ନୀଳଗିରି : ନୀଳଗିରି ଥାନା ବାଲିଗୋହିରୀ ଛକ ନିକଟରେ ମର୍ମନ୍ତୁଦ ସଡକ ଦୁର୍ଘଟଣା। କାରକୁ ମୁହାଁମୁହିଁ ଧକ୍କା ଦେଲା ଟିପ୍ପର। ଦୁର୍ଘଟଣାରେ ଚାଲିଗଲା ଦାଦାର ଜୀବନ। ପୁତୁରା ଗୁରୁତର ଅବସ୍ଥାରେ ମେଡିକାଲରେ ଭର୍ତ୍ତି। ଦିନକ ପରେ ବାହାଘର ଥିବାବେଳେ ଚାଲିଗଲା ଦାଦାର ଜୀବନ। କ୍ଷତିପୂରଣ ଦାବିରେ ୧୯ ନଂ ରାଜ୍ୟ ରାଜପଥର ବାଲିଗୋହିରୀ ଛକ ନିକଟରେ ରାସ୍ତାରୋକ କରିଛନ୍ତି ଉତ୍ତ୍ୟକ୍ତ ଲୋକେ। ଦାବି ପୂରଣ ନହେବା ଯାଏଁ ରାସ୍ତାରୋକ ହଟିବନି ବୋଲି ଚେତାବନୀ ଦେଇଛନ୍ତି। ମୃତକ ହେଉଛନ୍ତି ଗୋବରା ଗ୍ରାମର ହରେକୃଷ୍ଣ ମହାଳିକ। ଦାଦା ହରେକୃଷ୍ଣ ଓ ପୁତୁରା ଜ୍ୟୋତିଶଙ୍କର ବାହାଘର ନିମନ୍ତେ ବନ୍ଧୁଙ୍କୁ ଆଣିବାକୁ ବାଲେଶ୍ବର ଷ୍ଟେସନକୁ ଯାଉଥିଲେ। ଭୋର ସମୟରେ ଦ୍ରୁତ ଗତିରେ ନୀଳଗିରି ଅଭିମୁଖେ ଆସୁଥିବା ଏକ ଟିପ୍ପର ତାଙ୍କୁ ମୁହାଁମୁହିଁ ଧକ୍କା ଦେଇଥିଲା। ହରେକୃଷ୍ଣଙ୍କ ଘଟଣାସ୍ଥଳରେ ମୃତ୍ୟୁ ହୋଇଥିବା ବେଳେ ପୁତୁରା ଜ୍ୟୋତିଶଙ୍କରଙ୍କୁ ଗୁରୁତର ଅବସ୍ଥାରେ କଟକ ବଡ଼ ମେଡିକାଲକୁ ସ୍ଥାନାନ୍ତର କରାଯାଇଛି। ତେବେ ବାହାଘରକୁ ଆଉ ଗୋଟିଏ ଦିନ ଥିବାରୁ ମୃତ୍ୟୁକୁ ନେଇ ପ୍ରବଳ ଉତ୍ତେଜନା ଦେଖିବାକୁ ମିଳିଛି।
