ପାଣ୍ଡେଙ୍କ ପିଛା ଛାଡୁନି NCB, ଆଜି ପୁଣି ଅନନ୍ୟାଙ୍କୁ ଜେରା
1 min read
ମୁମ୍ବାଇ: ଡ୍ରଗ୍ସ ଲିଙ୍କକୁ ନେଇ ବଲିଉଡ ଅଭିନେତ୍ରୀ ଅନନ୍ୟା ପାଣ୍ଡେଙ୍କ ପିଛା ଛାଡୁନି ଏନସିବି । ଆଜି ପୁଣି ଅନନ୍ୟାଙ୍କୁ ଜେରା କରିବ ନାର୍କୋଟିକ୍ସ କଣ୍ଟ୍ରୋଲ ବ୍ୟୁରୋ । ଆର୍ଯ୍ୟନଙ୍କ ସହ ସମ୍ପର୍କର ଗଭୀରତାକୁ ଖୋଜୁଛି ଏନସିବି । ଅନନ୍ୟା ପାଣ୍ଡେଙ୍କ ଡ୍ରଗ୍ସ ଖଟିରେ ଆଉ କିଏ ରହିଥିଲା ସାମିଲ୍ । ଅନନ୍ୟାଙ୍କୁ ଗତ ୨୨ତାରିଖିରେ ଦୀର୍ଘ ୪ଘଣ୍ଟାର ଜେରା ପରେ ବି ସନ୍ତୁଷ୍ଟ ହୋଇନଥିଲା ଏନସିବି । ଆର୍ଯ୍ୟନ ଖାନଙ୍କ ଡ୍ରଗ୍ସ ଯୋଗାଉଥିବା ଲୋକଙ୍କୁ ଅନନ୍ୟା ଚିହ୍ନିଥିବା ଏନସିବି ସୂଚନା ପାଇଛି । ଏହାର ସତ୍ୟତା ଜାଣିବାକୁ ଅନନ୍ୟାଙ୍କୁ ପୁଣି ଜେରା କରାଯିବ । ଆର୍ଯ୍ୟନ ଓ ଅନନ୍ୟାଙ୍କ ହ୍ବାଟ୍ସଆପ୍ ଚାଟ୍ରୁ ଅନେକ ଗୁରୁତ୍ବପୂର୍ଣ୍ଣ ତଥ୍ୟ ପାଇଛି ଏନସିବି ।
ହ୍ବାଟ୍ସଆପ୍ ଚାଟ୍ ଅନୁସାରେ ଅନନ୍ୟାଙ୍କ ଠାରୁ ଅନେକ ପ୍ରଶ୍ନ ଉତ୍ତର ଖୋଜୁଛି ଏନସିବି । ସେପଟେ ଆର୍ଯ୍ୟନଙ୍କ ଗିରଫ ମାମଲାରେ ଆସିଛି ନୂଆ ଟ୍ବିଷ୍ଟ । ଡ୍ରଗ୍ସ ପାର୍ଟିରେ ଚଢ଼ାଉ ମାମଲାରେ ଜଣେ ସାକ୍ଷୀ ଦେଇଛନ୍ତି ଚାଞ୍ଚଲ୍ୟକର ବୟାନ । ସାକ୍ଷୀ ପ୍ରଭାକର ସୈଲ୍ କହିଛନ୍ତି, ୨୫ କୋଟି ଟଙ୍କା ପାଇଁ ଡିଲ ହୋଇଥିଲା । ପରେ ୧୮ କୋଟିରେ ସେଟଲମେଣ୍ଟ ହୋଇଥିଲା । ପ୍ରଭାକର ନିଜକୁ କେ ପି ଗୋସାଭିଙ୍କ ବଡିଗାର୍ଡ ବୋଲି ପରିଚୟ ଦେଇଛନ୍ତି । ଗୋସାଭି ଆର୍ଯ୍ୟନ ଖାନ୍ଙ୍କ ସହ ସେଲଫି ନେଇ ଚର୍ଚ୍ଚାକୁ ଆସିଥିଲେ ।
ସତ୍ୟପାଠରେ ପ୍ରଭାକର ସୈଲ କହିଛନ୍ତି ଯେ କେ.ପି. ଗୋସାଭି ଓ ସାମ ଡି-ସୌଜା ନାମକ ଜଣେ ବ୍ୟକ୍ତିଙ୍କ ମଧ୍ୟରେ ୧୮ କୋଟି ଟଙ୍କା ଦେବାନେବା କଥା ହୋଇଥିଲା । ଏହା ସହ ଏହି ଟଙ୍କାରୁ ୮ କୋଟି ଟଙ୍କା ସମୀର ଓ୍ବାଙ୍ଖଡେଙ୍କୁ ଦିଆଯିବା ନେଇ କଥା ହୋଇଥିଲା । ତେବେ ଅଭିଯୋଗକୁ ଖଣ୍ଡନ କରିଛନ୍ତି ଏନସିବିର ଜୋନାଲ ନିର୍ଦ୍ଦେଶକ ସମୀର ଓ୍ବାଙ୍ଖଡେ । ଏଥିସହ ଆଇନ୍ଗତ ସୁରକ୍ଷା ଦେବାକୁ ମୁମ୍ବାଇ ପୋଲିସ୍ କମିଶନରଙ୍କୁ ଚିଠି ଲେଖିଛନ୍ତି ସମୀର ଓ୍ବାଙ୍ଖଡେ । ଅନ୍ୟପଟେ ଆସନ୍ତାକାଲି ହେବ ଆର୍ଯ୍ୟନଙ୍କ ଜାମିନ ଶୁଣାଣି । ଏହା ପୂର୍ବରୁ ଆର୍ଯ୍ୟନଙ୍କ ଜାମିନକୁ ବିରୋଧ କରିବାକୁ ଏନସିବି ପ୍ରମାଣ ଯୋଗାଡ କରିଥିବା ଚର୍ଚ୍ଚା ହେଉଛି ।
