ନୂଆ ଗାଇଡ୍ଲାଇନ୍: ବାହାଘର ପାଇଁ ୧୦୦ ନୁହେଁ ୨୦୦ ଲୋକଙ୍କୁ ଅନୁମତି…
ଭୁବନେଶ୍ୱର: ଡିସେମ୍ବର ପାଇଁ ଆସିଲା ରାଜ୍ୟ ସରକାରଙ୍କ ନୂଆ ଗାଇଡ୍ଲାଇନ୍ । ଏଣିକି ବାହାଘର ପାଇଁ ଆଉ ୧୦୦ ଲୋକରେ ସୀମିତ ରଖିବାକୁ ପଡ଼ିବନି । ରାଜ୍ୟ ସରକାର ଏଥିପାଇଁ ୨୦୦ ଲୋକଙ୍କୁ ଏକାଠି ହେବାର ଅନୁମତି ପ୍ରଦାନ କରିଛନ୍ତି ।
ଖାଲି ସେତିକି ନୁହେଁ ନୂଆ ଗାଇଡ୍ଲାଇନ୍ରେ ଅନେକ କଟକଣାକୁ କୋହଳ କରାଯାଇଛି । ହେଲେ କଣ୍ଟେନମେଣ୍ଟ୍ ଜୋନ୍ ଗୁଡ଼ିକରେ ଲକ୍ଡାଉନ୍ ନିୟମ ବଳବତ୍ତର ରହିବ ବୋଲି ନିଷ୍ପତି ହୋଇଛି ।
ସେହିଭଳି ଆନ୍ତର୍ଜାତିକ ବିମାନ ସେବାକୁ ନା’ କରିଛନ୍ତି ସରକାର । ବଡ଼ ଧରଣର ଧାର୍ମିକ, କ୍ରୀଡ଼ା, ସାଂସ୍କୃତିକ ଓ ରାଜନୈତିକ କାର୍ଯ୍ୟକ୍ରମ କରାଯାଇପାରିବ ନାହିଁ ବୋଲି କହିଛନ୍ତି ସରକାର ।
ବିଜନେସ୍ ଟୁ ବିଜନେସ୍ ପ୍ରଦର୍ଶନୀକୁ ସର୍ତ୍ତମୂଳକ ଅନୁମତି ଦିଆଯାଇଛି । କିନ୍ତୁ ବିଜନେସ୍ ଟୁ କଷ୍ଟମର୍ ପ୍ରଦର୍ଶନୀକୁ ଅନୁମତି ଦିଆଯାଇ ନାହିଁ । ଏହି କ୍ରମରେ ଭୁବନେଶ୍ୱରରେ ହେଉଥିବା ପ୍ରସିଦ୍ଧ ତୋଷାଳି ମେଳାର ଆୟୋଜନ ହୋଇପାରିବ ନାହିଁ । ଅନ୍ୟପଟେ ଶିଶିର ସରସକୁ ମଧ୍ୟ ଅନୁମତି ନାହିଁ ବୋଲି କୁହାଯାଇଛି ।
ବିବାହ ଉତ୍ସବ ପାଇଁ ୨ଶହ ଓ ଅନ୍ତ୍ୟେଷ୍ଟି କ୍ରିୟା ପାଇଁ ୫୦ ଲୋକଙ୍କୁ ଅନୁମତି ଦିଆଯାଇଛି । ଏହା ପୂର୍ବରୁ ବିବାହ ଉତ୍ସବ ପାଇଁ ୧୦୦ ଲୋକ ଏକାଠି ହେବାକୁ ଅନୁମତି ଦିଆଯାଇଥିଲା । ତେବେ ସବୁଠାରୁୁ ବଡ଼ କଥା ହେଲା ଡିସେମ୍ୱର ୧ରୁ ସବୁ ମେଡିକାଲ କଲେଜ୍ ଗୁଡ଼ିକୁ ଖୋଲିବାକୁ ଅନୁମତି ମିଳିସାରିଛି ।
ସେପଟେ ସ୍କୁଲ ଖୋଲିବା ନେଇ ଗଣଶିକ୍ଷା ବିଭାଗ ନିଷ୍ପତ୍ତି ନେବାକୁ ପରାମର୍ଶ ଦିଆଯାଇଛି । ପରିସ୍ଥିତି ଦେଖି ବିଭାଗ ପକ୍ଷରୁ ସ୍କୁଲ ଖୋଲିବାକୁ କୁହାଯାଇଛି । ସେହିଭଳି ମନ୍ଦିର ତଥା ଧର୍ମାନୁଷ୍ଠାନ ଖୋଲିବା ନେଇ ସ୍ଥାନୀୟ ପ୍ରଶାସନ ନିଷ୍ପତି ନେବେ ।
