ମହାରାଷ୍ଟ୍ରରେ ପୁଣି ଲାଗୁ ହେବ କି ଲକଡାଉନ୍ ? ସନ୍ଧ୍ୟାରେ ରାଜ୍ୟବାସୀଙ୍କୁ ମୁଖ୍ୟମନ୍ତ୍ରୀଙ୍କ ସମ୍ବୋଧନ
ମୁମ୍ବାଇ: ମହାରାଷ୍ଟ୍ର ମୁଖ୍ୟମନ୍ତ୍ରୀ ଉଦ୍ଧବ ଠାକରେ ଆଜି ରାଜ୍ୟବାସୀଙ୍କୁ ସମ୍ବୋଧିତ କରିବେ । ମୁଖ୍ୟମନ୍ତ୍ରୀଙ୍କ ବାର୍ତ୍ତା ପୂର୍ବରୁ ଅନେକ ଅନୁମାନ କରାଯାଉଛି । ମୁମ୍ବାଇ ସହିତ ମହାରାଷ୍ଟ୍ରର କେତେକ ସହରରେ କରୋନା ସଂକ୍ରମଣ ମାମଲା ବୃଦ୍ଧି ପାଇଥିବାରୁ ମୁଖ୍ୟମନ୍ତ୍ରୀ ଉଦ୍ଧବ ଠାକରେଙ୍କ ସମ୍ବୋଧନ ଗୁରୁତ୍ୱ ରଖୁଛି ।
ମହାରାଷ୍ଟ୍ର ମନ୍ତ୍ରୀ ବିଜୟ ବଡ୍ଡେଟିବାରଙ୍କ ଅନୁସାରେ, ନାଗପୁର, ଅମରାବତୀ, ୟବତମାଳ ଭଳି ଜିଲ୍ଲାରେ ବୃଦ୍ଧି ପାଉଥିବା କରୋନା ସଂକ୍ରମଣ ମାମଲାକୁ ଦୃଷ୍ଟିରେ ରଖି ଏସବୁ ଜିଲ୍ଲାରେ ରାତ୍ରୀକାଳୀନ କର୍ଫ୍ୟୁ ଲଗାଇବାକୁ ଚିନ୍ତା କରୁଛନ୍ତି ରାଜ୍ୟ ସରକାର ।
ଅନ୍ୟପଟେ ଅକୋଲା, ୟବତମାଳ, ସତାରା ଓ ଅମରାବତୀ ଆଦି ସ୍ଥାନରେ ସଂକ୍ରମଣ ବୃଦ୍ଧି ଅଧିକାରୀଙ୍କ ପାଇଁ ଚିନ୍ତା ପାଲଟିଛି । ଫେବ୍ରୁଆରୀ ୨୦ ତାରିଖରେ ମହାରାଷ୍ଟ୍ରରେ କରୋନାର ୬ ହଜାର ୨୮୧ ନୂଆ ମାମଲା ଚିହ୍ନଟ ହୋଇଥିବା ବେଳେ ୪୦ ଜଣଙ୍କ ମୃତ୍ୟୁ ହୋଇଛି । ମୁମ୍ବାଇ, ଠାଣେ, ଅମରାବତୀ, ପୁନେ ଓ ନାଗପୁରରେ ଲକଡାଉନ୍ ହେବା ନେଇ ଆକଳନ କରାଯାଉଛି ।
ଅନ୍ୟପଟେ ପୁନେରେ ଫେବ୍ରୁଆରୀ ୨୮ ତାରିଖ ଯାଏ ରାତ୍ରୀକାଳୀନ କର୍ଫ୍ୟୁ ଲାଗୁ ହୋଇଛି । ରାତି ୧୧ଟାରୁ ସକାଳ ୬ଟା ଯାଏ ସାଧାରଣ ଲୋକଙ୍କ ଚଳାଚଳକୁ ନିଷିଦ୍ଧ କରାଯାଇଛି । ଏହି ସମୟରେ କେବଳ ଅତ୍ୟାବଶ୍ୟକୀୟ ସେବା ଜାରି ରହିବ । ଫେବ୍ରୁଆରୀ ୨୮ ତାରିଖ ଯାଏ ସ୍କୁଲ୍ ଓ କଲେଜ ବନ୍ଦ ରଖିବାକୁ ପୁନେ ଡିଭିଜନାଲ କମିଶନର ନିର୍ଦ୍ଦେଶ ଦେଇଛନ୍ତି । ଏହି ନିର୍ଦ୍ଦେଶନାମା ଆସନ୍ତାକାଲି ଠାରୁ ଲାଗୁ ହେବ ।
