ଭୁବନେଶ୍ବର : ଆଜିଠୁ ଅଚଳ ହୋଇଯିବ ନର୍ସିଂ ସେବା । ସାରା ରାଜ୍ଯରେ ଆଜିଠୁ ନର୍ସଙ୍କ କାର୍ଯ୍ଯବନ୍ଦ ଆନ୍ଦୋଳନ । ଗତ ଦୁଇଦିନ ଆନ୍ଦୋଳନ କରିଥିଲେ ବି ଜରୁରୀକାଳୀନ ସେବା ଯୋଗାଉଥିଲେ ନର୍ସ । ହେଲେ ସରକାର ଦାବି ନଶୁଣିବାରୁ ଆଜିଠୁ ସମ୍ପୂର୍ଣ୍ଣ କାର୍ଯ୍ଯବନ୍ଦ ଆନ୍ଦୋଳନ କରୁଛନ୍ତି । ବିକ୍ଷୋଭରେ ପ୍ରାୟ ୧୫ ହଜାର ନର୍ସ ସାମିଲ ହୋଇଛନ୍ତି । ୧୦ ଦଫା ଦାବି ନେଇ ନର୍ସିଂ ସଂଘ ସରକାରଙ୍କୁ ପୂର୍ବରୁ ମାସେ ସମୟ ସୀମା ଦେଇଥିଲା । ମାତ୍ର କୌଣସି ପଦକ୍ଷେପ ନିଆଗଲା ନାହିଁ । ଏହାପରେ ନର୍ସିଂ ସଂଘ ଗତ ବୁଧବାରଠୁ ଆନ୍ଦୋଳନକୁ ଓହ୍ଲାଇଛି । ନର୍ସମାନେ ପ୍ରଥମ ଦୁଇଦିନ ଓପିଡି ସେବା ବନ୍ଦ କରି କେବଳ ଜରୁରୀକାଳୀନ ସେବା ଯୋଗାଇଥିଲେ । ଦୁଇଦିନରେ ଦାବି ପୂରଣ ନହେଲେ କାର୍ଯ୍ଯବନ୍ଦ ଆନ୍ଦୋଳନ ପାଇଁ ଧମକ ଦେଇଥିଲେ । ହେଲେ ଏକାଧିକ ଥର ସରକାରଙ୍କ ସହ ଆଲୋଚନା ବିଫଳ ହୋଇଥିଲା । ନର୍ସଙ୍କ କାର୍ଯ୍ଯବନ୍ଦ ଆନ୍ଦୋଳନ ଫଳରେ ରାଜ୍ଯରେ ରୋଗୀସେବା ଗୁରୁତର ଭାବେ ପ୍ରଭାବିତ ହୋଇଛି । ତୁରନ୍ତ ଆପୋଶ ବୁଝାବଣାରେ ମାମଲାର ସମାଧାନ ପାଇଁ ଗତକାଲି ହାଇକୋର୍ଟ ସରକାରଙ୍କୁ ନିର୍ଦ୍ଦେଶ ଦେଇଥିଲେ । ୨୦୧୩ ପୂର୍ବରୁ ନିଯୁକ୍ତି ପାଇଥିବା ନର୍ସିଂ ଅଫିସର ମାନଙ୍କର ୬ ବର୍ଷ ଚୁକ୍ତି ଭିତ୍ତିକ ଅବଧିକୁ ମୂଳ ଚାକିରି ସୀମାରେ ମିଶାଇ ପଦୋନ୍ନତି ସହ ସମସ୍ତ ଆର୍ଥିକ ସହାୟତା ଦାବି କରିଛି ସଂଘ । ଏହାସହ ବରିଷ୍ଠତା ଭିତ୍ତିରେ ପଦୋନ୍ନତି, CHO ପଦବୀରୁ ଫେରାଇ ଆଣି କ୍ୟାଡ଼ର ପୋଷ୍ଟ, ମେରୁଦଣ୍ଡ ଆଘାତ ଚିକିତ୍ସା କେନ୍ଦ୍ର ନର୍ସିଂ ଅଫିସର ମାନଙ୍କୁ ସ୍ଥାୟୀ, ଠିକା ସଂସ୍ଥା ଦ୍ୱାରା ନର୍ସିଂ ଅଫିସର ନିୟୋଜନ ହୋଇଥିବା ଆଦେଶ ପ୍ରତିହାର ପରି ୧୦ ଦଫା ଦାବି ନେଇ ଆନ୍ଦୋଳନକୁ ଓହ୍ଲାଇଛି ନର୍ସି କର୍ମଚାରୀ ସଂଘ ।
