ଏନ-୨ ଏବଂ ଏନ-୩ ବର୍ଗର ଟ୍ରକର କ୍ୟାବିନରେ ସ୍ଥାପନ ହେବ ଏୟାର କଣ୍ଡିସନର ସିଷ୍ଟମ

ନୂଆଦିଲ୍ଲୀ: ଏନ-2 ଏବଂ ଏନ-3 ବର୍ଗର ଟ୍ରକର କ୍ୟାବିନରେ ସ୍ଥାପନ ହେବ ଏୟାର କଣ୍ଡିସନର ସିଷ୍ଟମ । ନୋଟିସ ଡ୍ରାଫ୍ଟକୁ ଅନୁମୋଦନ କରିଛନ୍ତି କେନ୍ଦ୍ର ସଡ଼କ ପରିବହନ ମନ୍ତ୍ରୀ ନୀତିନ ଗଡ଼କରି । ଏନେଇ ଟୁଇଟ୍‌ କରି ସୂଚନା ଦେଇଛନ୍ତି ଗଡ଼କରୀ । ସେ କହିଛନ୍ତି ସଡ଼କ ସୁରକ୍ଷା ସୁନିଶ୍ଚିତ କରିବାରେ ଟ୍ରକ୍ ଡ୍ରାଇଭରଙ୍କ ଗୁରୁତ୍ବପୂର୍ଣ୍ଣ ଭୂମିକା ରହିଛି । ଏହି ନିଷ୍ପତ୍ତି ଟ୍ରକ୍ ଡ୍ରାଇଭରଙ୍କ ପାଇଁ ଏକ ମାଇଲଖୁଣ୍ଟ ଅଟେ । ଆରାମଦାୟକ ଅବସ୍ଥାରେ ଟ୍ରକ ଡ୍ରାଇଭର ମାନେ କାର୍ଯ୍ୟ କରିପାରିବେ । ଯାହାଦ୍ବାରା ସେମାନଙ୍କର ଦକ୍ଷତା ବୃଦ୍ଧି ଏବଂ ଡ୍ରାଇଭର ଥକାପଣ ସମସ୍ୟାର ସମାଧାନ ହୋଇପାରିବ ।

୨୦୨୫ରୁ ଦେଶର ସବୁ ଟ୍ରକରେ ଏସି କ୍ୟାବିନ୍ ରହିବା ନେଇ ଗତ ମାସରେ ଘୋଷଣା କରିଥିଲେ ନୀତିନ ଗଡ଼କରି । ୨୦୨୫ରୁ ସମସ୍ତ ଟ୍ରକରେ ଏସି ଲଗାଇବା ପାଇଁ ବାଧ୍ୟତାମୂଳକ ବୋଲି କହିଥିଲେ କେନ୍ଦ୍ର ପରିବହନ ମନ୍ତ୍ରୀ । ୨୦୨୫ରୁ ବଜାରରେ ଉପଲବ୍ଧ ହେବାକୁ ଥିବା ସବୁ ଟ୍ରକ୍ ରହିବ ଏସି କ୍ୟାବିନ । ଏହା ଦ୍ବାରା ଖରାରୁ ଟ୍ରକ୍ ଚାଳକଙ୍କୁ ଆଶ୍ବସ୍ତି ମିଳିବ । ଦୁର୍ଘଟଣା ବି କମିବ ବୋଲି କେନ୍ଦ୍ରମନ୍ତ୍ରୀ ନୀତିନ ଗଡକରୀ କହିଛନ୍ତି । ୨୦୧୬ରେ ପରିବହନ ମନ୍ତ୍ରାଳୟ ପ୍ରଥମଥର ପାଇଁ ଏହି ପ୍ରସ୍ତାବ ଦେଇଥିଲା ।