ସିସିଟିଭିରେ କଏଦ ହେଲା ଲୁଟ୍ ଭିଡିଓ, ଦେଖନ୍ତୁ ଲାଇଭ୍
ବଲାଙ୍ଗିର: ସିସିଟିଭିରେ କଏଦ ହେଲା ଲୁଟ୍ର ଲାଇଭ୍ ଭିଡିଓ । ଦୋକାନ ମାଲିକଙ୍କୁ ବନ୍ଧୁକ ଦେଖାଇ ଲୁଟିଲେ ଦୁର୍ବୃତ୍ତ । ଏଭଳି ଘଟଣା ସାମ୍ନା ଆସିଛି ବଲାଙ୍ଗିର ଜିଲ୍ଲାରୁ । ଦୁର୍ବୃତ୍ତମାନେ ଆସିବା ସମୟଠାରୁ ଆରମ୍ଭ କରି ଲୁଟ୍ କରିବା ପର୍ଯ୍ୟନ୍ତ ସମସ୍ତ ଦୃଶ୍ୟ ସିସିଟିଭିରେ କଏଦ ହୋଇଛି ।
ବଲାଙ୍ଗିର ରେଲଓ୍ୱେ ଷ୍ଟେସନ୍ ରାସ୍ତାରେ ଥିବା ମେହେର ବ୍ୟାଟେରୀ ଦୋକାନରୁ ହୋଇଛି ଲୁଟ୍ । ରବିବାର ରାତି ପ୍ରାୟ ୯ଟା ବେଳେ ଦୋକାନର କର୍ମଚାରୀମାନେ ଘରକୁ ଚାଲିଯାଇଥିଲେ । ଆଉ ଦୋକାନରେ କେବଳ ମାଲିକ ଓ ତାଙ୍କ ଭାଇ ଥିଲେ । ଏହି ସମୟରେ କିଛି ଦୁର୍ବୃତ୍ତ ଆସି ଦୋକାନ ସମ୍ମୁଖରେ ପହଞ୍ଚି ଲୁଟ୍ କରିଥିଲେ ।
ତେବେ ସବୁଠାରୁ ବଡ଼ କଥା ହେଲା ଦୋକାନ ମାଲିକଙ୍କ ସହ ପ୍ରଥମେ ଦୁଇ ଜଣ ଦୁର୍ବୃତ୍ତ ଆସି ଅତି ଭଦ୍ର ଲୋକ ଭଳି କଥା ହୋଇଥିଲା । ସେହି ଦୁଇ ଜଣ କଥା ହେବାର କିଛି ସମୟ ପରେ ଆଉ ଦୁଇ ଜଣ ଦୁର୍ବୃତ୍ତ ଆସି ପହଞ୍ଚିଥିଲେ । ଏହାପରେ ସେମାନେ ବନ୍ଧୁକ ଦେଖାଇ ଦୋକାନର ଲକର ଭାଙ୍ଗି ଲୁଟ୍ କରିବାକୁ ଚେଷ୍ଟା କରିଥିଲେ । ହେଲେ ସେଥିରେ ସେମାନେ ବିଫଳ ହୋଇଥିଲେ । ଲକର ଭାଙ୍ଗିବାରେ ଅସଫଳ ହେବାରୁ ସେମାନେ ଦୋକାନ ମାଲିକ ପାଖରେ ଥିବା ନଗଦ ଟଙ୍କା, ପିନ୍ଧି ଥିବା ସମସ୍ତ ସୁନା ଗହଣା ଓ ୩ ମୋବାଇଲ ଲୁଟି ନେଇଥିଲେ ।
ଏହି ୪ ଜଣ ଲୁଟେରାଙ୍କ ପାଖରେ ୪ଟି ବନ୍ଧୁକ ଥିଲା । ଦୁଇ ଜଣ ଦୁର୍ବୃତ୍ତ ବନ୍ଧୁକ ଦେଖାଇ ଭୟଭୀତ କରୁଥିବା ବେଳେ ଅନ୍ୟ ଦୁଇ ଜଣ ଲୁଟ୍ପାଟ୍ କରୁଥିଲେ । ତେବେ ସହରର ଜନଗହଳିପୂର୍ଣ୍ଣ ସ୍ଥାନରେ ରାତି ୯ଟାରେ ଲୁଟ୍ ଏଭଳି ଲୁଟ୍ ହୋଇଛି, ଯାହାକି ଲୋକଙ୍କ ମନରେ ହଜମ ହେଉ ନାହିଁ । ଅନ୍ୟପଟେ ଖବର ପାଇ ଟାଉନ ଥାନା ପୋଲିସ ଘଟଣାସ୍ଥଳରେ ପହଂଚି ତଦନ୍ତ ଆରମ୍ଭ କରିଛି । ବଲାଙ୍ଗିର ଏସ୍ପି ସନ୍ଦୀପ ସମ୍ପଦ ଓ ଏସ୍ଡିପିଓ ଶ୍ରୀମନ୍ତ ବାରିକ ଘଟଣାସ୍ଥଳରେ ପହଞ୍ଚିଛନ୍ତି ସିସିଟିଭି ଫୁଟେଜ୍କୁ ଆଧାର କରି ପଚରାଉଚରା ଆରମ୍ଭ କରିଛନ୍ତି ।
