ପୁରୀରେ NSG ଟିମ୍, ଡ୍ରୋନ୍ ଉଡ଼ାଇ କଲା ଶ୍ରୀମନ୍ଦିରର ସୁରକ୍ଷା ଯାଞ୍ଚ
1 min read
ପୁରୀ: ଶ୍ରୀକ୍ଷେତ୍ରରେ ଶ୍ରୀମନ୍ଦିରର ସୁରକ୍ଷା ବ୍ୟବସ୍ଥାର ଯାଞ୍ଚ କରିଛି ଏନ୍ଏସ୍ଜି ଟିମ୍ । ଆଗକୁ ରାଷ୍ଟ୍ରପତି ରାମନାଥ କୋବିନ୍ଦଙ୍କ ଶ୍ରୀମନ୍ଦିର ଗସ୍ତ ରହିଥିବା ବେଳେ NSG ଟିମ୍ ସୁରକ୍ଷା ଯାଞ୍ଚ କରିଛି । ଡ୍ରୋନ ଉଡ଼ାଇ ଆକାଶ ମାର୍ଗରୁ ସୁରକ୍ଷାର ଯାଞ୍ଚ କରିବା ସହ ଶ୍ରୀମନ୍ଦିର ଚାରିପଟ ବୁଲି ସ୍ଥିତି ଅନୁଧ୍ୟାନ କରିଛି ଏହି ଟିମ୍ ।
ବୁଧବାର ପୁରୀ ଶ୍ରୀମନ୍ଦିରର ସୁରକ୍ଷା ବ୍ୟବସ୍ଥା ଯାଞ୍ଚ ପାଇଁ NSGର ୩ ଜଣିଆ ଟିମ ଶ୍ରୀମନ୍ଦିର ଚତୁପାର୍ଶ୍ଵ ଏବଂ ଚେକିଂ ପଏଣ୍ଟ ବୁଲି ଦେଖିଥିଲେ । ଏହା ସହ ଶ୍ରୀମନ୍ଦିର ସୁରକ୍ଷା ବ୍ୟବସ୍ଥାରେ କିପରି ଆହୁରି ସୁଧାର ଅଣାଯାଇପାରିବ ସେ ନେଇ ସମୀକ୍ଷା କରିଥିଲେ । ଚାରି ଧାମ ମଧ୍ୟରୁ ଶ୍ରୀକ୍ଷେତ୍ର ଅନ୍ୟତମ ଧାମ ହୋଇଥିବାରୁ ସଦା ସର୍ବଦା ଆତଙ୍କବାଦୀଙ୍କ ନଜରରେ ରହି ଆସିଛି ।
ଏହାର ସୁରକ୍ଷାକୁ କଡାକଡି କରିବା ଲାଗି NSG ପକ୍ଷରୁ ଶ୍ରୀମନ୍ଦିରର ସମସ୍ତ ସୁରକ୍ଷା ବ୍ୟବସ୍ଥାକୁ ତନଖି କରାଯାଇଛି । ସେପଟେ ରାଷ୍ଟ୍ରପତିଙ୍କ ଗସ୍ତକୁ ନଜରରେ ରଖି ଶ୍ରୀମନ୍ଦିରରେ କରାଯିବ ତ୍ରିସ୍ତରୀୟ ସୁରକ୍ଷା ବ୍ୟବସ୍ଥା । ପୁରୀ ଏସପି ସୁରକ୍ଷା ବ୍ୟବସ୍ଥା ଯାଞ୍ଚ କରିବା ବେଳେ ବ୍ଲୁ-ବୁକ ଅନୁସାରେ ସୁରକ୍ଷା ବ୍ୟବସ୍ଥା କରାଯିବ ବୋଲି ସୂଚନା ଦେଇଛନ୍ତି । ତେବେ ବୁଧବାର ଏନ୍ଏସଜି ଟିମ୍ ଭୁବନେଶ୍ୱର ଲିଙ୍ଗରାଜ ମନ୍ଦିର ଓ କୋଣାର୍କ ମନ୍ଦିରର ମଧ୍ୟ ସୁରକ୍ଷା ଯାଞ୍ଚ କରିଥିଲେ ।
