ନନ୍ଦିଘୋଷ ବ୍ୟୁରୋ: ହ୍ବାଟସଆପ ସମେତ ବିଭିନ୍ନ ମେସେଜିଂ ଆପରେ ଆସିବ ବଡ଼ ପରିବର୍ତ୍ତନ। ମୋବାଇଲ ଫୋନରେ ଆକ୍ଟିଭ ସିମ୍ କାର୍ଡ ନଥିଲେ ୟୁଜର କୌଣସି ପ୍ରକାରେ ଯେପରି ହ୍ବାଟସଆପକୁ ବ୍ୟବହାର କରିପାରିବେ ନାହିଁ ସେଥିଲାଗି ବ୍ୟବସ୍ଥା କରିବାକୁ ମେସେଜିଂ ଆପଗୁଡିକୁ ନିର୍ଦ୍ଦେଶ ଦେଇଛନ୍ତି କେନ୍ଦ୍ର ସରକାର। ଯେଉଁ ଆପଗୁଡିକୁ କେନ୍ଦ୍ର ସରକାର ଏହି ନିର୍ଦ୍ଦେଶ ଦେଇଛନ୍ତି ସେଗୁଡିକ ହେଲା ହ୍ବାଟସଆପ୍ ଟେଲିଗ୍ରାମ, ସିଗନାଲ, ସ୍ନାପଚାଟ, ସେୟାରଚାଟ, ଜିଓଚାଟ, ଆରାଟାଇ ଓ ଜୋସ। ଏହି ପ୍ଲାଟଫର୍ମଗୁଡିକୁ ଏହି ନିର୍ଦ୍ଦେଶ ଦେଇଛି କେନ୍ଦ୍ର ଟେଲିକମ୍ୟୁନିକେସନ ବିଭାଗ। ସାଇବର ନିରାପତ୍ତାକୁ ଅଧିକ ଶକ୍ତିଶାଳୀ କରିବା ଲାଗି ସରକାର ଏହି ପଦକ୍ଷେପ ନେଇଛନ୍ତି। ଏହା ସହ ଯେଉଁ ୱେବ ବ୍ରାଉଜରମାନେ ଏହି ପ୍ଲାଟଫର୍ମଗୁଡିକୁ ବ୍ୟବହାର କରୁଛନ୍ତି ସେମାନଙ୍କ ନେଟୱର୍କ ପ୍ରତି ୬ ଘଣ୍ଟାରେ ଲଗଆଉଟ ହେବ। ୬ ଘଣ୍ଟା ପରେ ପୁଣି ଥରେ ୟୁଜରମାନେ କ୍ୟୁଆର କୋଡ ଜରିଆରେ ଲଗ୍ ଇନ କରିବେ।
