ଓଡ଼ିଆ ପୁଅ ଆନ୍ଧ୍ରରେ ଟପ୍ପର, ୬୦୦ ମାର୍କରୁ ୫୯୪ ମାର୍କ ରଖିଲେ ଓଡ଼ିଆ ପୁଅ ମିଟୁ ମହାପାତ୍ର
1 min read
ଗଜପତି: ଓଡ଼ିଆ ପୁଅ ଆନ୍ଧ୍ରରେ ଟପ୍ପର। ଚଳିତ CBSE ଫଳାଫଳରେ ଏହି କୃତିତ୍ବ ହାସଲ କରିଛନ୍ତି ଆନ୍ଧ୍ରରେ ରହୁଥିବା ଓଡ଼ିଆ ପରିବାରର ମିଟୁ ମହାପାତ୍ର। ଓଡ଼ିଶା ସୀମାବର୍ତ୍ତୀ ଆନ୍ଧ୍ର ପ୍ରଦେଶର ପୁରୁଣା ପାଟଣା ସରକାରୀ ଉଚ୍ଚ ବିଦ୍ୟାଳୟରୁ ଓଡ଼ିଆ ମାଧ୍ୟମରେ ଦଶମ ଶ୍ରେଣୀରେ ପଢୁଥିଲେ ମିଟୁ। ଜଣେ ଗରିବ ପରିବାରର ପୁଅ ହୋଇ ସୁଦ୍ଧା ଅନ୍ୟମାନଙ୍କୁ ପଛରେ ପକାଇ ମୋଟ ୬୦୦ ମାର୍କ ରୁ ୫୯୪ ମାର୍କ ରଖି ଆନ୍ଧ୍ର ପ୍ରଦେଶର ଟପ୍ପର ଭାବେ ବିବେଚିତ ହୋଇଛନ୍ତି ।
ଓଡ଼ିଶା ସୀମାବର୍ତ୍ତୀ ଆନ୍ଧ୍ର ପ୍ରଦେଶର ପୁରୁଣା ପାଟଣାଠାରେ ରହନ୍ତି ମିଟୁର ପରିବାର। ସେଠାରେ ଏକ ସାଇକେଲ ଟାୟାର ମରାମତି ଦୋକାନ କରି ଗୁଜୁରାଣ ମେଣ୍ଟାଇଥାନ୍ତି ବାପା ଦୁର୍ଗା ପ୍ରସାଦ ମହାପାତ୍ର । ପରିବାରର ଆର୍ଥିକ ସ୍ଥିତିରେ ସ୍ବଚ୍ଛଳତା ନଥିବା ସତ୍ତ୍ୱେ ନିଜର ମେଧାବୀ ତଥା ଅଧ୍ୟବସାୟ ବଳରେ ପାଠ ପଢ଼ି ଏହି ସଫଳତା ହାସଲ କରିଛନ୍ତି ମିଟୁ। ସେଥିପାଇଁ ଆନ୍ଧ୍ର ପ୍ରଦେଶର ଶିକ୍ଷା ବିଭାଗ ପକ୍ଷରୁ ସମ୍ମାନିତ ହୋଇଛନ୍ତି । ତାଙ୍କର ଏହି ସଫଳତାର ଖବର ପ୍ରସାରିତ ହେବା ପରେ ସୀମାବର୍ତ୍ତୀ ଓଡ଼ିଶାର ବିଭିନ୍ନ ସ୍ଥାନରୁ ଶୁଭେଚ୍ଛାର ସୁଅ ଛୁଟିଛି। ଜଣେ ଓଡ଼ିଆ ପୁଅର ଏହି ସଫଳତା ପାଇଁ ଆନ୍ଧ୍ରରେ ରହୁଥିଲେ ମଧ୍ୟ କେଉଁଠି ନା କେଉଁଠି ଓଡ଼ିଆ ପୁଅ ବୋଲି ଗର୍ବିତ ହେଉଛନ୍ତି ଅଞ୍ଚଳର ଓଡ଼ିଆ ଲୋକେ।
