ଟଳିଲା ବିପଦ, ଓଡ଼ିଶା ଉପକୂଳ ଅତିକ୍ରମ କରିବନି ବାତ୍ୟା ‘ସି-ତ୍ରଙ୍ଗ’

ଭୁବନେଶ୍ୱର: ଓଡ଼ିଶା ଉପକୂଳ ଅତିକ୍ରମ କରିବନି ସି-ତ୍ରଙ୍ଗ। ଓଡ଼ିଶା ଉପକୂଳ ପାଖେ ପାଖେ ଗତି କରି ପଶ୍ଚିମବଙ୍ଗ, ବାଂଲାଦେଶ ଉପକୂଳ ଆଡକୁ ମୁହାଁଇବ। ଆଇଏମଡି ଡିଜି ମୃତ୍ୟଞ୍ଜୟ ମହାପାତ୍ର ଏନେଇ ସୂଚନା ଦେଇଛନ୍ତି। ଆଜି ସକାଳେ ଉତ୍ତର ଆଣ୍ଡାମାନ ସାଗର ଓ ଏହାର ଆଖପାଖ ଅଞ୍ଚଳରେ ଘୂର୍ଣ୍ଣିବଳୟ ପ୍ରଭାବରେ ଲଘୁଚାପ କ୍ଷେତ୍ର ସୃଷ୍ଟି ହୋଇଛି। ୨୨ତାରିଖରେ ଏହା ଅବପାତ ଓ ୨୩ବେଳକୁ ଗଭୀର ଅବପାତର ରୂପ ନେବ। ୨୪ତାରିଖ ବେଳକୁ ଏହା ଦିଗ ପରିବର୍ତ୍ତନ କରି ଉତ୍ତର ଆଡକୁ ଗତି କରିବ। ବାତ୍ୟାରେ ପରିଣତ ହେବା ପରେ ପଶ୍ଚିମବଙ୍ଗ, ବାଂଲାଦେଶ ଉପକୂଳରେ ୨୫ ତାରିଖରେ ଲ୍ୟାଣ୍ଡଫଲ କରିବ।

ସୂଚନା ମୁତାବକ ବାତ୍ୟାର ସବୁଠୁ ଅଧିକ ପ୍ରଭାବ ପଶ୍ଚିମବଙ୍ଗ, ବାଂଲାଦେଶ ଉପରେ ପଡ଼ିବ। ତେବେ ବାତ୍ୟାର ତୀବ୍ରତା କେତେ ରହିବ, ସେନେଇ ଆଇଏମଡି ଆକଳନ କରିନି। ତେବେ ଏହାର ପ୍ରଭାବରେ ଓଡ଼ିଶା ଉପକୂଳରେ ୨୪ ଓ ୨୫ରେ ବର୍ଷା ସମ୍ଭାବନା ରହିଛି। ୨୧ତାରିଖରୁ ସମୁଦ୍ର ଅଶାନ୍ତ ରହିବ, ତେଣୁ ମତ୍ସ୍ୟଜୀବୀଙ୍କୁ ସମୁଦ୍ର ଭିତରକୁ ନଯିବାକୁ ପାଣିପାଗ କେନ୍ଦ୍ର ପରାମର୍ଶ ଦେଇଛି।