ଅଙ୍ଗନବାଡ଼ି ପାଇଁ ସୃଷ୍ଟି କରାଯାଇଛି ନୂଆ ପଦବୀ

ଭୁବନେଶ୍ୱର :  ଅଙ୍ଗନବାଡ଼ି ପାଇଁ ସୃଷ୍ଟି କରାଯାଇଛି ନୂଆ ପଦବୀ । ରାଜ୍ୟର ୨ହଜାର ୮୩୬ଟି ମିନି ଅଙ୍ଗନବାଡି ସେଣ୍ଟରକୁ ମୁଖ୍ୟ ଅଙ୍ଗନବାଡ଼ି ସେଣ୍ଟରରେ ପରିଣତ କରାଯାଇଛି। ଏଥିରେ ଜଣେ କର୍ମୀଙ୍କ ସହ ଜଣେ ସହାୟକଙ୍କୁ ନିଯୁକ୍ତି ଦେଇଛନ୍ତି ରାଜ୍ୟ ସରକାର।

ସେହିପରି ୨ହଜାର ୮୩୬ଟି ଅଙ୍ଗନବାଡ଼ି ସେଣ୍ଟରରେ ୧୧୪ଜଣ ମହିଳା ସୁପରଭାଇଜରଙ୍କୁ ନିଯୁକ୍ତି ଦିଆଯିବ। ଏହାସହ ଅଙ୍ଗନବାଡ଼ିରେ ମୋ ବଗିଚା, ମୋ ରୋଷେଇ ଘର କରାଯାଇ ପିଲାଙ୍କୁ ଭିଟାମିନଯୁକ୍ତ ଖାଦ୍ୟ ଯୋଗାଇ ଦିଆଯାଉଛି। ସେହିପରି ମହିଳାଙ୍କ ପାଇଁ ରାଜ୍ୟ ସରକାରଙ୍କ ମମତା ଓ ଆର୍ଶୀବାଦ ଯୋଜନା ବେଶ ସଫଳ ହୋଇଥିବା ବିଭାଗ ପକ୍ଷରୁ କୁହାଯାଇଛି।

ମମତା ଯୋଜନାରେ ୫୬ଲକ୍ଷ ୮୨ହଜାରରୁ ଅଧିକ ଗର୍ଭବତୀ ଓ ପ୍ରସୂତି ମାଆମାନେ ଉପକୃତ ହୋଇଛନ୍ତି। 5T ମାଧ୍ୟମରେ ଆଗକୁ ମମତା ଯୋଜନାରେ ମହିଳାଙ୍କୁ ସହଜରେ ସୁବିଧା ଯୋଗାଇ ଦେବା ପାଇଁ ଇ-ମମତା ୨.୦ ନାଁରେ ଏକ ମୋବାଇଲ ଆପ ଆରମ୍ଭ କରାଯାଇଛି। ସେହିପରି ଆର୍ଶୀବାଦ ଯୋଜନାରେ ୫୧ହଜାର ୧୩୦ଜଣ ହିତାଧିକାରୀ ସାମିଲ ହୋଇଛନ୍ତି।