ନେଟୱର୍କ ନଥିବାରୁ ନାହିଁନଥିବା ଅସୁବିଧାର ସମ୍ମୁଖୀନ ହେଉଛନ୍ତି ୫ ଖଣ୍ଡ ଗ୍ରାମବାସୀ

ଗୁଣୁପୁର : ଦୁର୍ଗମ ଅଞ୍ଚଳରେ ଆଜି ବି ଅପହଞ୍ଚ ନେଟୱର୍କ । ସରକାରଙ୍କ ଜନହିତକର ଯୋଜନାର ସୁବିଧା ପାଇବା ପାଇଁ ନେଟୱର୍କ ସାଜିଛି ବାଧକ। ନେଟୱର୍କ ନଥିବାରୁ ନାହିଁନଥିବା ଅସୁବିଧାର ସମ୍ମୁଖୀନ ହେଉଛନ୍ତି ୫ ଖଣ୍ଡ ଗ୍ରାମବାସୀ। ସୁଭଦ୍ରା ଯୋଜନା ହେଉ କି ରାସନ କାର୍ଡର ଇ- କେଓ୍ବାଇସି କରିବା ପାଇଁ ଲୋକେ ବହୁ ଅସୁବିଧା ଭୋଗୁଛନ୍ତି। ଇ- କେଓ୍ବାଇସି କରିବା ପାଇଁ ଚଢ଼ିବାକୁ ପଡୁଛି ପାହାଡ଼। ଏଭଳି ଦୃଶ୍ୟ ଦେଖିବାକୁ ମିଳିଛି ରାୟଗଡା ଜିଲ୍ଲା ଗୁଣୁପୁର ଅଞ୍ଚଳରେ।  ଚିନାସାରି ପଞ୍ଚାୟତ ଓ ଜଲତାର ପଞ୍ଚାୟତର ପାଞ୍ଚ ଖଣ୍ଡ ଗାଁର ଲୋକେ ରାସନ କାର୍ଡର ଇ- କେଓ୍ବାଇସି କରିବା ପାଇଁ ତିନି କିମି ପାହାଡ଼ ଚଢ଼ି ଲାଇନ ଲଗାଇଛନ୍ତି। ଏଙ୍ଗେରବା,  ତାଡାବାଡା, କୁରୁଗୁଡା, ଜାମ୍ବୁଗୁଡା ଓ  ପେରେଣ୍ଡା ଗ୍ରାମବାସୀ ବହୁ ଅସୁବିଧା ଭୋଗୁଛନ୍ତି। ପଞ୍ଚାୟତ କର୍ମଚାରୀ, ଯୋଗାଣ ସହାୟକ ପାହଡ ଉପରେ ଚଢି ସେଠାରେ ଇ କେଓ୍ବାଇସି କାମ କରୁଥିବା ଦେଖିବାକୁ ମିଳିଛି।  ମେସିନରେ ଚାର୍ଜ ସରିଗଲେ ଫେରିଯାଉଛନ୍ତି କର୍ମଚାରୀ। ଫଳରେ ନିରାଶ ହୋଇ ଲୋକଙ୍କୁ ଫେରିବାକୁ ପଡୁଛି। ନେଟ୍ ଓ୍ବାର୍କ ସୁବିଧା ନଥିବାରୁ ଦୁର୍ଗମ ଅଞ୍ଚଳ ବାସିନ୍ଦା କାମଧନ୍ଦା ଛାଡି ଦିନ ତମାମ୍ ଭୋକ ଶୋଷରେ ଜଗିରହୁଛନ୍ତି। ପେରେଣ୍ଡା ଗ୍ରାମରେ କିଛ ବର୍ଷ ତଳେ ନେଟ୍ଓ୍ବାର୍କ ସୁବିଧା ପାଇଁ ଏକ ଜିଓ ଟାଓ୍ବାର କରାଯାଇଛି ତାହା ବି କାର୍ଯ୍ୟକ୍ଷମ ହେଉନାହିଁ।