ପ୍ଲାଜମା ଥେରାପିକୁ ନେଇ କୌଣସି ପ୍ରମାଣ ନାହିଁ,ଏବେ କେବଳ ଟ୍ରାଏଲ ଚାଲିଛି : କେନ୍ଦ୍ର

ନୂଆଦିଲ୍ଲୀ:  ଦେଶରେ କରୋନା ଭାଇରସ ସଂକ୍ରମିତଙ୍କ ସଂଖ୍ୟା ଲଗାତର ବଢିବାରେ  ଲାଗିଛି । ଦେଶବ୍ୟାପି କରୋନା ସଂକଟ ଜାରି ରହିଥିବାବେଳେ  କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରଣାଳୟ ଏହା ସ୍ପଷ୍ଟ କରିଦେଇଛି ଯେ, ପ୍ଲାଜମା ଥେରାପି ଦ୍ୱାରା କରୋନା ଭାଇରସର ସଫଳ ଚିକିତ୍ସା ହୋଇ ପାରିବା ନେଇ ଏପର୍ଯ୍ୟନ୍ତ କୌଣସି ପ୍ରମାଣ ମିଳି ନାହିଁ । ସ୍ୱାସ୍ଥ୍ୟମନ୍ତ୍ରଣାଳୟର ଯୁଗ୍ମ ସଚିବ ଲବ ଅଗ୍ରୱାଲ କହିଛନ୍ତି ଯେ,ପ୍ଲାଜମା ଥେରାପିକୁ ନେଇ ସବୁ ଦାବି ଭୁଲ ଅଟେ ଓ ଏହା ଏପର୍ଯ୍ୟନ୍ତ ପରୀକ୍ଷଣ ସ୍ତରରେ ଅଛି ।

ସ୍ୱାସ୍ଥ୍ୟ ମନ୍ତ୍ରଣାଳୟ ଆଇସିଏମଆର ବକ୍ତବ୍ୟ ଉଧାର କରି କହିଛି ଯେ,ପ୍ଲାଜମା ଥେରାପି ଜରିଆରେ କରୋନାର ଚିକିତ୍ସା ସମ୍ଭବ ନୁହେଁ । ଏହାକୁ ଆଇସିଏମଆର ତରଫରୁ ସ୍ୱୀକୃତି ମିଳନାହିଁ । ଏହାକୁ ଏବେ କେବଳ ଟ୍ରାଏଲ ଓ ରିସର୍ଚ୍ଚ ଭାବେ ବ୍ୟବହାର କରାଯାଇପାରେ

ଲବ୍ ଅଗ୍ରୱାଲ କହିଛନ୍ତି ଯେ, ଏଥିପାଇଁ ଜାରି ଗାଇଡଲାଇନ୍ସକୁ ଠିକ୍ ଭାବେ ପାଳନ ନକରାଗଲେ ସ୍ଥିତ ଗମ୍ଭୀର ହୋଇପାରେ । ଆଇସିଏମଆର ଏହାକୁ ନେଇ ଏବେ ଅନୁସଂଧାନ ଆରମ୍ଭ କରିଛି । ଏବେ ଏହି ପଦ୍ଧତିକୁ ନେଇ ସଠିକ ଭାବେ କିଛି କୁହାଯାଇ ପାରିବ ନାହିଁ

ସ୍ୱାସ୍ଥ୍ୟ ଏବଂ ଗୃହମନ୍ତ୍ରଣାଳୟର ମିଳିତ ପ୍ରେସମିଟରେ ମଙ୍ଗଳବାର ଦିନ  କରୋନା ଭାଇରସକୁ ନେଇ ନୂଆ ତଥ୍ୟ ଦିଆଯାଇଛି । ଏହି ତଥ୍ୟ ଅନୁସାରେ ଗତ ୨୪ ଘଣ୍ଟାରେ ଦେଶରେ କରୋନା ଭାଇରସର ୧୫୪୩ଟି ନୂଆ ମାମଲା ସାମ୍ନାକୁ ଆସିଥିବା ବେଳେ ରିକଭରି ରେଟ୍ ରହିଛି ୨୩.୩ ପ୍ରତିଶତ । ୬୮୪ ଜଣ ଲୋକ ଭଲ ହୋଇ ଘରକୁ ଫେରିଛନ୍ତି ଓ ମୃତ୍ୟୁସଂଖ୍ୟା ୯୩୪ରେ ପଂହଚିଛି  ।