ସ୍ନାନଯାତ୍ରା: ମିଳିଲାନି ପ୍ରତ୍ୟକ୍ଷ ଦର୍ଶନ, ପୂରିଲାନି ଭକ୍ତଙ୍କ ମନ

ଶେଷ ହେଲା ସ୍ନ।ନଯାତ୍ରା । କିନ୍ତୁ ଭକ୍ତ ମନ ଉଣା । ପ୍ରତ୍ୟକ୍ଷ ଦର୍ଶନ ମିଳିଲା ନାହିଁ । ପାଖରୁ ସାହାଣମେଲା ଦର୍ଶନ ତ ଦୂରର କଥା, ବଡ଼ଦାଣ୍ଡକୁ ବି ଯାଇ ହେଲାନି । କରୋନା କଟକଣା ପାଇଁ ଦୀର୍ଘଦିନ ହେଲା ଶ୍ରୀମନ୍ଦିର ବନ୍ଦ ଅଛି । ଆଶା ଥିଲା, ବଡ଼ଦାଣ୍ଡରେ ଛିଡ଼ା ହୋଇ ହାତୀବେଶ ଦର୍ଶନ କରିବେ । କିନ୍ତୁ ସେତକ ହୋଇ ନଥିବାରୁ ଭକ୍ତ ହତାଶ ହୋଇଛନ୍ତି । କେବଳ ଘରେ ବସି ଟିଭିରେ ଦେଖିକରି ଭାବବିହ୍ୱଳ ହୋଇଛନ୍ତି, ଅଭିମାନଭରା ଗୁହାରି କରିଛନ୍ତି ।

ଟେଲିଭିଜନ ପରଦାରେ କାଳିଆର ସ୍ନ।ନନୀତି ଦେଖି ମନ ସନ୍ତୁଷ୍ଟ ହେଉନାହିଁ । ଇଚ୍ଛା ହେଉଛି ବଡ଼ଦାଣ୍ଡରେ ସାଆନ୍ତଙ୍କ ସାମ୍ନାରେ ଟିକେ ନୃତ୍ୟ ପରିବେଷଣ କରନ୍ତେ । ନୃତ୍ୟଶିଳ୍ପି ରୂପଶ୍ରୀ ମହାପାତ୍ର ବିଭିନ୍ନ ବର୍ଷ ବଡ଼ଦାଣ୍ଡରେ ଶ୍ରୀଜିଉଙ୍କ ସାମ୍ନାରେ ନାଚିନାଚି ଭକ୍ତି ନିବେଦନ କରନ୍ତି । କିନ୍ତୁ ଏବର୍ଷ କରୋନା କଟକଣା ଯୋଗୁ ବନ୍ଦ । ରୂପଶ୍ରୀଙ୍କ ମନରେ ଅବସୋସ । ଟିଭି ପରଦାରେ ଚକାଆଖି ସହ ଆଖି ମିଶାଲେ ଆଖିରେ ଲୁହ ଆସିଯାଉଛି ।  କେବଳ ରୂପଶ୍ରୀ ନୁହନ୍ତି, ଏବର୍ଷ କୈାଣସି ସାଧାରଣ ଲୋକ ସିଧାସଳଖ ବିଶ୍ୱନିୟନ୍ତାଙ୍କ ମାନବୀୟ ଲୀଳା- ସ୍ନ।ନନୀତି ଦର୍ଶନ କରିପାରିନାହାନ୍ତି । ଜନଶୂନ୍ୟ ଥିଲା ବଡ଼ଦାଣ୍ଡ । ଏପରିକି ପୁରୀ ସହରର ଲୋକ ବି ୧୪୪ ଧାରା ଓ କୋଭିଡ୍‌ କଟକଣା ଯୋଗୁ ବଡ଼ଦାଣ୍ଡକୁ ଯାଇ ପାରିନଥିଲେ । ସମସ୍ତଙ୍କ ମନରେ କ୍ଷୋଭ । ପ୍ରଶାସନ ଇଚ୍ଛା କରିଥିଲେ ସାମାଜିକ ଦୂରତା ବଜାୟ ରଖି ଦୂରରୁ ଦର୍ଶନ ବ୍ୟବସ୍ଥା କରିପାରିଥାନ୍ତା ବୋଲି ଭକ୍ତ କହିଛନ୍ତି । ଜୁନ୍‌ ୩୦ପର୍ଯ୍ୟନ୍ତ ଶ୍ରୀମନ୍ଦିର ବନ୍ଦ ରହିବ । ତାପରେ ମିଳିବ ଠାକୁରଙ୍କ ଦର୍ଶନ । ସେ ପର୍ଯ୍ୟନ୍ତ ଭକ୍ତଙ୍କ ଅପେକ୍ଷା ।