ଅର୍ଥମନ୍ତ୍ରୀ ନିର୍ମଳା ସୀତାରମଣ ଆଜି କରିବେ ପ୍ରାକ୍ ବଜେଟ ବୈଠକ

ନୂଆଦିଲ୍ଲୀ:  ଅର୍ଥମନ୍ତ୍ରୀ ନିର୍ମଳା ସୀତାରମଣ ଆଜି କରିବେ ପ୍ରାକ୍ ବଜେଟ ବୈଠକ । ବୈଠକରେ ଶିଳ୍ପ, ଚାଷୀ ସଂଗଠନ, ବିଭିନ୍ନ ଗୁରୁତ୍ବପୂର୍ଣ୍ଣ କ୍ଷେତ୍ରର ପ୍ରତିନିଧିମାନଙ୍କ ସହ ଆଲୋଚନା କରିବେ ନିର୍ମଳା । ଆସନ୍ତା ଜୁଲାଇ ଶେଷ ଭାଗରେ ଆସିପାରେ ୨୦୨୪-୨୫ କେନ୍ଦ୍ର ବଜେଟ । ବଜେଟ ପୂର୍ବରୁ ଅର୍ଥମନ୍ତ୍ରୀ ନିର୍ମଳା ସୀତାରମଣ ଜୁଲାଇ ଶେଷ ସପ୍ତାହରେ ଆଗତ କରିପାରନ୍ତି ବଜେଟ । ବଜେଟ ପୂର୍ବବର୍ତ୍ତୀ ବିଚାରବିମର୍ଷ ଲାଗି ଅର୍ଥମନ୍ତ୍ରୀ ଶିଳ୍ପ ସମୁଦାୟ ସହ ଆଲୋଚନା କରିବା କାର୍ଯ୍ୟକ୍ରମ ରହିଛି । ଏହି ବୈଠକରେ ଅର୍ଥନୈତିକ ଅଭିବୃଦ୍ଧି, ମୁଦ୍ରାସ୍ଫୀତି ଆଦି ପ୍ରସଙ୍ଗରେ ଆଲୋଚନା କରିପାରନ୍ତି । ୨୦୪୭ ସୁଦ୍ଧା ବିକଶିତ ଭାରତ ଗଠନ ଲକ୍ଷ୍ଯ ତଥା ଆସନ୍ତା ଦିନରେ ଭାରତକୁ ୫ ଟ୍ରିଲିୟନ ଡଲାର ଅର୍ଥନୀତିରେ ପରିଣତ କରିବାର ପ୍ରକ୍ରିୟା ଆରମ୍ଭ କରିବାକୁ ଯୋଜନା କରାଯିବ।

ଭାରତୀୟ ରିଜର୍ଭ ବ୍ଯାଙ୍କର ଆକଳନ ଅନୁସାରେ ଚଳିତ ଆର୍ଥିକ ବର୍ଷରେ ଭାରତର ଅର୍ଥନୈତିକ ଅଭିବୃଦ୍ଧି ୭.୨ ପ୍ରତିଶତ ଲକ୍ଷ୍ଯ ରଖାଯାଇଛି । ଏକାଦିକ୍ରମେ ନିର୍ମଳା ସୀତାରମଣ ସପ୍ତମ ଥର ଲାଗି ବଜେଟ ଆଗତ କରିବେ। ଏହା ସହ ସେ ମୋରାରଜୀ ଦେଶାଇଙ୍କ ରେକର୍ଡ ବି ଚଳିତ ଥର ଭଙ୍ଗ କରିବେ । ଛଅ ଦଶନ୍ଧି ତଳେ ମୋରାରଜୀ ହେଉଛନ୍ତି ପ୍ରଥମ ବ୍ୟକ୍ତି ଯିଏକି ଛଅ ଥର ବଜେଟ ଆଗତ କରିଥିଲେ । ନିର୍ମଳା ବି ହେଉଛନ୍ତି ଏକମାତ୍ର ମହିଳା ଯିଏକି ଲଗାତାର ଦୁଇଥର ଅର୍ଥମନ୍ତ୍ରୀ ହୋଇଛନ୍ତି । ୨୦୨୪ ଅନ୍ତରୀଣ ବଜେଟରେ କ୍ଯାପିଟାଲ ଏକ୍ସପେଣ୍ଡିଚର ପରିମାଣ ୧୧.୧ ପ୍ରତିଶତ ଅର୍ଥାତ ୧୧ ଦଶମିକ ୧୧ ଲକ୍ଷ କୋଟି ଟଙ୍କାକୁ ବୃଦ୍ଧି କରାଯାଇଛି ।