କାଟ୍ ଖାଇଲା ବିଜେପି-ଜେଜେପି ସରକାର ବିରୋଧରେ କଂଗ୍ରେସର ଅନାସ୍ଥା ପ୍ରସ୍ତାବ

ନୂଆଦିଲ୍ଲୀ: କାଟ୍ ଖାଇଲା କଂଗ୍ରେସର ଅନାସ୍ଥା ପ୍ରସ୍ତାବ । ହରିୟାଣାର ବିଜେପି-ଜେଜେପି ମେଣ୍ଟ ସରକାର ବିରୋଧରେ କଂଗ୍ରେସ ଆଣିଥିବା ଅନାସ୍ଥା ପ୍ରସ୍ତାବ ବିଧାନସଭାରେ କାଟ୍ ଖାଇଛି ।

No confidence motion against Haryana government defeated in the Assembly. pic.twitter.com/mVCApJL7s0

— ANI (@ANI) March 10, 2021

ହରିୟାଣା ବିଧାନସଭାର ବିରୋଧୀ ଦଳ ନେତା ଭୂପିନ୍ଦର ସିଂ ହୁଡା ମୁଖ୍ୟମନ୍ତ୍ରୀ ମନୋହର ଲାଲ୍ ଖଟ୍ଟରଙ୍କ ନେତୃତ୍ୱାଧୀନ ସରକାର ବିରୋଧରେ ବିଧାନସଭାରେ ଅନାସ୍ଥା ପ୍ରସ୍ତାବ ଆଣିଥିଲେ । ହୁଡା ଅଭିଯୋଗ କରିଥିଲେ, ଶାସନ କଳ ଲୋକଙ୍କ ଆସ୍ଥା ହରାଇଛି । ଜାରି ରହିଥିବା ଚାଷୀ ଆନ୍ଦୋଳନ ଓ ସୀମାରେ ୨୫୦ରୁ ଅଧିକ ଚାଷୀଙ୍କ ମୃତ୍ୟୁ ହୋଇଥିବା ହୁଡା ବିଧାନସଭାରେ ଅଭିଯୋଗ କରିଥିଲେ ।

ଆଜି ବିଧାନସଭା ପ୍ରଶ୍ନକାଳ ପରେ ଅନାସ୍ଥା ପ୍ରସ୍ତାବ ଉପରେ ୨ ଘଣ୍ଟା ଧରି ଆଲୋଚନା ହୋଇଥିଲା । ଅନାସ୍ଥା ପ୍ରସ୍ତାବ ଉପରେ ଗୃହରେ ହୋଇଥିବା ଭୋଟରେ ପ୍ରସ୍ତାବ ସପକ୍ଷରେ ୩୨ ଭୋଟ୍ ପଡ଼ିଥିବା ବେଳେ ଖଟ୍ଟରଙ୍କ ସପକ୍ଷରେ ୫୫ ଖଣ୍ଡ ଭୋଟ୍ ପଡ଼ିଥିଲା ।

୯୦ ଆସନ ବିଶିଷ୍ଟ ହରିୟାଣା ବିଧାନସଭାରେ ଏବେ ୮୮ ଜଣ ସଦସ୍ୟ ଅଛନ୍ତି । ଶାସକ ବିଜେପିର ୪୦ ସଦସ୍ୟ ଥିବାବେଳେ ଜେଜେପିର ୧୦ ଜଣ ଏବଂ କଂଗ୍ରେସର ୩୦ ଜମ ବିଧାୟକ ଅଛନ୍ତି । ୭ ଜଣ ସ୍ୱାଧୀନ ବିଧାୟକ ଥିବାବେଳେ ସେଥିରୁ ୫ ଜଣ ମେଣ୍ଟ ସରକାରକୁ ସମର୍ଥନ କରୁଛନ୍ତି । ହରିୟାଣା ଲୋକହିତ ପାର୍ଟିର ଜଣେ ବିଧାୟକ ଥିବାବେଳେ ସେ ବିଜେପିକୁ ସମର୍ଥନ କରୁଛନ୍ତି ।