ସାର୍ବଜନୀନ ଦୁର୍ଗା ପୂଜା ଆୟୋଜନକୁ ନେଇ ବଢ଼ିଛି ଦ୍ୱନ୍ଦ୍ୱ, ହାଇକୋର୍ଟର ଦ୍ୱାରସ୍ଥ ପୂଜା କମିଟି…

କଟକ:(ଦୀପେଶ ମହାପାତ୍ର): କଟକରେ ସାର୍ବଜନୀନ ଦଶହରା ପୂଜା ଆୟୋଜନକୁ ନେଇ ବଢିଛି ଦ୍ୱନ୍ଦ୍ୱ । ଗଣେଷ ପୂଜାଠାରୁ ସମସ୍ତ ପୂଜା ମଣ୍ଡପରେ ମା’ ଦୁର୍ଗାଙ୍କ ମୃଣ୍ମୟୀ ମୃର୍ତ୍ତି ତିଆରି ଆରମ୍ଭ ହୋଇଥାଏ । ମାତ୍ର ପ୍ରଶାସନର କୌଣସି ସ୍ପଷ୍ଟ ନିଷ୍ପତ୍ତି ନ ଆସିଥିବାରୁ ସମସ୍ତ ପୂଜା ମଣ୍ଡପ ଖାଁ ଖାଁ ପଡିବା ସହିତ ତାଲା ଝୁଲୁଛି । ତେଣୁ ପୂଜା ଆୟୋଜନ ଲାଗି ହାଇକୋର୍ଟଙ୍କ ଦ୍ୱାରସ୍ଥ ହୋଇଛନ୍ତି କମିଟି । ସେପଟେ ସ୍ଥିତିକୁ ଦେଖି ସାର୍ବଜନୀନ ପୂଜା ଆୟୋଜନ ଅସମ୍ଭବ ବୋଲି କହିଛନ୍ତି ଜିଲ୍ଲାପାଳ ।

ମଣ୍ଡପ ପରିସର କେଉଁଠି ଖାଁ ଖାଁ ତ, କେଉଁଠି ଝୁଲୁଛି ତାଲା । ଏଭଳି ପରିସ୍ଥିତିରେ ପୂଜା ଅନୁମତି ଲାଗି ହାଇକୋର୍ଟଙ୍କ ଦ୍ୱାରସ୍ଥ ହୋଇଛନ୍ତି କଟକର ସର୍ବପୁରାତନ ପୂଜା ମଣ୍ଡପ ବାଲୁବଜାର ପୂଜା କମିଟି । ୫ଶହ ବର୍ଷର ପୂଜା ପରମ୍ପରା ଜାରି ରଖିବା ପାଇଁ ପ୍ରାର୍ଥନା କରାଯାଇଥିବା ବେଳେ କୋଭିଡ୍ କଟକଣା ମଧ୍ୟରେ ପୂଜା ଅନୁମତି ଦେବାକୁ ଆବେଦନ ହୋଇଛି । ଏଥିରେ ମୁଖ୍ୟଶାସନ ସଚିବ, ଗୃହ ସଚିବ, ପୋଲିସ କମିଶନର, ଜିଲ୍ଲାପାଳ ଓ ଡିସିପିଙ୍କୁ ପକ୍ଷଭୁକ୍ତ କରାଯାଇଛି ।

ଗଣେଷ ପୂଜା ନଚେତ ରାଧାଷ୍ଟମୀ ଦିନଠାରୁ ମାଆ ଦୁର୍ଗାଙ୍କ ମୂର୍ତ୍ତି ପ୍ରସ୍ତୁତି ଯୋରଦାର ହୋଇଥାଏ । ତିଥି ଅନୁସାରେ ମା’ଙ୍କ ଲାଗି ନଡ଼ା ବନ୍ଧାଠାରୁ ଖଡି ଲାଗି କାର୍ଯ୍ୟକ୍ରମ ହୋଇଥାଏ । ହେଲେ ଏପର୍ଯ୍ୟନ୍ତ ପ୍ରଶାସନ ପୂଜା ଆୟୋଜନ ନେଇ ସ୍ପଷ୍ଟ କରୁନଥିବା ବେଳେ ଦୋଛକିରେ ପଡ଼ିଯାଇଛନ୍ତି ପୂଜା କମିଟି କର୍ମକର୍ତ୍ତା । ତେବେ କୋଭିଡ୍‌ ପାଇଁ ମଣ୍ଡପରେ ସାର୍ବଜନୀନ ଦୁର୍ଗା ପୂଜା ସମ୍ଭବ ନୁହେଁ ବୋଲି ସ୍ପଷ୍ଟ କରିଛନ୍ତି କଟକ ଜିଲ୍ଲାପାଳ ।