ଗହିର ମଝିରୁ ଉଦ୍ଧାର ହେଲା ମଣିଷ କଙ୍କାଳ

ନନ୍ଦିଘୋଷ ବ୍ୟୁରୋ: ପୁରୀ ଜିଲ୍ଲା ନିମାପଡ଼ା ଥାନା କୁମ୍ଭାରପଡ଼ା ଗାଁର ଏକ ଧାନ ଗହିର ମଧ୍ୟରୁ ମଣିଷ କଙ୍କାଳ ଉଦ୍ଧାର କଲା ନିମାପଡ଼ା ପୋଲିସ । ଅପରାହ୍ନରେ ଗ୍ରାମର କିଛି ଲୋକ ଗହିର ମଧ୍ୟକୁ ଛେଳି ଚରାଇବାକୁ ଯାଇଥିବା ସମୟରେ କଙ୍କାଳ ଟିକୁ ପଡ଼ିଥିବା ଦେଖିବାକୁ ପାଇଥିଲେ । ପରେ ନିମାପଡ଼ା ପୋଲିସକୁ ଜଣାଇଥିଲେ । ଘଟଣା ସ୍ଥଳରେ ନିମାପଡ଼ା ପୋଲିସ ପହଞ୍ଚି ଅଜଣା କଙ୍କାଳ ଟିକୁ ଉଦ୍ଧାର କରିବା ସହିତ ଅଧିକ ତଦନ୍ତ ଜାରି ରଖିଛି ।  କଙ୍କାଳଟି କୁମ୍ଭାରପଡ଼ା ଗାଁର  ପୂର୍ଣ୍ଣଚନ୍ଦ୍ର ବେହେରାଙ୍କ ବୋଲି ଜଣାପଡିଛି  । ପୋଲିସ ତାଙ୍କ ପରିବାର ଲୋକଙ୍କୁ ଜଣାଇଥିବା ବେଳେ ତାଙ୍କ ପୁଅ ବୁଲୁ ବେହେରା କଙ୍କାଳ ଟିକୁ ଚିହ୍ନଟ କରିଛନ୍ତି ।  ତାଙ୍କ ବାପା ୨୦ଦିନ ତଳେ ନିଖୋଜ ରହିଥିଲେ । ଏନେଇ ସେ ଥାନାରେ ଏତଲା ଦେଇଥିବା କହିଛନ୍ତି । ପୂର୍ଣ୍ଣଚନ୍ଦ୍ର ୨୦ଦିନ ତଳେ ଘରେ କାହାକୁ କିଛି ନଜଣାଇ ଧାନ ଗହିରକୁ ଘାସ ଆଣିବା ପାଇଁ ଯାଇଥିଲେ । ସେଠାରେ ତାଙ୍କର କୌଣସି କାରଣ ବଶତଃ ମୃତ୍ୟୁ ହୋଇଥିବା ଜଣାପଡିଛି । ତେବେ ମୃତ୍ୟୁର ପ୍ରକୃତ କାରଣ ଜାଣିବା ପାଇଁ ତଦନ୍ତ ଚଳାଇଛି ପୋଲିସ ।