ଜାତୀୟ ସ୍ତରର ଭଲିବଲ ଖେଳାଳି ଧନଞ୍ଜୟଙ୍କ ଚିକତ୍ସାରେ ଅର୍ଥ ସାଜିଛି ବାଧକ
ପାଟକୁରା: ଦାଉ ସାଧିଲା ରୋଗ । ଚିକତ୍ସା ପାଇଁ ଅର୍ଥ ବି ସାଜିଛି ବାଧକ । ଯକୃତ ରୋଗରେ ଆକ୍ରାନ୍ତ ହୋଇ ସହୟତା ଲୋଡୁଛନ୍ତି ଜାତୀୟ ସ୍ତରର ଭଲିବଲ ଖେଳାଳୀ ଧନଞ୍ଜୟ ଦାସ । ଭଳିବଲ କ୍ରୀଡାରେ ପାଇଥିଲେ ଅନେକ ସଫଳତା । ହେଲେ ଯୁବାବସ୍ଥାରେ ଯକୃତ ଜନିତ ରୋଗ ସତେ ଯେମିତି ମଉଳାଇ ଦେଇଛି ତାଙ୍କ ସବୁ ସ୍ବପ୍ନ । ଖେଳରେ ଅଗ୍ରଣୀ ହେବାର ଇଚ୍ଛା ସତେ ଯେପରି ଭାଙ୍ଗିଦେଇଛି ରୋଗ ।
ଦିନେ ଭଲିବଲ ଖେଳରେ ଦେଖାଉଥିଲେ ଚମତ୍କାର । ହେଲେ ଆଜି ସେ ଶଯ୍ୟାସାୟୀ । ପ୍ରତିଭାବାନ ଖେଳାଳି ଆଜି ହୋଇଯାଇଛି ନିଃସହାୟ । ଡେରାବିଶ କୁରୁଜଙ୍ଗା ପଞ୍ଚାୟତ ବଡ଼ ମଙ୍ଗରାଜପୁର ଗାଁର ଧନଞ୍ଜୟ ଦାସ ପିଲାଟି ଦିନରୁ ଭଳିବଲ ଖେଳ ପ୍ରତି ରୁଚି ରଖିଥିଲେ । କଠିନ ପରିଶ୍ରମ ବଳରେ ଓଡିଶା ଭଲିବଲ ଟିମ୍ ଓ ଅନ୍ୟାନ୍ୟ ନ୍ୟାସନାଲ ଭଳିବଲ କ୍ଲବ ତରଫରୁ ଜାତୀୟ ସ୍ତରରେ ସେ ଅନେକ ସଫଳତା ହାସଲ କରିଥିଲେ । ଏଥି ସହିତ ତାଙ୍କୁ ଏକ ସ୍କୁଲରେ ଖେଳ ଶିକ୍ଷକ ଭାବେ ମଧ୍ୟ ନିଯୁକ୍ତି ମିଳିଥିଲା । କିନ୍ତୁ ଛ ମାସ ତଳେ ତାଙ୍କ ସ୍ବାସ୍ଥ୍ୟ ଅବସ୍ଥାରେ ଅବନତି ଦେଖା ଦେଇଥିଲା । ପରେ ଡାକ୍ତରି ପରୀକ୍ଷା କରିବାରୁ ତାଙ୍କ କିଡ଼ନୀ ସଂକ୍ରମିତ ହୋଇଥିବା ଜଣାପଡିଥିଲା । ବର୍ତ୍ତମାନ ତାଙ୍କ ସ୍ବାସ୍ଥ୍ୟ ଅବସ୍ଥା ବିଗଡିବାରେ ଲାଗିଛି ।
ବର୍ତ୍ତମାନ ଧନଞ୍ଜୟଙ୍କ ଡାଇଲିସିସ ଚାଲିଛି । ସେଥିପାଇଁ ବହୁଳ ଅର୍ଥ ଖର୍ଚ୍ଚ ହେଉଛି, କିଡ଼ନୀ ପ୍ରତିରୋପଣ ପାଇଁ ଡାକ୍ତର କହିଛନ୍ତି । ହେଲେ କିଡ଼ନୀ ପ୍ରତିରୋପଣ ଓ ଚିକିତ୍ସା ପାଇଁ ଅର୍ଥ ସାଜିଛି ବାଧକ । ଏନେଇ ଧନଞ୍ଜୟ ଦାସ ଓ ତାଙ୍କ ପରିବାର ପକ୍ଷରୁ ସହାୟତା ପାଇଁ ନିବେଦନ କରାଯାଇଛି । ସେପଟେ ବିଏସକେଓ୍ବାଇ ମଧ୍ୟମରେ ସମସ୍ତ ସହାୟତା ଯୋଗଇଦିଆଯିବ ବୋଲି ପ୍ରତିଶ୍ରୁତି ଦେଇଛନ୍ତି ଡେରାବିଶ ବିଡ଼ିଓ
