ଖାଉଟି ଭୋଗୁଛନ୍ତି ଯନ୍ତ୍ରଣା: ଦରଦାମ କମାଇବାକୁ ସରକାରଙ୍କ ନାହିଁ ଆନ୍ତରିକତା

ଭୁବନେଶ୍ବର: ଶାସନକୁ ଆସିବା ପରଠାରୁ ରାଜ୍ୟ ବିଜେପି ସରକାର ଖାଲି କଥା କହୁଛନ୍ତି, କାମ କିନ୍ତୁ ଶୂନ । ପାଇକାରୀ ବଜାରରେ ଦର କମିଲେ ମଧ୍ୟ ଖୁଚୁରା ବଜାରରେ ମନଇଚ୍ଛା ଦରରେ ଗ୍ରାହକଙ୍କୁ ଶୋଷଣ ଚାଲିଛି । କୃଷିଭିତ୍ତିକ ଶିଳ୍ପ କଥା କୁହାଯାଉଛି, କିନ୍ତୁ ଆଜି କୃଷକ କାନ୍ଦୁଛି । ରାଜ୍ୟର ସମସ୍ତ ବର୍ଗ ଆଜି ହତାଶ ହୋଇଯାଇଥିବା ଅଭିଯୋଗ ହୋଇଛି । ୮ ମାସ ସରକାର ହେଲାଣି ଆଉ କେବେ ଏସବୁରେ ବିରାମ ଲାଗିବ ବୋଲି ପ୍ରଶ୍ନ କରିବା ସହ ସବୁ ବର୍ଗ ସରକାରଙ୍କ ଉପରେ ଅସନ୍ତୋଷ ଝାଡିଛନ୍ତି ।

ଜୀଅନ୍ତା ଅବସ୍ଥାରେ ନର୍କ ଯନ୍ତ୍ରଣା । ହୁ ହୁ ବଢୁଛି ଅତ୍ଯାବଶ୍ଯକ ସାମଗ୍ରୀର ଦର । ଏହା ରାଜ୍ୟ ବିଜେପି ସରକାରର ବିଶେଷ ଅବଦାନ । ୮ ମାସ ହେଲାଣି ଅତ୍ୟାବଶ୍ୟକ ସାମଗ୍ରୀର ଦରଦାମ କମିବ କ’ଣ ବଢି ବଢି ଚାଲିଛି । ପାଇକାରୀ ଦର କମି ଥିଲେ ବି ଖୁଚୁରା ଦର କମୁନି । ଯାହାକୁ ନେଇ ସରକାରଙ୍କ ଉପରେ ବର୍ଷିଛି ରାଜ୍ୟ ବ୍ୟବସାୟୀ ମହାସଂଘ ।

ଗ୍ରାହକଙ୍କ ସ୍ୱାର୍ଥ ପାଇଁ ସରକାର କିଛି ବି ପଦକ୍ଷେପକୁ ନେଉନାହାନ୍ତି । କେବଳ ଅନ୍ୟକୁ ଦୋଷ ଦେଇ ଖସି ଯିବାକୁ ଚାହୁଁଛନ୍ତି ବୋଲି ସଂଘ ଅଭିଯୋଗ କରିଛି । ନୂଆ ସରକାର ଆସିବା ବେଳେ ବିଭିନ୍ନ ବିଭାଗର ସମନ୍ୱୟ ବୈଠକ କରିବା ସହ ୩ ମାସରେ ଥରେ ସବୁ ଷ୍ଟେକ ହୋଲଡ଼ରଙ୍କ ସହ ବୈଠକ କରିବାକୁ କହିଥିଲେ । କିନ୍ତୁ ୮ ମାସ ବିତି ଯାଇଥିଲେ ମଧ୍ୟ କୌଣସି ବୈଠକ ହେଲା ନାହିଁ । ଏବେ ପୁଣି ବଜେଟ ପ୍ରସ୍ତୁତି ଓ ଉତ୍କର୍ଷ ଓଡ଼ିଶାରେ ମଧ୍ୟ କୃଷି କ୍ଷେତ୍ରକୁ ସମୃଦ୍ଧ କରିବା କଥା କହୁଛନ୍ତି । ତେଣୁ ତୁରନ୍ତ ଖାଉଟି ଓ ଚାଷୀଙ୍କ ସ୍ୱାର୍ଥ ପାଇଁ କାର୍ଯ୍ୟ କରିବାକୁ ଆହ୍ୱାନ ଦେଇଛି ସଂଘ ।

୫ ବର୍ଷର ସରକାରରେ ୮ ମାସ ଅର୍ଥାତ ୨୦ ପ୍ରତିଶତ ସମୟ ଚାଲି ଯାଇଥିଲେ ବି ପଦକ୍ଷେପ ନିଆଯାଉ ନଥିବାରୁ ବର୍ଷିଛି କୃଷକ ମଜଦୂର ମହାସଂଘ । କେବଳ ଉତ୍କର୍ଷ ଓଡ଼ିଶାରେ ଅର୍ଥ ଖର୍ଚ୍ଚ କରି ଶିଳ୍ପପତିଙ୍କୁ ମାଲେମାଲ କରିବାକୁ ଚେଷ୍ଟା କରାଯାଉଛି । ହେଲେ କୃଷି ଉତ୍ପାଦନ ବୃଦ୍ଧି କିମ୍ବା କୌଣସି କୃଷି ଶିଳ୍ପ ଭିତ୍ତିକ ଭିତ୍ତିଭୂମି ପାଇଁ କୌଣସି ଉଦ୍ୟମ ଆରମ୍ଭ ହେଲାଣି କି ବୋଲି ପ୍ରଶ୍ନ କରିଛି ମହାସଂଘ । ଏହାସହ ମହାସଂଗ୍ରାମ ପାଇଁ ସଜବାଜ ଆରମ୍ଭ ହେଲାଣି ବୋଲି କହିଛି କୃଷକ ମହାସଂଘ । ନୀତି ନିର୍ଦ୍ଧାରଣ ଓ ସବୁ କ୍ଷେତ୍ରରେ ରାଜ୍ୟ ସରକାର କେନ୍ଦ୍ର ଉପରେ ସମ୍ପୂର୍ଣ୍ଣ ନିର୍ଭରଶୀଳ ହେବାରୁ ଏଭଳି ଅବସ୍ଥା ହେଉଛି । ତେଣୁ ଏ ଦିଗରେ ରାଜ୍ୟ ସରକାର କେନ୍ଦ୍ରକୁ ସ୍ବାଧୀନତା ମାଗନ୍ତୁ ବୋଲି ଦାବି କରିଛି ସିଟିଜେନସ ଫୋରମ ।

ନା ସାଧାରଣ ଗ୍ରାହକ, ନା କୃଷକ ନା ବ୍ୟବସାୟୀ, କେହି ବି ଏବେ ସନ୍ତୁଷ୍ଟ ନ ଥିବା ଦେଖିବାକୁ ମିଳୁଛି । ରାଜ୍ୟ ସରକାର ବି କୌଣସି ପ୍ରସଙ୍ଗ ସମାଧାନ କରିବା ପାଇଁ ଉଦ୍ୟମ କରୁଥିବା ଦେଖିବାକୁ ମିଳୁ ନଥିବା ଅଭିଯୋଗ ହୋଇଛି ।