ରାଣା ଦମ୍ପତିଙ୍କ ଜାମିନ ଶୁଣାଣି ବୁଧବାରକୁ ଘୁଞ୍ଚିଲା
1 min read
ନୂଆଦିଲ୍ଲୀ: ପୁଣି ନିରାଶ ହେଲେ ରାଣା ଦମ୍ପତି । ମହାରାଷ୍ଟ୍ର ମୁଖ୍ୟମନ୍ତ୍ରୀ ଉଦ୍ଧବ ଠାକରେଙ୍କ ବାସଭବନ ମାତୋଶ୍ରୀ ସାମ୍ନାରେ ହନୁମାନ ଚାଳିଶା ପଢିବାକୁ ନେଇ ଗିରଫ ହୋଇଥିବା ନିର୍ଦ୍ଧଳୀୟ ସାଂସଦ ନବନୀତ ରାଣା ଏବଂ ତାଙ୍କ ବିଧାୟକ ସ୍ୱାମୀ ରବି ରାଣା ପୁଣି ନିରାଶ ହୋଇଛନ୍ତି । ହନୁମାନ ଚାଳିଶା ବିବାଦରେ ଛନ୍ଦି ହୋଇ ଗିରଫ ହୋଇଥିଲେ ରାଣା ଦମ୍ପତି । ପରେ ୭ ଦିନ ପାଇଁ ବିଚାର ବିଭାଗୀୟ ହାଜତକୁ ପଠାଇଥିଲେ କୋର୍ଟ । ତେବେ ଆଜି ଅର୍ଥାତ ସୋମବାର ମାମଲାର ରାୟ ପ୍ରକାଶ କରିଥାନ୍ତେ କୋର୍ଟ । କିନ୍ତୁ ତାହାକୁ ବୁଧବାର ଯାଏଁ ଘୁଞ୍ଚାଇ ଦିଆଯାଇଛି । ଜାମିନ ଆବେଦନ ଉପରେ ଆସନ୍ତା ବୁଧବାର ଦିନ ରାୟ ଶୁଣାଇବେ ମାନ୍ୟବର କୋର୍ଟ ।
ହନୁମାନ ଚାଳିଶା ବିବାଦ ମାମଲାରେ ଗିରଫ ହୋଇ ଜେଲରେ ଥିବା ରାଣା ଦମ୍ପତ୍ତିଙ୍କୁ ପୂର୍ବରୁ ମିଳିନଥିଲା ଜାମିନ । ଶନିବାର ଶୁଣାଣି ପରେ ରାୟ ସଂରକ୍ଷିତ ରଖିଥିଲେ କୋର୍ଟ । ସୋମବାର ଅର୍ଥାତ ଆଜି ମାମଲାର ରାୟ ପ୍ରକାଶ କରାଯିବାର ଥିଲା । କିନ୍ତୁ ତାହାକୁ ଆସନ୍ତା ବୁଧବାରକୁ ଘୁଞ୍ଚାଇଛନ୍ତି କୋର୍ଟ । ଗତ ଶନିବାର ଦିନ ଘଟଣାର ଶୁଣାଣି ହୋଇଥିଲା । ଉଭୟ ପକ୍ଷର ଦଲିଲ୍ ଯାଞ୍ଚ କରିଥିଲେ କୋର୍ଟ । ପ୍ରାୟ ଅଢେଇ ଘଣ୍ଟା ଧରି କୋର୍ଟ ଶୁଣାଣି କରିବା ପରେ ରାୟ ସଂରକ୍ଷିତ ରଖିଥିଲେ ।
ଉଲ୍ଲେଖ ଥାଉ କି, ସାଂସଦ ନବନୀତ ରାଣା ଘୋଷଣା କରିଥିଲେ ଯେ ମହାରାଷ୍ଟ୍ର ମୁଖ୍ୟମନ୍ତ୍ରୀ ଉଦ୍ଧବ ଠାକରେଙ୍କ ବାସଭବନ ମାତୋଶ୍ରୀ ଆଗରେ ହନୁମାନ ଚାଳିଶା ପାଠ କରିବେ । ଯାହାକୁ ନେଇ ସମର୍ଥକଙ୍କ ମଧ୍ୟରେ ଅସନ୍ତୋଷ ଦେଖାଦେଇଥିଲା । ଫଳରେ ଆଇନଶୃଙ୍ଖଳା ପରିସ୍ଥିତି ସୃଷ୍ଟି ହେବାର ଆଶଙ୍କା ମଧ୍ୟ ଦେଖାଦେଇଥିଲା । ଅନ୍ୟପଟେ ନବନୀତ ରାଣାଙ୍କ ବାସଭବନ ଆଗରେ ମଧ୍ୟ ଶିବସେନା କର୍ମୀ ଏକାଠି ହୋଇ ବିଭିନ୍ନ ନାରା ଦେଇଥିଲେ । ଯାହା ପରେ ଅନୁମାନ ଚାଳିଶା ପଢିବେ ନାହିଁ ବୋଲି ସଫେଇ ଦେଇଥିଲେ ନବନୀତ ରାଣା ।
