୀବୀମାନେ ଭାସୁଥିବା ଦେଖିବାକୁ ପାଇଥିଲେ । ସେମାନଙ୍କ ନିକଟରେ ପହଞ୍ଚି ଉଦ୍ଧାର କରିଥିଲେ ଓଡ଼ିଆ ମତ୍ସ୍ୟଜୀବୀ । ପରେ ସମସ୍ତ ଉଦ୍ଧାର ମତ୍ସ୍ୟଜୀବୀଙ୍କୁ ବୋଟରେ ଧରି କସିଆ ମୁହାଣରେ ପହଞ୍ଚିଥିଲେ । ମୁର୍ମୂଷ ଅବସ୍ଥାରେ ଉଦ୍ଧାର ବାଙ୍ଗଲାଦେଶୀ ମତ୍ସ୍ୟଜୀବୀଙ୍କୁ କସିଆ ସାମୁଦ୍ରିକ ପୋଲିସକୁ ହସ୍ତାନ୍ତର କରିଥିଲା କସିଆ ମତ୍ସ୍ୟଜୀବୀ ସଂଘ । ପୋଲିସ ସମସ୍ତ ମତ୍ସ୍ୟଜୀବୀଙ୍କୁ ଚିକିତ୍ସା ପାଇଁ ବାସୁଦେବପୁର ଡାକ୍ତରଖାନାରେ ଭର୍ତ୍ତି କରିଥିବା ସୂଚନା ରହିଛି ।