ପୁରୀ: ଶ୍ରୀକ୍ଷେତ୍ରରେ ଶ୍ରୀମନ୍ଦିରର ଯାଞ୍ଚ ପାଇଁ ପହଞ୍ଚିଲା NSG ଟିମ୍। ଶ୍ରୀମନ୍ଦିର ସୁରକ୍ଷା ବ୍ୟବସ୍ଥାକୁ ଯାଞ୍ଚ କରିବ ଏହି ଟିମ୍। ଆଗକୁ ରାଷ୍ଟ୍ରପତି ରାମନାଥ କୋବିନ୍ଦଙ୍କ ଶ୍ରୀମନ୍ଦିର ଗସ୍ତ ରହିଥିବା ବେଳେ NSG ଟିମ୍ ସୁରକ୍ଷା ଯାଞ୍ଚ କଡାକଡ଼ି କରିବ। ଶ୍ରୀମନ୍ଦିର ଚାରିପଟ ବୁଲି ସ୍ଥିତି ଅନୁଧ୍ୟାନ କରିଛି ଏହି ଟିମ୍। ପୁରୀ ଶ୍ରୀମନ୍ଦିର ସୁରକ୍ଷା ବ୍ୟବସ୍ଥା ଯାଞ୍ଚ ପାଇଁ NSGର ୩ ଜଣିଆ ଟିମ୍ ଶ୍ରୀମନ୍ଦିର ଚତୁର୍ପାର୍ଶ୍ଵ ଏବଂ ଚେକିଂ ପଏଣ୍ଟ ବୁଲି ଦେଖିଥିଲେ। ଏହା ସହ ଶ୍ରୀମନ୍ଦିର ସୁରକ୍ଷା ବ୍ୟବସ୍ଥାରେ କିପରି ଆହୁରି ସୁଧାର ଅଣାଯାଇପାରିବ ସେ ନେଇ ସମୀକ୍ଷା କରିଥିଲେ। ଚାରି ଧାମ ମଧ୍ୟରୁ ଶ୍ରୀକ୍ଷେତ୍ର ଅନ୍ୟତମ ଧାମ ହୋଇଥିବାରୁ ସଦା ସର୍ବଦା ଆତଙ୍କବାଦୀଙ୍କ ନଜରରେ ରହି ଆସିଛି। ଏହାର ସୁରକ୍ଷାକୁ କଡାକଡି କରିବା ଲାଗି NSG ପକ୍ଷରୁ ଶ୍ରୀମନ୍ଦିର ସମସ୍ତ ସୁରକ୍ଷା ବ୍ୟବସ୍ଥାକୁ ତନଖି କରାଯାଇଛି।
