ନୀଳଗିରି: ବିପଦ ସଙ୍କୁଳ ଅବସ୍ଥାରେ କୋଠା । ନୀଳଗିରି ଔପଦା ସନ୍ତରାଗଡିଆର ରାଜସ୍ବ ନିରୀକ୍ଷକ କାର୍ଯ୍ୟାଳୟ ସମ୍ପୂର୍ଣ ଅସୁରକ୍ଷିତ ଭାବେ ଚାଲିଛି। ଛାତରୁ ଖସୁଛି କଂକ୍ରିଟ, କାନ୍ଥ ଫାଟି ଆଁ କଲାଣି। ୭୦ ବର୍ଷ ପୁରୁଣା କୋଠାରେ ରହିଛି ଗୁରୁତ୍ବପୂର୍ଣ୍ଣ ଫାଇଲ୍ । ଟିକେ ବର୍ଷା ହେଲେ କାଗଜ ପତ୍ରରେ ବି ଲାଗିଯାଉଛି ଉଇ। ତୁରନ୍ତ କୋଠାର ମରାମତି ନହେଲେ ନୂତନ କୋଠା ପାଇଁ ଦାବିକଲେ ଲୋକ।
ବିପଦ ସଙ୍କୁଳ ଅବସ୍ଥାରେ ଚାଲିଛି ନୀଳଗିରି ଔପଦା ସନ୍ତରାଗଡ଼ିଆର ରାଜସ୍ବ ନିରୀକ୍ଷକଙ୍କ କାର୍ଯ୍ୟାଳୟ। ଛାତରୁ ଖସୁଛି କଂକ୍ରିଟ । କାନ୍ଥ ଫାଟି ଆଁ କରିଥିବା ବେଳେ ଏରୁଣ୍ଡି ବନ୍ଧ ଅଧା ଭାଙ୍ଗିଯାଇଛି । ଦୀର୍ଘ ୭୦ବର୍ଷରୁ ଅଧିକ ସମୟ ହେବ ତିଆରି ହୋଇଥିବା ଏହି ଘରର ମରାମତି ହେଉନାହିଁ । ଟିକେ ବର୍ଷା ହେଲେ କାର୍ଯ୍ୟାଳୟର ଅବସ୍ଥା ନକହିବା ଭଲ । ବର୍ଷା ପାଣି ଭିତରକୁ ଆସି କାଗଜ ପତ୍ରରେ ଉଇ ଲାଗିଯାଉଥିବା ଅଭିଯୋଗ ହୋଇଛି ।
କାର୍ଯ୍ୟାଳୟର ଏଭଳି ଅବସ୍ଥା ଦେଖି ସେଠାକୁ ଯିବାକୁ ଭୟ କରୁଛନ୍ତି ଲୋକେ। ଅଫିସ୍ କାର୍ଯ୍ୟାଳୟର ଛାତରେ ଉଠିଛି ବଡ ବଡ ଘାସ ଗଛ। କାର୍ଯ୍ୟାଳୟ ଚାରିପଡେ ମଧ୍ୟ ଅନାବନା ଗଛରେ ଭର୍ତ୍ତି ହୋଇଛି । ଖୁବ୍ ଶୀଘ୍ର ଅଫିସ୍ ଘରକୁ ମରାମତି କରାଯାଉ ନହେଲେ ନୂତନ ଗୃହ ଯୋଗାଇଦେବାକୁ ଅଞ୍ଚଳବାସୀ ଦାବୀ କରିଛନ୍ତି। ଘଟଣାକୁ ନେଇ ବିଭାଗୀୟ ଅଧିକାରୀଙ୍କ ସହିତ ଆଲୋଚନା ସରିଛି ଏବଂ ଖୁବ୍ ଶୀଘ୍ର ନୂତନ ଗୃହ ନିର୍ମାଣ କରାଯିବ ବୋଲି କହିଛନ୍ତି ଉପଜିଲ୍ଲାପାଳ।
