୮ ମାସ ହେଲା ହଲ୍ ବନ୍ଦ, ଓ୍ୱେବ୍ ସିରିଜ୍ ପାଇଁ ମନ ବଳାଇଲେଣି ପ୍ରଯୋଜକ
ଭୁବନେଶ୍ୱର: କରୋନା ଯୋଗୁଁ ପ୍ରଭାବିତ ପୁରା ଓଲିଉଡ୍ ଜଗତ । ୮ ମାସ ପରେ ବି ପ୍ରେକ୍ଷାଳୟରେ ଝୁଲୁଛି ତାଲା । ମୁକ୍ତିଲାଭ ଅପେକ୍ଷାରେ ୧୦ରୁ ଅଧିକ ଓଡ଼ିଆ ଚଳଚ୍ଚିତ୍ର । ତେବେ କରୋନା ପାଇଁ ଅଚଳ ହୋଇପଡ଼ିଥିବା ଓଲିଉଡ ଏବଂ ମହାମାରୀ ପ୍ରକୋପ କମିବା ପରେ ଧିରେ ଧିରେ ଅଣ୍ଟା ସଳଖିବାକୁ ଚେଷ୍ଟା କରୁଛି ।
ଫିଲ୍ମ ପ୍ରସ୍ତୁତ ହୋଇସାରିଥିଲେ ମଧ୍ୟ ପ୍ରେକ୍ଷାଳୟ ବନ୍ଦ ପଡ଼ିଥିବାରୁ ମୁକ୍ତିଲାଭ କରିପାରୁ ନାହିଁ । ଏଥିପାଇଁ ଚିନ୍ତାରେ ପଡ଼ିଛନ୍ତି ଫିଲ୍ମ ନିର୍ମାତା ଓ ନିର୍ଦ୍ଦେଶକ । କରୋନା ମହାମାରୀ ସେମାନଙ୍କ ଆର୍ଥିକ ମାନଦଣ୍ଡ ଦୋହଲାଇ ଦେଇଛି । କଟକଣା ଭିତରେ ହଲ ଗୁଡିକୁ ଖୋଲିବାକୁ ଅନୁମତି ମିଳିବା ପରେ କିଛିଟା ଆଶା ସଞ୍ଚାର ହୋଇଛି । ଆଗକୁ ସିନେ ଇଣ୍ଡଷ୍ଟ୍ରିରେ ପୁଣି ପୂର୍ବାବସ୍ଥା ଫେରିବ ବୋଲି କହିଛନ୍ତି ସିନେ ସମୀକ୍ଷକମାନେ ।
ହଲେ ଏହାରି ମଧ୍ୟରେ କରୋନା କଟକଣା କିଛି ମାତ୍ରାରେ କୋହଳ ହୋଇଥିବାରୁ କିଛି ଫିଲ୍ମ ପ୍ରଯୋଜକ ଓ ନିର୍ଦ୍ଦେଶକ ସର୍ଟ ଫିଲ୍ମ ପ୍ରସ୍ତୁତ କରିବା ପାଇଁ ମନ ବଳାଇଛନ୍ତି । ସର୍ଟ ଫିଲ୍ମ ନିର୍ମାଣ ଏବଂ ଓ୍ୱେବ୍ ସିରିଜ୍ ପାଇଁ ଅନେକ ପ୍ରସ୍ତୁତି ଆରମ୍ଭ କରିସାରିଲେଣି । ଆଉ କିଛି ଓଲିଉଡ୍ ନିର୍ଦ୍ଦେଶକ ଓ ପ୍ରଯୋଜକ ନୂଆ ଫିଲ୍ମର ମହୁରତ କରିବା ପାଇଁ ଆରମ୍ଭ କରୁଛନ୍ତି । ତେବେ ୨୦୨୧ ପରେ ସ୍ଥିତିରେ ସୁଧାର ଆସିବ ବୋଲି ପ୍ରଯୋଜକମାନେ ଆଶା ରଖିଛନ୍ତି ।
