ଶୂନ୍ୟକାଳରେ ମାହାଙ୍ଗା ପ୍ରସଙ୍ଗ ଉଠାଇଲା ବିଜେଡି

ଭୁବନେଶ୍ୱର: ବିଧାନସଭା ଶୂନ୍ୟକାଳରେ ମାହାଙ୍ଗା ପ୍ରସଙ୍ଗ ଉଠାଇଲେ ବିଜେଡି ବିଧାୟକ ଅରୁଣ ସାହୁ । ଶାନ୍ତିପୂର୍ଣ୍ଣ ଭାବେ ଆନ୍ଦୋଳନ କରୁଥିବା PRI ସଦସ୍ୟଙ୍କୁ ମାଡ଼ ମରାଗଲା । DSP ବି ମାଡ଼ ଖାଇଲେ । ତାଙ୍କ ମୁଣ୍ଡ ଓ ଆଖି ଫାଟିଲା । ସ୍ଥାନୀୟ ବିଧାୟକଙ୍କ ସମର୍ଥକମାନେ ସରକାରୀ ଗୁଣ୍ଡା ସାଜି ମାଡ ମାରିଲେ । ପୋଲିସର ମନୋବଳ ଭାଙ୍ଗିଲାଣି । ଆଇନଶୃଙ୍ଖଳା ଭୁଶୁଡିଛି । ସୁରକ୍ଷା ଦିଆଯାଉ ବୋଲି ଗୃହରେ ନିବେଦନ କରିଛନ୍ତି ବିଜେଡି ବିଧାୟକ ଅରୁଣ ସାହୁ।

ଆହୁରି ମଧ୍ୟ କହିଛନ୍ତି, ମାହାଙ୍ଗାରେ ଯଦି ଦୁର୍ନୀତି ହେଉଛି ତେବେ ଦୁର୍ନୀତିଗ୍ରସ୍ତଙ୍କୁ ସରକାର ବାନ୍ଧନ୍ତୁ। କିନ୍ତୁ କାମ ଯଦି ହେଉଛି ବିଲ୍ ଦିଆଯାଉ । ହିମାଳୟ ଭଳି ବଡ଼ ବଜେଟ ଆଣିଲେ କଣ ହେବ ? ବଜେଟ ଖର୍ଚ୍ଚ କରିପାରୁନାହାଁନ୍ତି ସରକାର । ବିଧାୟକ କହିଲେ, ଯଦି ଦୁର୍ନୀତି ହୋଇଛି ତେବେ ଗୋଡ଼଼ ଉପରକୁ କରିକି ବାଡ଼ାଅ । ଏପରି ବୟାନ କେତେ ଯୁକ୍ତିଯୁକ୍ତ ବୋଲି ପ୍ରଶ୍ନ କରିଛନ୍ତି ଅରୁଣ । ରାଜ୍ୟରେ ଆଇନଶୃଙ୍ଖଳା ବିଗିଡି ଗଲାଣି । ସବୁ ପଞ୍ଚାୟତରେ କାମ ବନ୍ଦ । ଯଦି କାମ ବନ୍ଦ ଅଛି, ତେବେ ଖର୍ଚ୍ଚ କେତେବେଳେ କରିବେ ବୋଲି ପଚାରି ଅରୁଣ ବାଚସ୍ପତିଙ୍କ ନିର୍ଦ୍ଦେଶ ଦାବି କରିଥିଲେ । ମାର୍ଚ୍ଚ ୩୧ ସୁଦ୍ଧା ଗତ ବଜେଟ ଖର୍ଚ୍ଚ କରନ୍ତୁ ସରକାର । ଯେଉଁମାନେ ଶାନ୍ତିପୂର୍ଣ୍ଣ ଭାବେ ଆନ୍ଦୋଳନ କରୁଛନ୍ତି, ସେମାନଙ୍କୁ ସରକାର ସୁରକ୍ଷା ଦିଅନ୍ତୁ । ପୋଲିସର ମନୋବଳ ଭାଙ୍ଗି ଦିଅନ୍ତୁ ନାହିଁ ।