ଭାଙ୍ଗିଲା ନେପାଳ ସଂସଦ, ଆସନ୍ତା ବର୍ଷ ଏପ୍ରିଲ୍-ମେ’ରେ ନିର୍ବାଚନ

କାଠମାଣ୍ଡୁ: ନେପାଳ ପ୍ରଧାନମନ୍ତ୍ରୀ କେ.ପି ଶର୍ମା ଓଲିଙ୍କ  ସଂସଦ ଭଙ୍ଗ ସୁପାରିଶକୁ ଗ୍ରହଣ କରିଛନ୍ତି ରାଷ୍ଟ୍ରପତି ବିଦ୍ୟା ଦେବୀ ଭଣ୍ଡାରୀ । ଯାହାଫଳରେ ଭାଙ୍ଗିଯାଇଛି ନେପାଳ ପାର୍ଲିଆମେଣ୍ଟ ।

ସଂସଦ ଭଙ୍ଗ କରିବା ପରେ ନିର୍ବାଚନ ତାରିଖ ଘୋଷଣା କରିଛନ୍ତି ରାଷ୍ଟ୍ରପତି। ନେପାଳରେ ଆସନ୍ତାବର୍ଷ ତଥା ୨୦୨୧ ମସିହା ଏପ୍ରିଲ-ମେ ରେ ନିର୍ବାଚନ ଅନୁଷ୍ଠିତ ହେବ ।

ସୂଚନା ଅନୁଯାୟୀ ପ୍ରଥମ ପର୍ଯ୍ୟାୟ ନିର୍ବାଚନ ୨୦୨୧ ମସିହା ଏପ୍ରିଲ୍ ୩୦ ରେ ହେବାକୁ ଥିବା ବେଳେ ଦ୍ୱିତୀୟ ପର୍ଯ୍ୟାୟ ନିର୍ବାଚନ ମେ’ ୧୦ରେ ଅନୁଷ୍ଠିତ ହେବ । ଯାହା  ପରେ ସେଠାରେ ଏକ ନୂତନ ସରକାର ଗଠନ ହେବ।

ରବିବାର ସକାଳେ ନେପାଳ ପ୍ରଧାନମନ୍ତ୍ରୀ କେ.ପି ଶର୍ମା ଓଲି ସଂସଦ ଭଙ୍ଗ କରିବାକୁ ନିଷ୍ପତ୍ତି ନେଇଥିଲେ ।

ସବୁଠାରୁ ବଡ଼ କଥା ହେଉଛି ନେପାଳର ସମ୍ବିଧାନରେ ସଂସଦ ଭଙ୍ଗ କରିବାକୁ କୌଣସି ପ୍ରାବଧାନ ନାହିଁ। ଏହାସତ୍ତ୍ୱେ ପ୍ରଧାନମନ୍ତ୍ରୀ କେପି ଶର୍ମା ଓଲିଙ୍କ ସୁପାରିଶ ଦେବା ପ୍ରସଙ୍ଗକୁ ନେଇ ବିରୋଧୀଙ୍କ ମହଲରେ ତୀବ୍ର ଅସନ୍ତୋଷ ପ୍ରକାଶ ପାଇଥିଲା ।

ସାମ୍ବିଧାନିକ ପରିଷଦ ଅଧିନିୟମ ପରିବର୍ତ୍ତନକୁ ନେଇ ଏକ ଅଧ୍ୟାଦେଶକୁ ପ୍ରତ୍ୟାହାର କରିବାକୁ ସରକାରଙ୍କ ଉପରେ ପ୍ରବଳ ଚାପ ରହିଥିଲା। ଏଥିରୁ ବର୍ତ୍ତିବାକୁ ଚଳିତ ଅଧିବେଶନକୁ ଭାଙ୍ଗିବା ପାଇଁ ଷଡଯନ୍ତ୍ର କରାଯାଉଛି ବୋଲି ବିରୋଧୀ ଅଭିଯୋଗ କରିଛନ୍ତି। ଆଜି ସକାଳ ୧୦ଟା ବେଳେ ଆପାତକାଳୀନ ସ୍ଥିତିରେ କ୍ୟାବିନେଟ ବୈଠକ ଡକାଯାଇଥିଲା। ଏଥିରେ ସଂସଦର ଚଳିତ ଅଧିବେଶନ ଭାଙ୍ଗିବା ପାଇଁ ସୁପାରିଶ କରିବା ନେଇ ଆଲୋଚନା ହୋଇଥିଲା। ତେବେ ଏଭଳି ଅସାମ୍ବିଧାନିକ ନିଷ୍ପତ୍ତି ପାଇଁ ପ୍ରଧାନମନ୍ତ୍ରୀଙ୍କୁ ନିଜ ଦଳ ଭିତରୁ ହିଁ ବିରୋଧର ସାମ୍ନା କରିବାକୁ ପଡ଼ିଛି।