ପୋଲିସ ଚାକିରୀ ଦେବା ନାଁରେ ଦେଢ କୋଟି ଟଙ୍କା ଠକେଇ, ଅଭିଯୁକ୍ତଙ୍କୁ ଖୋଜୁଛି ପୋଲିସ

ଭୁବନେଶ୍ୱର: ପୋଲିସ ଚାକିରୀ ଦେବା ନାଁରେ ଦେଢ କୋଟି ଟଙ୍କା ଠକେଇ ଅଭିଯୋଗ । ଦୁଇ ଜଣ ଠକକୁ ଗିରଫ କଲା କ୍ରାଇମବ୍ରାଞ୍ଚର ଅର୍ଥନୈତିକ ଅପରାଧ ଶାଖା । ୨ ଅଭିଯୁକ୍ତ ହେଲେ ବୈକୁଣ୍ଠନାଥ ନାୟକ ଓ ଭୀମସେନ ମହାରଣା । ପୋଲିସ ବିଭାଗର ମିଳିତ ପୋଲିସ ସେବା ବା ସିପିଏସିଇ ପରୀକ୍ଷାରେ ଚାକିରୀ କରେଇ ଦେବା ନାଁରେ ପକାଇଥିଲେ ଜାଲ । ଫେକ୍ ଆଇଡ଼ି କାର୍ଡ ଦେଖାଇ ଜନ୍ମାଉଥିଲେ ଆଶାୟୀ ମନରେ ବିଶ୍ବାସ । ପିଅନ, ଡ୍ରାଇଭର ଓ ମାଳିଙ୍କ ମାଧ୍ୟମରେ କରୁଥିଲେ ଶିକାର ।

ଠକଙ୍କ ଟାର୍ଗେଟରେ ଥିଲେ ଭାୟାବସ ଟେଷ୍ଟ ଦେଇଥିବା ଆଶାୟୀ । ୬ ଲକ୍ଷ ଟଙ୍କା ଦେଲେ ଏସଆଇ, ସର୍ଜେଣ୍ଟ ଓ ସୁବେଦାର ଚାକିରୀ ପାଇଁ ମିଳୁଥିଲା ପ୍ରତିଶ୍ରୁତି । ଦୁଇଜଣ ନିଜକୁ ଗୃହ ବିଭାଗର ସେକ୍ସନ ଅଫିସର କହି ୩୮ ଜଣ ଚାକିରୀ ଆଶାୟୀଙ୍କ ଠାରୁ ପାଖାପାଖି ଦେଢ କୋଟି ଟଙ୍କା ଠକିଥିଲେ । ଆଉ ଦୁଇ ଫେରାର ଥିବାବେଳେ ୨ ଜଣ ନିକଟରୁ ୧୨ଟି ଏଟିଏମ କାର୍ଡ଼ ଓ ଜାଲ ପରିଚୟ ପତ୍ର ଜବତ କରିଛି ଇଓଡବ୍ଳୁ । କ୍ରାଇମବ୍ରାଞ୍ଚ ଇଓଡବ୍ଳୁରେ ଅଭିଯୋଗ ହେବା ପରେ ତଦନ୍ତ ଆରମ୍ଭ କରିଥିଲା ଟିମ ।

ସୂଚନା ମୁତାବକ ଆଶାୟୀ ମାନେ ଦୁଇ ଠକଙ୍କ ବ୍ୟାଙ୍କ ଆକାଉଣ୍ଟକୁ କ୍ୟାସ୍ ଡିପୋଜିଟ୍ କରିଥିଲେ । ଫେରାର ଦୁଇଜଣ ଡ୍ରାଇଭର ବୋଲି ଜଣା ପଡିଛି । ପ୍ରକୃତରେ ଗୃହ ବିଭାଗରେ ବୈକଣ୍ଠନାଥ ନାମକ ଜଣେ ଲୋକ ଚାକିରୀ କରୁଛି। ଠକ ବୈକୁଣ୍ଠ କୌଶଳ କ୍ରେମ କାର୍ଡ ହାତେଇ ନିଜର ଫଟୋ ଲଗାଇ ଆଶାୟୀ ମାନଙ୍କୁ ଦେଖାଉଥିବା ତଦନ୍ତରୁ ଇଓଡବ୍ଳୁ ଜାଣିବାକୁ ପାଇଛି । ଠକ ବୈକୁଣ୍ଠନାଥ ନାୟକଙ୍କ ଆକାଉଣ୍ଟକୁ ଫ୍ରିଜ କରିଛି ଇଓଡବ୍ଳୁ । ଫେରାର ଦୁଇ ଅଭିଯୁକ୍ତକୁ ଖୋଜୁଛି ଟିମ୍ ।