ରାଜ୍ୟ କ୍ୟାବିନେଟରେ ୧୩ ପ୍ରସ୍ତାବକୁ ମଞ୍ଜୁରୀ

ଭୁବନେଶ୍ବର: ରାଜ୍ୟ କ୍ୟାବିନେଟର ଗୁରୁତ୍ବପୂର୍ଣ୍ଣ ବୈଠକ । ୧୦ ବିଭାଗର ୧୩ ପ୍ରସ୍ତାବରେ ବାଜିଲା କ୍ୟାବିନେଟ ମୋହର । ୧୩ଟି ପ୍ରସ୍ତାବରେ ରହିଛି ୬ଟି ସେବା ସମ୍ବନ୍ଧୀୟ ପ୍ରସ୍ତାବକୁ ମିଳିଛି ଅନୁମୋଦନ ।

ଏମଏସଏମଇ ବିଭାଗ ଅଧୀନରେ ଓଡ଼ିଶା ଶିଳ୍ପ ସେବା- ଓଆଇଏସ କ୍ୟାଡରର ବିଭିନ୍ନ ପଦବୀରେ ନିଯୁକ୍ତିର ପଦ୍ଧତି ଏବଂ ସେବା ସର୍ତ୍ତ ନିୟମ ୨୦୨୩କୁ କ୍ୟାବିନେଟ ଅନୁମୋଦନ ମିଳିଛି  । ସେହିଭଳି ରାଜ୍ୟର ୧୧୦ ପୌର ସଂସ୍ଥାରେ ଏଲଇଡି ପାଇଁ ୩୧୨.୧୮ କୋଟି ଟଙ୍କାର ଟେଣ୍ଡର ପ୍ରକ୍ରିୟାକୁ ଅନୁମୋଦନ ମିଳିଛି  । ଓଡ଼ିଶା ସୂଚନା ଓ ଲୋକ ସମ୍ପର୍କ ବୈଷୟିକ ଏବଂ ଅଣ ବୈଷୟିକ ସେବା ସଂଶୋଧନ ନିୟମାବଳୀ ୨୦୨୩ ଉପରେ କ୍ୟାବନେଟ ମୋହର ବାଜିଛି  ।

ଅନ୍ୟପଟେ ଗୃହ ନିର୍ମାଣ ଓ ନଗର ଉନ୍ନୟନ ବିଭାଗ ଅଧୀନସ୍ଥ ଓଡ଼ିଶା ଡିପ୍ଲୋମା ଯନ୍ତ୍ରୀ ସେବା ଓ ଓଡ଼ିଶା ଯନ୍ତ୍ରୀ ସେବା ପୁର୍ନଗଠନକୁ ଅନୁମତି ମିଳିଛି  । ଓଡ଼ିଶା ଡିପ୍ଲୋମା ଯନ୍ତ୍ରୀ ସେବା ଅଧୀନରେ  ୩୬୫ଟି ନୂଆ କନିଷ୍ଠ ଯନ୍ତ୍ରୀ ପଦବୀ ସୃଷ୍ଟି ଓ ଓଡ଼ିଶା ଯନ୍ତ୍ରୀ ସେବା ଅଧୀନରେ ୯୧ଟି ସହକାରୀ ନିର୍ବାହି ଯନ୍ତ୍ରୀ ପଦବୀ ସୃଷ୍ଟି ପାଇଁ ଅନୁମୋଦନ ମିଳିଛି  । ସେହିଭଳି କ୍ରୁଟ ବସ ସଂଖ୍ୟାରେ ସାମିଲ କରାଯିବ ଅଧିକ ୨୦୦ ଇ-ବସ୍  । ରାଜଧାନୀ ସହ ଅନ୍ୟ ସହରରେ ଏହି ଇ-ବସ୍‌ ଗଡିବ ।

ଓଡ଼ିଶା ଅଗ୍ନିଶମ ନିୟମାବଳୀ ୨୦୨୧ ସଂଶୋଧନ ପ୍ରସ୍ତାବକୁ କ୍ୟାବିନେଟ ମୋହର ବାଜିଛି  । ଅଗ୍ନିଶମ ସେବାରେ ଖାଲି ଥିବା ପଦବୀ ପୂରଣ ପାଇଁ ୩ ଗୁଣ ବଦଳରେ ୭ ଗୁଣ ପ୍ରାର୍ଥୀଙ୍କୁ ଶାରିରୀକ ମାନଦଣ୍ଡ ଓ ଦକ୍ଷତା ପରୀକ୍ଷା ପାଇଁ ବିଚାର କରାଯାଇଛି । ଓଡ଼ିଶା ସିଭିଲ ସର୍ଭିସ ବୟସ ସୀମା ୩୨ ବର୍ଷରୁ ୩୮ ବର୍ଷ ପର୍ଯ୍ୟନ୍ତ ବୃଦ୍ଧି କରିବାକୁ ସରକାର ନିଷ୍ପତ୍ତି ନେଇଛନ୍ତି  । ସେହିଭଳି ଆଇଆଇପିଏଚ କ୍ୟାମ୍ପସ ପାଇଁ ରାଜଧାନୀରେ ୫ ଏକର ଜାଗା ଦିଆଯିବ ପାଇଁ କ୍ୟାବିନେଟ ଅନୁମୋଦ ମିଳିଛି ।