ମାସକରେ ୭ଟି ବାଲିଷ୍ଟିକ ମିସାଇଲର ପରୀକ୍ଷଣ କଲାଣି ଉତ୍ତର କୋରିଆ

ନୂଆଦିଲ୍ଲୀ: ଦୁନିଆକୁ ଡରାଉଛି ଉତ୍ତର କୋରିଆ । ମାସକରେ ଉତ୍ତର କୋରିଆ ୭ଟି ମିସାଇଲର ପରୀକ୍ଷଣ କରିଛି । ତେବେ ଉତ୍ତର କୋରିଆ କେଉଁ ମିସାଇଲର ପରୀକ୍ଷଣ କରିଛି ତାହା କାହାରିକୁ ଜଣାନାହିଁ । କିନ୍ତୁ ଉତ୍ତର କୋରିଆ ମିସାଇଲ ପରୀକ୍ଷଣ କରିଥିବା ସୂଚନା ଦେଇଛି ପଡ଼ୋଶୀ ଦକ୍ଷିଣ କୋରିଆ । ଗୋଟିଏ ମାସରେ ଲଗାତାର ୭ଟି ମିସାଇଲ୍ ପରୀକ୍ଷଣ କରି ଅନ୍ତର୍ଜାତୀୟ ଶାନ୍ତି ପ୍ରତି କିମ୍ ଜୋଙ୍ଗ ଉନ୍ ବିପଦ ସୃଷ୍ଟି କରିଛନ୍ତି ।

ଶେଷଥର ପାଇଁ ୨୦୧୯ରେ ଉତ୍ତର କୋରିଆ ଏମିତି ଗୋଟିଏ ମାସରେ ଏକାଧିକ ପରୀକ୍ଷଣ କରିଥିଲା । ସେତେବେଳେ ଉତ୍ତର କୋରିଆର କ୍ରୁର ଶାସକ କିମ୍ ଜୋଙ୍ଗ ଉନ୍ ଏବଂ ତତ୍କାଳୀନ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ମଧ୍ୟରେ ଉଚ୍ଚସ୍ତରୀୟ କଥାବାର୍ତ୍ତା ବିଫଳ ହୋଇଥିଲା । ସେବେଠୁ ଆମେରିକା ସହ କିମ୍ ଜୋଙ୍ଗଙ୍କ ଆଲୋଚନା ଅଟକି ରହିଛି ।

ଦକ୍ଷିଣ କୋରିଆ ଅନୁସାରେ, ଉତ୍ତର କୋରିଆ ପୂର୍ବ ସାଗର ଅର୍ଥାତ୍ ଜାପାନ ସାଗରରେ ଆଉ ଏକ ଅଜ୍ଞାତ ମିସାଇଲ୍ ଉତକ୍ଷେପଣ କରିଛି । ଉତ୍ତର କୋରିଆ ବାଲିଷ୍ଟିକ ମିସାଇଲ୍ ପରୀକ୍ଷଣ କରିଥିବା ଆଶଙ୍କା କରିଛି ଜାପାନ । ଦେଶ ଭୟଙ୍କର ଆର୍ଥିକ ସ୍ଥିତିର ସମ୍ମୁଖୀନ ହୋଇଥିବା ବେଳେ ଲଗାତାର ମିସାଇଲ୍ ପରୀକ୍ଷଣ କରିଛି । ଗତ ସପ୍ତାହରେ କିମ୍ ଜୋଙ୍ଗ ଉନ୍ ପରମାଣୁ ବିସ୍ଫୋଟକ ଓ ଦୂରଗାମୀ ମିସାଇଲ୍ ପରୀକ୍ଷଣ ନେଇ ଆମେରିକାକୁ ପରୋକ୍ଷ ଧମକ ଦେଇଥିଲେ ।

ଏତିକି ନୁହେଁ, କିମ୍ ଜୋଙ୍ଗ ଉନ୍ କିଛିଦିନ ତଳେ ଯୁଦ୍ଧ ସାମଗ୍ରୀ ସମ୍ବନ୍ଧିତ କାରଖାନାକୁ ବି ଯାଇଥିଲେ । ନୂଆ ଅସ୍ତ୍ରଶସ୍ତ୍ର ପରୀକ୍ଷଣ ନେଇ ସୂଚନା ଦେଇଥିଲେ । ଜାନୁଆରୀ ମାସରେ ଉତ୍ତର କୋରିଆ ଟାକ୍ଟିକଲ ଗାଇଡେଡ୍ ମିସାଇଲ୍, ହାଇପରସୋନିକ୍ ମିସାଇଲ୍ର ପରୀକ୍ଷଣ କରିଛି । ଗୁରୁବାର ଉତ୍ତର କୋରିଆ ୨ଟି ସନ୍ଦିଗ୍ଧ ମିସାଇଲ୍ ପରୀକ୍ଷଣ କରିଥିବା ଦକ୍ଷିଣ କୋରିଆ ସେନା କହିଛି । ଅଚାନକ ଉତ୍ତର କୋରିଆ ଏତେ ମାତ୍ରାରେ ଅସ୍ତ୍ରଶସ୍ତ୍ର ପରୀକ୍ଷଣ କରି ଆମେରିକା ଉପରେ ଚାପ ପକାଇବାକୁ ଚେଷ୍ଟା କରୁଥିବା କହିଛନ୍ତି ବିଶେଷଜ୍ଞ ।