ଭୁବନେଶ୍ବର : ବାଲିଅନ୍ତା ସୌମ୍ୟରଞ୍ଜନ ସ୍ୱାଇଁ ହତ୍ୟା ମାମଲାରେ ଘାଣ୍ଟୁଛନ୍ତି ଜାତୀୟ ମାନବାଧିକାର କମିଶନ। ଭିଡ଼ ହିଂସା ଘଟଣାର ବିଭିନ୍ନ ଦିଗକୁ ନେଇ ଏନଏଚଆରସିର ଦୁଇ ଜଣିଆ ସଦସ୍ୟ ରାଜେନ୍ଦ୍ର ସିଂ ଓ ଅବିନାଶ କୁମାର ଶୁଣାଣି ଜାରି ରଖିଛନ୍ତି । ଆଜି ଶୁଣାଣିର ଦ୍ବିତୀୟ ଦିନରେ ଘଟଣାସ୍ଥଳ ପରିଦର୍ଶନ କରିପାରନ୍ତି ଏନଏଚଆରସି ଟିମ୍ ।
ରାଜ୍ୟ ଅତିଥି ଭବନରେ ଚାଲିଥିବା ଶୁଣାଣିରେ ଏନଏଚଆରସି ସଦସ୍ୟଙ୍କ ନିକଟରେ ଆଜି ହାଜର ହୋଇପାରନ୍ତି ପୋଲିସ କମିଶନର, ଡିସିପି, ଆଇପିଏସ୍ ଦୟାଲ ଗଙ୍ଗୱାର, କ୍ୟାପିଟାଲ ହସ୍ପିଟାଲର ମେଡିକାଲ ଅଫିସର, ପୋଷ୍ଟମର୍ଟମ କରିଥିବା ସର୍ଜନ ଓ ପୂରା ଘଟଣାକ୍ରମ ସହ ଜଡ଼ିତ ଥିବା ସମସ୍ତ ସରକାରୀ ଅଧିକାରୀ । ପରିବାର ସଦସ୍ୟ ମଧ୍ୟ ଆଜି ଏନଏଚଆରସି ସଦସ୍ୟଙ୍କ ନିକଟରେ ହାଜର ହୋଇପାରନ୍ତି । ଶୁଣାଣି ଗତକାଲିଠାରୁ ଆରମ୍ଭ ହୋଇଥିବା ବେଳେ ୫ ତାରିଖ ପର୍ଯ୍ୟନ୍ତ ଚାଲିବ ।
ଗତକାଲି ଜିଆରପି ଏସପି ଭବାନୀ ଶଙ୍କର ଉଦଗାତା, ଜିଆରପି ରିଜର୍ଭ ଇନ୍ସପେକ୍ଟର ଏବଂ ତତକାଳୀନ ଥାନା ଅଧିକାରୀ ଅନିଲ ପରିଡାଙ୍କୁ ପଚରାଉଚରା କରିଛି NHRC ଟିମ୍ । କ୍ରାଇମବ୍ରାଞ୍ଚର ତଦନ୍ତକାରୀ ଅଧିକାରୀ ଅନିରୁଦ୍ଧ ରାଉତରାୟଙ୍କୁ ବି ଘଟଣା ସମ୍ପର୍କରେ ପଚରାଉଚରା କରାଯାଇଥିଲା । ସୋସିଆଲ ମିଡିଆର ଭାଇରାଲ ଭିଡିଓ, ପୀଡିତାଙ୍କ ବୟାନ, ପ୍ରତ୍ୟକ୍ଷଦର୍ଶୀଙ୍କ ମତକୁ ନେଇ ଚାଲିଛି ଖୋଳତାଡ଼ । ପୋଲିସର ଅବହେଳା ପଛର କାରଣ ମଧ୍ୟ ଖୋଜିପାରେ NHRC ଟିମ ।
