ଭାରତୀୟ ରାଜନୀତିର ବଳିଷ୍ଠ ବ୍ୟକ୍ତିତ୍ୱ, ବିଶିଷ୍ଟ ରାଜନେତା ତଥା ଓଡିଶାର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆଜି ୭୪ ବର୍ଷରେ ପାଦ ଥାପିଛନ୍ତି । ୧୯୪୬ ମସିହା ଆଜିର ଦିନରେ ଜନ୍ମ ହୋଇଥିଲେ ନବୀନ। ଓଡିଶାର ପୂର୍ବତନ ମୁଖ୍ୟମନ୍ତ୍ରୀ ବିଜୟାନନ୍ଦ ପଟ୍ଟନାୟକ ଓ ଜ୍ଞାନ ଦେବୀଙ୍କ କନିଷ୍ଠ ପୁତ୍ର ହେଉଛନ୍ତି ନବୀନ । ଓଡିଶା ରାଜନୀତିର ୨୦୦୦ ମସିହାରୁ ମୁଖ୍ୟମନ୍ତ୍ରୀ ଆସନ ଅଳଂକୃତ କରିଛନ୍ତି ଅପରାଜେୟ ନବୀନ। ପଶ୍ଚିମବଂଗର ପୂର୍ବତନ ମୁଖ୍ୟମନ୍ତ୍ରୀ ଜ୍ୟୋତି ବସୁ ଓ ସିକ୍କିମର ପୂର୍ବତନ ମୁଖ୍ୟମନ୍ତ୍ରୀ ପବନ କୁମାର ଚାମଲିଂଗଙ୍କ ପରେ ଦେଶର ତୃତୀୟ ମୁଖ୍ୟମନ୍ତ୍ରୀ ଭାବେ ସେ କ୍ରମାଗତ ୫ଟି ନିର୍ବାଚନ ଜିତି ୫ଥର ମୁଖ୍ୟମନ୍ତ୍ରୀ ହେବାର ରେକର୍ଡ କରିଛନ୍ତି ।
୧୯୯୭ରେ ନବୀନ ବାପା ବିଜୁଙ୍କ ଦେହାନ୍ତ ପରେ ରାଜନୀତିରେ ପ୍ରବେଶ କରିଥିଲେ। ଆସିକା ସଂସଦୀୟ କ୍ଷେତ୍ରରୁ ଉପ ନିର୍ବାଚନ ଜିତି ସଂସଦକୁ ଯାଇଥିଲେ। ଅଟଳ ବିହାରୀ ବାଜପେୟୀଙ୍କ ସରକାରରେ ସେ କେନ୍ଦ୍ର ମନ୍ତ୍ରୀ ରହିଥିଲେ। ରାଜନୀତିକୁ ଆସିବା ପୂର୍ବରୁ ବିଜୁ ନନ୍ଦନ ୩ଟି ପୁସ୍ତକ ଲେଖିଛନ୍ତି । ଜଣେ ଲେଖକ ଭାବରେ ବିଦେଶରେ ତାଙ୍କର ବେଶ୍ ଭଲ ଖ୍ୟାତି ରହିଛି। ଓଡିଶାରେ ମୁଖ୍ୟମନ୍ତ୍ରୀ ଭାବେ ଦେଶର ଶ୍ରେଷ୍ଠ ପ୍ରଶାସକ ଓ ୨୦୧୮ରେ ଆଦର୍ଶ ମୁଖ୍ୟମନ୍ତ୍ରୀର ସମ୍ମାନ ମଧ୍ୟ ହାସଲ କରିଛନ୍ତି। ହକି ବିଶ୍ୱକପର ସଫଳ ଆୟୋଜନ କରି ସାରା ବିଶ୍ୱରେ ଓଡ଼ିଶାକୁ ସ୍ୱତନ୍ତ୍ର ପରିଚୟ ଦେବାରେ ନବୀନଙ୍କ ଭୂମିକା ଅତୁଳନୀୟ । ଆଜି ଜନ୍ମଦିନରେ ସାରା ଦେଶରୁ ମୁଖ୍ୟମନ୍ତ୍ରୀଙ୍କ ନିକଟକୁ ଛୁଟୁଛି ଶୁଭେଛାର ସୁଅ । ସମସ୍ତଙ୍କ କାମନା ଦୀର୍ଘାୟୁ ହୁଅନ୍ତୁ ନବୀନ ଓ ଓଡିଶାକୁ ଦେଇଚାଲିଥାନ୍ତୁ ଦିଗଦର୍ଶନ । ')}
