ଜାତୀୟ ସ୍ତରରେ ଚମକିଲେ ଓଡ଼ିଆ ଝିଅ ପାୟଲ: ପାରା ଆଥଲେଟରେ ଜିତିଲେ ଦୁଇଟି ସ୍ବର୍ଣ୍ଣ ପଦକ

ବଲାଙ୍ଗିର: ଜାତୀୟ ପାରା ଆଥଲେଟରେ ଚମକିଲେ ଓଡ଼ିଆ ଝିଅ। ବଲାଙ୍ଗୀର ଝିଅ ପାୟଲ ନାଗ ଦୁଇଟି ସ୍ଵର୍ଣ୍ଣ ପଦକ ହାସଲ କରିଛନ୍ତି। ଜାତୀୟ ପାରା ଆଥଲେଟରେ ମେଡାଲ ହାସଲ କରି ବଲାଙ୍ଗୀର ସହ ରାଜ୍ୟ ପାଇଁ ଗୌରବ ଅର୍ଜନ କରିଛନ୍ତି ପାୟଲ। ରାଜସ୍ଥାନ ଜୟପୁରରେ ଅନୁଷ୍ଠିତ ଜାତୀୟ ପାରା ତୀରନ୍ଦାଜୀ ଚାମ୍ପିଅନସିପ ମହିଳା ଇଭେଣ୍ଟରେ ଦୁଇଟି ସ୍ଵର୍ଣ୍ଣପଦକ ହାସଲ କରିଛନ୍ତି ପାୟଲ ନାଗ । ଏକଦା ବାପା-ମାଆଙ୍କ ସହ ବାହାର ରାଜ୍ୟକୁ ଦାଦନ ଖଟିବାକୁ ଯାଇ ଉଚ୍ଚ ଶକ୍ତିସମ୍ପନ୍ନ ବିଦ୍ୟୁତ୍ ତାର ସଂସ୍ପର୍ଶରେ ଆସି ହାତ ଗୋଡ ହରାଇଥିଲେ । ସେତେବେଳେ ପାୟଲଙ୍କୁ ସହାୟ ହୋଇଥିଲେ ପୂର୍ବତନ ମୁଖ୍ୟମନ୍ତ୍ରୀ ତଥା ବିରୋଧୀ ଦଳ ନେତା ନବୀନ ପଟ୍ଟନାୟକ। ପାୟଲଙ୍କ ସମସ୍ତ ଚିକିତ୍ସା ଖର୍ଚ୍ଚ ବହନ କରିଥିଲେ । ପାୟଲଙ୍କ କୃତ୍ରିମ ହାତ ଗୋଡ଼ ଲଗାଇବା ସହ ସମସ୍ତ ପ୍ରକାର ସହଯୋଗ ଯୋଗାଇ ଦେବାକୁ ବଲାଙ୍ଗୀରର ତତ୍କାଳୀନ ଜିଲ୍ଲାପାଳ ଚଞ୍ଚଳ ରାଣାଙ୍କୁ ନିର୍ଦ୍ଦେଶ ଦେଇଥିଲେ । ନବୀନ ପଟ୍ଟନାୟକଙ୍କ ନିର୍ଦ୍ଦେଶରେ ତତ୍କାଳୀନ ଜିଲ୍ଲାପାଳ ପାୟଲଙ୍କୁ ସମସ୍ତ ପ୍ରକାର ସହଯୋଗ କରିବା ସହ ତୀରନ୍ଦାଜୀ ଖେଳିବାକୁ ପ୍ରବର୍ତ୍ତାଇଥିଲେ ।

ବଲାଙ୍ଗୀରର ଜିଲ୍ଲା ପ୍ରଶାସନ ସହଯୋଗରେ ପାୟଲ ପଥରଚେପା ବାଳନିକେତନରେ ରହି ତୀରନ୍ଦାଜୀ ପ୍ରଶିକ୍ଷଣ ନେଇଥିଲେ । ବାଲ୍ ନିକେତନରେ ରହିବା ସମୟରେ ପାୟଲର ଅଦ୍ଭୂତ ପ୍ରତିଭା ଦେଖି ତତ୍କାଳୀନ ଜିଲ୍ଲାପାଳ ଚଞ୍ଚଳ ରାଣା ପାୟଲକୁ ଜାତୀୟସ୍ତରରେ ଖେଳିବା ପାଇଁ ଜାମ୍ମୁ କାଶ୍ମୀର ପ୍ରଶିକ୍ଷଣ ପାଇଁ ପଠାଇଥିଲେ । 2023ରୁ ପାୟଲ ଜାମ୍ମୁ କାଶ୍ମୀରର କଟ୍ରା ଠାରେ ତୀରନ୍ଦାଜୀ ତାଲିମ୍ କେନ୍ଦ୍ରରେ ତାଲିମ୍ ଗ୍ରହଣ କରୁଛନ୍ତି । ପାୟଲଙ୍କ ଘର ବଲାଙ୍ଗୀର ଜିଲ୍ଲା ମୁରିବାହାଲ ବ୍ଲକ ଅନ୍ତର୍ଗତ ଯମୁନାବାହାଲ ଗ୍ରାମରେ । ବାପା ବିଜୟ ନାଗ ଓ ମା ଜନତା ନାଗ ୨୦୧୫ରେ ଦାଦନ ଖଟିବାକୁ ରାୟପୁରକୁ ଯାଇଥିଲେ । ସେତେବେଳେ ପାୟଲଙ୍କ 8 ବର୍ଷ ହୋଇଥିଲା । ବାପାମାଆ ଏକ କୋଠାରେ କାମ କରୁଥିବା ସମୟରେ ସେହି କୋଠା ଉପର ଦେଇ ଯାଇଥିବା ଏକ ହାଇଭୋଲଟେଜ୍ ବିଦ୍ୟୁତ ତାର ସଂସ୍ପର୍ଶରେ ଆସିଥିଲେ ପାୟଲ। ହସ୍ପିଟାଲରେ ଚିକିତ୍ସା ହୋଇ ସୁସ୍ଥ ହୋଇଥିଲେ ମଧ୍ୟ ପାୟଲ ଦୁଇ ହାତ ଓ ଗୋଡ ହରାଇଛନ୍ତି। ଆଜି ସେଦିନର ଦାଦନ ଶିଶୁ ଜାତୀୟସ୍ତର ତୀରନ୍ଦାଜୀ ପ୍ରତିଯୋଗିତାରେ ଦୁଇଟି ସ୍ଵର୍ଣ୍ଣ ପଦକ ହାସଲ କରି ରାଜ୍ୟ ତଥା ଦେଶ ପାଇଁ ଗୌରବ ଆଣିଛନ୍ତି । ପାୟଲ ଖାଲି ଖେଳରେ ପ୍ରତିଭା ରହିନାହିଁ ପାଟିରେ ତୁଳୀ ଧରି ଚିତ୍ର ମଧ୍ୟ ଆଙ୍କି ପାରୁଛନ୍ତି।