ପ୍ରଥମ ପର୍ଯ୍ୟାୟ ନିର୍ବାଚନରେ ଝାଡ଼ଖଣ୍ଡରେ ଲାଲ୍ ହିଂସା
ଝାଡ଼ଖଣ୍ଡ: କଡ଼ା ସୁରକ୍ଷା ବଳୟ ଭିତରେ ଝାଡ଼ଖଣ୍ଡରେ ଚାଲିଛି ବିଧାନସଭା ନିର୍ବାଚନ । ୧୩ଟି ବିଧାନସଭା କ୍ଷେତ୍ରରେ ମତଦାନ ଜାରି ରହିଛି । କଡ଼ା ସୁରକ୍ଷାକୁ ଭେଦି ମାଓବାଦୀ ହିଂସାକାଣ୍ଡ ଘଟାଇଛନ୍ତି । ଗୁମଲା ଜିଲ୍ଲାର ବିଷ୍ଣୁପୁରରେ ମାଓବାଦୀ ଏକ ବ୍ରିଜକୁ ଲ୍ୟାଣ୍ଡମାଇନ୍ ଲଗାଇ ଉଡ଼ାଇ ଦେଇଛନ୍ତି ।
ତେବେ, ଏଥିରେ କେହି ମୃତାହତ ହୋଇନଥିବା ସୂଚନା ଦେଇଛନ୍ତି ଡେପୁଟି କମିଶନର ଶଶୀ ରଞ୍ଜନ । ମତଦାନ ଠିକ୍ ଠାକ୍ ଚାଲିଛି । ଏହାଦ୍ୱାରା ମତଦାନ ପ୍ରଭାବିତ ହେବନାହିଁ ବୋଲି ସେ ସୂଚନା ଦେଇଛନ୍ତି ।
ପ୍ରଥମ ପର୍ଯ୍ୟାୟରେ ରାଜ୍ୟର ମାଓ ଅଧ୍ୟୁଷିତ ୧୩ଟି ବିଧାନସଭା ଆସନରେ ନିର୍ବାଚନ ହେଉଛି । ଏଥିରେ ୧୫୦୦ ଅତି ସମ୍ବେଦନଶୀଳ ବୁଥ୍ ରହିଛି । ବୁଥରେ ସୁରକ୍ଷାକର୍ମୀ ମୁତୟନ ହୋଇଥିବା ବେଳେ ହେଲିକପ୍ଟର ମାଧ୍ୟମରେ ସୁରକ୍ଷା ବ୍ୟବସ୍ଥା ତନଖି କରାଯାଉଥିବା ଏଡିଜି ମୁରାରୀ ଲାଲ୍ ମୀନା ସୂଚନା ଦେଇଛନ୍ତି ।
