ଏଣିକି ଦ୍ରୁତଗତିରେ ଗାଡ଼ି ଚଳାଇଲେ ପଡ଼ିବ ମହଙ୍ଗା, ଚିହ୍ନଟ ପାଇଁ ଇନ୍ଷ୍ଟଲ ହେବ ସ୍ୱତନ୍ତ୍ର ସଫ୍ଟଓ୍ୱେୟାର
ଭୁବନେଶ୍ୱର: ଏଣିକି ଦ୍ରୁତଗତିରେ ଗାଡ଼ି ଚଳାଇଲେ ମହଙ୍ଗା ପଡ଼ିବ । ଦ୍ରୁତଗତିରେ ଯାଉଥିବା ଯାନବାହାନକୁ ଚିହ୍ନଟ କରିବା ପାଇଁ ଆସିବ ନୂଆ ସଫ୍ଟୱେୟାର । ଏହାକୁ ବିକଶିତ କରିବା ପାଇଁ ଆଇଆଇଟି ଭୁବନେଶ୍ୱରକୁ ଦିଆଯାଇଛି ଦାୟିତ୍ୱ ।
ରାଜ୍ୟ ସଡ଼କ ଓ ପରିବହନ ବିଭାଗ ଭୁବନେଶ୍ୱର ଆଇଆଇଟିକୁ ଦେଇଛି ଏହି ପ୍ରସ୍ତାବ । ପିଆଇବି ଭୁବନେଶ୍ୱର ପକ୍ଷରୁ ଏସମ୍ପର୍କରେ ଟ୍ୱିଟ୍ କରି ସୂଚନା ଦିଆଯାଇଛି । ଆଇଆଇଟି ଭୁବନେଶ୍ୱର ଏଦିଗରେ ସଫଳତା ପାଇଛି । ସରକାର ମଧ୍ୟ ଏ ସମ୍ପର୍କରେ ଏକ ପ୍ରୋଜେକ୍ଟ ରିପୋର୍ଟ ଦାଖଲ କରିବା ପାଇଁ ଆମନ୍ତ୍ରଣ କରିଛନ୍ତି ।
ଏହି ବାବଦକୁ ୧୬ ଲକ୍ଷ ୧୦ ହଜାର ଟଙ୍କାର ବ୍ୟୟବରାଦ ହେବ ବୋଲି ପ୍ରସ୍ତାବରେ କୁହାଯାଇଛି । ଆଇଆଇଟି ଭୁବନେଶ୍ୱରର ସ୍କୁଲ ଅଫ୍ ଇଲେକ୍ଟ୍ରୋନିକ୍ସ ସାଇନ୍ସ ଏହା ଉପରେ ଅଧିକ କାର୍ଯ୍ୟ କରୁଛି । ସଫ୍ଟୱେୟାର ବିକଶିତ କରିବାକୁ ରାଡାର ଟେକ୍ନୋଲଜିର ବି ବ୍ୟବହାର କରାଯାଉଛି । ରାଜ୍ୟରେ ଦୈନନ୍ଦିନ ଘଟୁଥିବା ଦୁର୍ଘଟଣା ମଧ୍ୟରେ ଦ୍ରୁତ ଗତିରେ ଗାଡ଼ି ଚାଳଣା ଯୋଗୁଁ ସର୍ବାଧିକ ଦୁର୍ଘଟଣା ଘଟୁଛି । କେବଳ ୨୦୧୯ ରେ ୫ ହଜାର ୩ ଶହ ୩୩ଟି ସଡ଼କ ଦୁର୍ଘଟଣା, ଗାଡ଼ିର ଦ୍ରୁତ ଗତି ପାଇଁ ଘଟିଛି । ୬୯ ପ୍ରତିଶତ ମୃତ୍ୟୁ କେବଳ ସଡ଼କ ଦୁର୍ଘଟଣା କାରଣରୁ ହେଉଥିବା ରିପୋର୍ଟ କହିଛି ।
