ନାବାଳିକା ଛାତ୍ରୀଙ୍କୁ ଶିକ୍ଷକଙ୍କ ଅସଦାଚରଣ ଅଭିଯୋଗ

ନନ୍ଦିଘୋଷ ବ୍ୟୁରୋ: ସ୍କୁଲ ଶିକ୍ଷକଙ୍କ ନାଁରେ ଅସଦାଚରଣ ଅଭିଯୋଗ। ନିଆଳି ଥାନା ବିଳାଶୁଣୀ ନିକଟସ୍ଥ ଏକ ସ୍କୁଲର ଶିକ୍ଷକ ଜଣେ ନାବାଳିକା ଛାତ୍ରୀଙ୍କୁ ଅସଦାଚରଣ କରିଥିବା ଅଭିଯୋଗ ହୋଇଛି। ଏହାକୁ ନେଇ ବିଦ୍ୟାଳୟ ପରିସରରେ ତୀବ୍ର ଉତ୍ତେଜନା ପ୍ରକାଶ ପାଇଥିଲା। ଖବର ପାଇ ନିଆଳି ଥାନା ପୋଲିସ ଘଟଣାସ୍ଥଳରେ ପହଞ୍ଚି ଉକ୍ତ ଶିକ୍ଷକଙ୍କୁ ବନ୍ଦ ଘରୁ ଉଦ୍ଧାର କରିଥିଲା। ଥାନାକୁ ନେବାବେଳେ ଉତ୍ୟକ୍ତ ଲୋକମାନେ ତାଙ୍କୁ ଛଡ଼ାଇ ନିସ୍ତୁକ ମାଡ଼ ମାରିଥିଲେ। ପୁଲିସ ତାଙ୍କୁ ନିଆଳି ଥାନାରେ ଅଟକ ରଖିଥିବା ସୂଚନା ମିଳିଛି। ଏଯାଏଁ କୌଣସି ଲିଖିତ ଅଭିଯୋଗ ହୋଇ ନଥିବା କହିଛି ପୋଲିସ।  ଶିକ୍ଷକ ଅସଦାଚରଣ କରିଥିବା ନେଇ ଛାତ୍ରୀଜଣକ ନିଜ ସାଙ୍ଗ ଓ ପରିବାର ଲୋକଙ୍କୁ ଜଣାଇଥିଲେ। ଘଟଣା ପ୍ରଘଟ ହେବା ପରେ ଅଭିଭାବକ ଓ ସ୍ଥାନୀୟ ଲୋକେ ସ୍କୁଲରେ ପହଞ୍ଚିଥିଲେ। ଆକ୍ରମଣ କରିବେ ଜାଣି ସ୍କୁଲର ପ୍ରଧାନଶିକ୍ଷୟିତ୍ରୀ ଉକ୍ତ ଶିକ୍ଷକଙ୍କୁ ଏକ କୋଠରିରେ ଲୁଚାଇ ବାହାରୁ ତାଲା ପକାଇ ଦେଇଥିଲେ। ପୂର୍ବରୁ ମଧ୍ୟ ଉକ୍ତ ଶିକ୍ଷକଙ୍କ ନାମରେ ଏଭଳି ଅଭିଯୋଗ ଆସିଥିବା ଲୋକେ କହିଛନ୍ତି। ପୋଲିସ ନିଜ ପଟୁ ତଦନ୍ତ ଚାଲୁ ରଖିଥିବା କହିଛନ୍ତି ନିଆଳି ଥାନା ଆଇଆଇସି।