ଓଭରସ୍ପିଡିଂର ସମସ୍ୟା ନଥିଲା, ସିଗନାଲିଂରେ ସମସ୍ୟା ଯୋଗୁ ଦୁର୍ଘଟଣା ଘଟିଛି: ରେଲୱେ ବୋର୍ଡ

ନନ୍ଦିଘୋଷ ବ୍ୟୁରୋ: ବାହାନଗା ଟ୍ରେନ ଟ୍ରାଜେଡି ନେଇ ରେଲଓ୍ବେ ବୋର୍ଡର ପ୍ରେସମିଟ । କବେଳ କରମଣ୍ଡଳ ଏକ୍ସପ୍ରେସ ଦୁର୍ଘଟଣାଗ୍ରସ୍ତ ହୋଇଥିଲା ବୋଲି ରେଲଓ୍ବେ ବୋର୍ଡ ପକ୍ଷରୁ କୁହାଯାଇଛି । ୧୨୮ କିମି ପ୍ରତି ଘଣ୍ଟା ବେଗରେ ଯାଉଥିଲା କରମଣ୍ଡଳ ଏକ୍ସପ୍ରେସ । ଲୁପ ଲାଇନରେ ଅଟକି ରହିଥିବା ମାଲବାହୀ ଟ୍ରେନକୁ ଧକ୍କା ଦେଇଥିଲା କରମଣ୍ଡଳ । ଲୁହା ବୋଝେଇ ମାଲବାହୀ ଟ୍ରେନ ଉପରେ କରମଣ୍ଡଳର ଇଞ୍ଜିନ ଓ କିଛି ବଗି ଚଢ଼ି ଯାଇଥିଲା । ଲୁହା ବୋଝେଇ ଥିବାରୁ ମାଲବାହୀ ଟ୍ରେନ ଘୁଞ୍ଚି ନଥିଲା ।

କରମଣ୍ଡଳ ଏକ୍ସପ୍ରେସର ବଗିଗୁଡ଼ିକ ଅତି ସୁରକ୍ଷିତ, ସହଜରେ ଏହା ଲାଇନଚ୍ୟୁତ ହୁଏନାହିଁ । ୧୨୮ କିମି ପ୍ରତି ଘଣ୍ଟା ସ୍ପିଡରେ ଟ୍ରେନ ଧକ୍କା ହେବା ପରେ ପୂରା ଇଫେକ୍ଟ କରମଣ୍ଡଳ ଉପରେ ପଡ଼ିବା ଯୋଗୁ ଏହାର ବଗିଗୁଡ଼ିକ ଲାଇନଚ୍ୟୁତ ହୋଇଥିଲା । କରମଣ୍ଡଳ ଏକ୍ସପ୍ରେସର ବଗି ଅନ୍ୟ ଟ୍ରାକରେ ପଡିଥିଲା । ଡାଉନ ମେନ ଲାଇନରେ ୧୨୬ କିଲୋମିଟର ପ୍ରତି ଘଣ୍ଟା ସ୍ପିଡରେ ଯାଉଥିବା ଯଶବନ୍ତପୁର ଏକ୍ସପ୍ରେସର ଶେଷ ଦୁଇଟି ବଗି ସହ କରମଣ୍ଡଳର ବଗି ପିଟି ହୋଇଥିଲା । ଫଳରେ ଯଶବନ୍ତପୁରର ଶେଷ ଦୁଇଟି ବଗି ଲାଇନଚ୍ୟୁତ ହୋଇଯାଇଥିଲା ।

ରେଲଓ୍ବେ ବୋର୍ଡ ପକ୍ଷରୁ କୁହାଯାଇଛି । ଦୁର୍ଘଟଣା ଘଟିବାର ୨୦ ମିନିଟ ମଧ୍ୟରେ ରେସ୍କ୍ୟୁ ଟିମ୍ ପହଞ୍ଚିଥିଲା । ଉଭୟ ଟ୍ରେନକୁ ଗ୍ରୀନ ସିଗନାଲ ମିଳିଥିଲା । ଓଭରସ୍ପିଡିଂର ସମସ୍ୟା ନଥିଲା, ସିଗନାଲିଂରେ ସମସ୍ୟ ଯୋଗୁ ଦୁର୍ଘଟଣା ଘଟିଥିବା ପ୍ରାଥମିକ ତଦନ୍ତ ରିପୋର୍ଟରୁ ଜଣାପଡ଼ିଛି । ରେଲଓ୍ବେ ସେଫ୍ଟି ବୋର୍ଡ କମିଶନର ତଦନ୍ତର ବିସ୍ତୃତ ରିପୋର୍ଟ ଦେବେ । ରେଲବାଇ ପକ୍ଷରୁ ହେଲ୍ପଲାଇନ ନମ୍ବର-୧୩୯ ଜାରି କରାଯାଇଛି ।