୭୭ ବର୍ଷରେ ପ୍ରଥମ, ଇତିହାସ ରଚିଲେ ବୁମରା-ଆକାଶ ଦୀପ

ନନ୍ଦିଘୋଷ ବ୍ୟୁରୋ: ଅଷ୍ଟ୍ରେଲିଆରେ ଇତିହାସ ରଚିଛି ଭାରତ । ତୃତୀୟ ଟେଷ୍ଟରେ ଶେଷ ଓ୍ବିକେଟରେ ରେକର୍ଡ କରିଛନ୍ତି । ବୁମରା ଏବଂ ଆକାଶ ଦୀପଙ୍କ ଯୋଡ଼ି ଏବେ ବେଶ ଚର୍ଚ୍ଚାରେ । ୭୭ ବର୍ଷରେ ପ୍ରଥମ ରେକର୍ଡର ଅଧିକାରୀ ହୋଇଛନ୍ତି ଏହି ଯୋଡ଼ି । ଅଷ୍ଟ୍ରେଲିଆ ବିପକ୍ଷରେ ୧୦ ନମ୍ବର ଏବଂ ୧୧ ନମ୍ବର ବ୍ୟାଟ୍ସମ୍ୟାନ ଛକା ମାରିଛନ୍ତି । ଅଷ୍ଟ୍ରେଲିଆ ବିପକ୍ଷରେ ଖେଳିବା ଦିନରୁ କୌଣସି ବ୍ୟାଟ୍ସମ୍ୟାନ ଯୋଡ଼ି ଏହି ରେକର୍ଡ କରିନଥିଲେ । ମାତ୍ର ଏବେ ଆକାଶ ଦୀପ ଏବଂ ବୁମରା ଫଲୋଅନ ଏଡ଼ାଇବା ସହ ଏହି ରେକର୍ଡ ଅର୍ଜନ କରିବାରେ ସକ୍ଷମ ହୋଇଛନ୍ତି । ଭାରତ ଅଷ୍ଟ୍ରେଲିଆ ମଧ୍ୟରେ ପ୍ରଥମ ଟେଷ୍ଟ ମ୍ୟାଚ ୧୯୪୭ ମସିହାରେ ହୋଇଥିଲା । ମାତ୍ର ଏଯାବତ ଏହା ଦେଖିବାକୁ ମିଳିନଥିଲା ।

ତୃତୀୟ ଟେଷ୍ଟର ଚତୁର୍ଥ ଦିନରେ ଅଷ୍ଟ୍ରେଲିଆ ଅଧିନାୟକ ପାଟ କମିନ୍ସଙ୍କ ବଲରେ ଛକା ମାରିଥିଲେ ଆକାଶ ଦୀପ ଏବଂ ବୁମରା । ୩୯ ରନର ପାର୍ଟନରସିପ କରି ଫଲୋଅନକୁ ମଧ୍ୟ ଏଡାଇଛନ୍ତି । ଉଭୟଙ୍କ ମାଡ଼ ଦେଖି ପ୍ରଂଶସକଙ୍କ ସହ ସାଥୀ ଖେଳାଳିମାନେ ମଧ୍ୟ ବେଶ ଖୁସି ହୋଇଥିବା ଦେଖିବାକୁ ମିଳିଥିଲା । ଆକାଶ ଦୀପ ୩୧ ବଲରେ ୨୭ ରନ କରିଥିବାବେଳେ ବୁମରା ୨୭ ବଲରେ ୧୦ ରନ କରିଛନ୍ତି । ଉଭୟଙ୍କ ବ୍ୟାଟିଂ ଷ୍ଟାଇଲକୁ ମଧ୍ୟ କ୍ରିକେଟ ବିଶେଷଜ୍ଞମାନେ ବେଶ ପ୍ରଂଶସା କରିଛନ୍ତି । ତେବେ ଅଷ୍ଟ୍ରେଲିଆ ୪୪୫ ରନ କରିଥିବାବେଳେ ଭାରତ ଚତୁର୍ଥ ଦିନର ଖେଳ ଶେଷ ସୁଦ୍ଧା ୨୫୨ ରନ କରିଛନ୍ତି । ଶେଷ ଓ୍ବିକେଟରେ ଆକାଶ ଦୀପ ଏବଂ ବୁମରା ଆସନ୍ତା କାଲି ଖେଳ ଆରମ୍ଭ କରିବେ ।